1 Timoteo 5:1-25
5 Amo xikajua se takatsin akin xiuejya,* ta xiknojnotsa kemej yeskia mopaj; akin telpochmejok, xikinnojnotsa kemej yeskia mokniuan;
2 se siuatsin akin xiuejya,* xiknojnotsa kemej yeskia momaj uan akin ichpochmejok xikinnojnotsa kemej yeskia mokniuan, uan amo xiknemilijto tein amo chipauak.
3 Xikintakachiua* uan xikinyekpia siuatsitsin akin momikilijya inintakatsin, akin yekmelauj amo akaj kinpaleuia.*
4 Sayoj ke, komo se siuatsin akin momikilijya itakatsin kinpia ikoneuan oso iixuiuan, yejuan achto moneki kinextiskej ininkalijtik ke kiueyichiuaj Dios ika nochi ininyolo uan kinmakaskej inintatuan uan ininueyitatuan tein moneki porin nejin kiyolpaktia Dios.
5 Siuatsin akin yekmelauj amo akaj kipaleuia uan amo teyi kipia,* takuaujtamati iuan Dios uan chikauak motataujtia youalintonal.
6 Sayoj ke, siuatsin akin kitemoua sayoj kichiuas tein kinejneki inakayo,* kemej yeskia momikilijya maski yoltokok.
7 Yejua ika, xiksentoka xikinnauatijto nejin para maj amo onka teisa tein ika uelis kinijijtoskej.
8 Porin komo aksa* amo kintekipanoua akin moneki kinyekpias, uan okachiok akin nemij ichan, kiixtopeua tein tikneltokaj uan okachi kichiua tein amo kuali ke se akin amo taneltoka.
9 Siuatsin akin momikilij itakatsin akin kijkuiloskej para kipaleuiskej moneki kipias panoua 60 xiujmej, akin kipiak sayoj se itakatsin
10 uan maj moixmati ke kichiua miak taman tein kuali: akin kuali kiniskaltij ikoneuan, kuali kinselij oksekin, kinmetspajpakak akin Dios moinxelouilij,* kinpaleuij akin tajyouiaj uan kiyekchiuak nochi taman tein kuali.
11 Sayoj ke, amo xikinijkuilo siuatsitsin akin momikilijya inintakatsin uan ichpochmejok. Keman yejuan kitelnekij motekaskej iuan se takat, amo kitekitiliajok Cristo uan oksepa kinekij monamiktiskej.
12 Yejuan motaniliskej maj kintatsakuiltikan porin amo kichiuaj tein motenkaujkaj kichiuaskej.
13 Uan no momatij amo teyi kichiuaskej uan sayoj takalpanojtinemij. Kemaj, amo sayoj tonalpolouaj, ta no kintenkuitinemij* oksekin uan mokalakiaj kampa amo inintekiuj uan ika tajtouaj tein amo moneki.
14 Yejua ika, nikneki maj siuatsitsin akin ichpochmejok uan momikilijya inintakatsin maj monamiktikan, maj kinpiakan konemej, maj kinitakan akin nemij ininchan para maj amo techijijtokan akin techixnamikij.
15 Tein melauj, sekin moxelojkejya uan kitojtokakej Satanás.
16 Komo se siuatsin taneltokakej kinpia ichankauan akin momikilijya inintakatsin, maj kinpaleui para maj amo kintekimakakan tokniuan itech nechikol, uan ijkon tokniuan uelis kinpaleuiskej akin yekmelauj amo akaj kinpaleuia.*
17 Maj semi kintakachiuakan* tayekananij akin kuali kinixyekanaj tokniuan itech nechikol, okachiok akin kuali tajtouaj uan tamachtiaj porin yejuan chikauak tekitij.
18 Porin Tajkuilolamatsin kijtoua: “Amo xiktenilpi* kuakouej keman ipan tajtaksatok* trigo”. Uan no kijtoua: “Akin tekiti kinamiki maj kitaxtauikan”.
19 Komo aksa kiteluilia se tayekankej,* amo xikaki. Sayoj ke komo omen oso eyin kiteluiliaj, uelis tikchiuas teisa.
20 Xiknexti senteixtenoj ke amo kuali yetok tein kichiuaj akin kichiujtinemij tajtakol para maj oksekin amo no kichiuakan nejon.
21 Nimitsyeknauatia iixpan Dios, Cristo Jesús uan ángeles taijitalmej* xikchiua nejin tein nimitsnauatia uan amo xitechikoita nion xitechichikotasojta.*
22 Amo keman xikijsiujkatali momauan itech aksa para tikixtalis maj kichiua se tekit. Amo xiteuanti itech inintajtakoluan oksekin. Xichipaujkanemi.
23 Amo xitayitook at;* ta xitayi tepitsin vino tein mitspoxpaleuis uan no porin semi* tikokolispeua.
24 Inintajtakoluan sekin nochin kimatij uan niman kintatsakuiltiaj, sayoj ke inintajtakoluan oksekin satepan momatij.
25 No ijkon, tein kuali tein se kichiua nochin kimatij uan tein amo momati amo ueli se kitatijtok.*
Tajtolmelaualismej
^ Oso “tatajya”, “tatotsinya”.
^ Oso “nanajya”, “nanotsinya”.
^ Oso “Xikinpoujkaita”.
^ Oso “kintekipanoua”.
^ Oso “amo kipia tein ika moixpanoltis”.
^ Nejin xa kijtosneki ke kineki motekas iuan se takat.
^ Oso “akin”, “akaj”.
^ Oso “chipaujkej iixpan Dios”.
^ Oso “kinijijtojtinemij”.
^ Oso “kintekipanoua”.
^ Oso “kinpoujkaitakan”.
^ Oso “Amo xiktenbozalti”.
^ Oso “kitejteliksatok”, “kitsoniksatok”.
^ Oso “se akin xiuejya”.
^ Oso “taixpejpenalmej”.
^ Oso “nion xitechichikoui”.
^ Oso “sayoj at”.
^ Oso “achichika”.
^ Oso “kicholtijtok”.
