1 Timoteo 6:1-21
6 Akin moajsij temako maj nochipa kintakachiuakan* inintekouan ika nochi ininyolo, ijkon amo keman kijijtoskej itokay Dios nion tein tamachtia.
2 Uan akin inintekouan taneltokaj maj amo kinemilikan ke amo moneki kintakachiuaskej* porin tokniuan, ta moneki okachiok kinyektekitiliskej, porin akin kintekitilijtokej no taneltokaj uan no kintasojtaj.
Tejua xiksentoka xitamachti uan xikinilui maj kichiuakan nejin.
3 Akin tamachtia okse taman uan amo tamachtilis tein kuali* tein kitemaka toTekotsin Jesucristo nion tamachtilis tein kinextia keniuj moneki tikueyichiuaskej Dios ika nochi toyolo,
4 yejua semi moueyimati* uan amo teyi kiajsikamati. Semi kiuelita tenajnankilis uan moteuis sayoj por tajtolmej. Nejin kichiua maj oksekin monexikoluikan,* moteuikan, motakajkayauilikan,* maj amo takuaujtamatikan iniuan oksekin
5 uan maj nochipa motajtolteuijtokan ika tein amo semi moneki. Nejin kipeualtiaj akin amo kuali tanemiliaj akin amo kiajsikamatijok tamachtilis tein melauak. Yejuan kinekij kiueyichiuaskej Dios sayoj para kitaniskej teisa.
6 Uan tein melauj, se kiueyichiuas Dios ika nochi se iyolo kichiua maj se kitani miak taman keman se yolpaki ika tein se kipia.
7 Porin keman tiyolkej amo teyi tikualkuikej nikan taltikpak uan amo no teyi uelis tikuikaskej keman timikiskej.
8 Yejua ika, komo tikpiaj tein tikuaskej* uan tein timotaliliskej,* maj ika nejon tiyolpakikan.
9 Sayoj ke, akin kiixtalijtokej motomintiskej motajtakolmakaj uan kemej yeskia uetsij itech se trampa, kinejnekij tein kinijtakoua uan kichiuaj miak taman tein amo tapaleuia tein kinuika maj ixpoliuikan.
10 Porin se kitelnekis se motomintis kichiua maj onka nochi taman tein amo kuali, uan kemej sekin kitelnekij nejin, amo takuaujtamatijok uan semi motajyouiltianij.
11 Sayoj ke tejua, itekitikauj Dios amo xikchiua* nejon, ta ximochikaua tikchiuas tein kuali yetok, tikueyichiuas Dios ika nochi moyolo, titakuaujtamatis, titetasojtas, titaxikos uan tiyeski tiyolnejmach.
12 Xitateui kemej se kuali soldado para tikpaleuis tein tikneltoka. Amo xikaua tein mitspaleuis xinemi nochipaya. Tejua mitsnotskej para tinemis nochipaya uan yejua nejon tein kuali tikteixmatiltij ininixpan miakej.
13 Iixpan Dios, akin kichiua maj yolto nochi tein onkak, uan iixpan Cristo Jesús, akin kuali tajtoj iixpan Poncio Pilato, nimitsnauatia
14 kuali xiktakamati nochi tanauatilmej uan maj amo onka tein ika mitsijijtoskej hasta keman monextis toTekotsin Jesucristo,
15 porin keman ajsis tonal tein ixyetok, akin yolpaki uan kipia ueyi tanauatil kinextis ichikaualis. Yejua ininTekiuaj akin taixyekanaj kemej tekiuanij uan ininTeko uejueyi chiuanimej.
16 Sayoj yejua amo ueli miki, nemi itech se tanex kampa amo akaj ueli motokia, uan amo akin kiitani nion ueli kiita. Yejua kinamiki maj kitakachiuakan* uan maj iaxka chikaualis tein amo tami. Maj ijkon mochiua.*
17 Xikinnauati nejin akin tominpiaj itech nejin tonalmej:* maj amo moueyimatikan* uan maj amo takuaujtamatikan itech tomin tein tami, ta maj takuaujtamatikan iuan Dios, akin techtelmaka nochi tein ika tiyolpakij.
18 Xikinilui maj kichiuakan miak taman tein kuali, maj kitemakakan tein kipiaj uan ika miak pakilis maj tapaleuikan ika tein kipiaj,
19 uan ijkon yejuan motaniliskej tein yekmelauj kipia ipatiuj, tein Dios kinmakas para kuali nemiskej satepan, para maj amo kikauakan tein kinpaleuis maj yekmelauj kuali nemikan.
20 Timoteo, amo xikaua tein Dios mitsmakak, amo xikaki tajtolmej tein amo tapaleuiaj tein kiixnamiki Dios nion xikinkaki akin kinemiliaj ke semi taixmatij, porin nejon tein kiixmatij kiixnamiki tein melauak.
21 Kemej sekin kinneltokiliaj nejon, kichiuani maj kikauakan tamachtilis tein melauak.
Maj Dios namechmaka itatiochiualis tein amo technamiki.
Tajtolmelaualismej
^ Oso “kinpoujkaitakan”.
^ Oso “kinpoujkaitaskej”.
^ Oso “tepaleuia”.
^ Oso “moueyineki”.
^ Oso “kinekikan moaxkatiliskej tein teaxka”.
^ Oso “maj kijtokan tein teyolkokoua”.
^ Oso “tein ika timoixpanoltiskej”.
^ Oso xa “kampa timopaleuiskej”. Itech griego, “tein ika timopikiskej”.
^ Itech griego, “xikcholui (xikcholouili)”.
^ Oso “kipoujkaitakan”.
^ Oso “Amén”.
^ Xikonita tonalmej; tein mochiujtok.
^ Oso “amo moueyinekikan”.
