Apocalipsis 15:1-8
15 Nikitak ne iluikak okse ueyi taman tein kiixnextia teisa tein semi se kimojkaita: chikome ángeles kiuikayaj chikome tetsaujmej. Ika nejin tamij nochin tetsaujmej, porin ika nejon tamis iueyi kualanyo Dios.
2 No nikitak kemej se ueyiat tein tamatia kemej teskat tein maneliujtoya ika tit* uan no nikinitak akin kitankaj koujtajtapial uan itaixkopin tamachijchiuj, akin amo kinneskayotijkaj ika tapoual tein kipia itokay. Yejuan ijkatoyaj inakastan ueyiat tein tamatia kemej teskat; uan ininmako kipiayaj arpas tein iaxka Dios.
3 Mokuikatijtoyaj* itatsotson Moisés, itakeual Dios uan no itatsotson Ichkatsin.* Kijtouayaj:
“Jehová* Dios, akin tikpia nochi chikaualis, nochi tein tikchiua semi ueyi uan semi tikmojkaitaj. Tekiuaj akin nochipa tiyoltok, nochipa tikchiua tein kuali yetok uan titakuaujtamach.*
4 Jehová,* ¿akoni amo mitsmojkatokas? ¿Akoni amo kiueyitalis motokay? Ta sayoj tejua amo titekaua. Akin pouij itech nochin altepemej ualaskej moixpan uan mitsueyichiuaskej porin kimatkejya ke tein tikixtalia kuali yetok”.
5 Satepan nikitak nejin: ne iluikak peuak tapoui kampa okachi yektik itech takenkal kampa yetok tein Dios kiteixmatiltij.
6 Uan de kampa okachi yektik kiskej chikome ángeles tein kiuikayaj chikome tetsaujmej. Takentiayaj ika linojtasal tein chipauak uan milinia, uan yolixilpitoyaj* ika se tasal* tachijchiuj ika oro.
7 Semej naui ángeles kinmakak nejon chikome ángeles chikome kaxit tachijchiuj ika oro tein pexontoya* ika iueyi kualanyo Dios, akin nemi nochipaya uan amo keman miki.
8 Uan kampa okachi yektik pexonik ika pokti porin Dios kinextij ikualtsinyo uan ichikaualis. Amo akin uelia kalakia kampa okachi yektik hasta maj chikome ángeles kitamipantoyauanij nejon chikome tetsaujmej.
Tajtolmelaualismej
^ Oso “tekol”.
^ Oso “Cantarojtoyaj”.
^ Oso “Borrego”.
^ Oso “tein melauak”.
^ Oso “yolixtsikaujtoyaj”, “ininelpan ilpitoyaj”.
^ Oso “paxa (tajkotsikaujka)”.
^ Oso “temitoya”.
