Hebreos 5:1-14
5 Porin takat akin kijitaj* maj tekiti kemej tayekankatiopixkat, kiixtaliaj maj kinpaleui oksekin maj kiueyichiuakan Dios, para kimaktilis Dios miak taman tein ika kintapojpoluiliskej inintajtakoluan.
2 Kemej tayekankatiopixkat no tajtakolej, uelis kiniknelis akin motajtakolmakaj porin amo kimatij toni kuali yetok uan toni amo.
3 Yejua ika no moneki kimaktilis Dios tein kipaleuis maj kitapojpolui, ijkon kemej kimaktilia para maj kintapojpolui oksekin.
4 Nion se takat ueli moixtalia iselti kemej tayekankatiopixkat, ta sayoj Dios uelis kiixtalis, ijkon kemej kiixtalij Aarón.
5 No ijkon, Cristo amo iselti moueyitalij nion moixtalij kemej tayekankatiopixkat, ta Dios kiueyitalij keman kiluij: “Tejua tinokoneuj; axkan nejua nimochiuako nimopaj”.
6 Ijkon kemej no kijtoua itech okse tajkuilol: “Tejua titiopixkat kemej Melquisedec, uan ijkon titekitis nochipaya”.
7 Keman Cristo nemik nikan taltikpak, miakpa kitajtanij maj kipaleui uan chikauak kitataujtij akin ueliskia kimakixtis maj amo kimiktikan. Keman kitataujtiaya, kitsajtsiliaya uan chokatiaya, uan kemej kimojkatokaya Dios, yejua kikakik.
8 Maski katka ikoneuj, tein kijyouij kipaleuij maj kimati keniuj tatakamatis.
9 Uan keman kitamichiuak tein kiixtalijtoya,* nochin akin kitakamatij ueliskiaya momakixtiskej itechkopa uan nemiskej nochipaya,
10 porin Dios kiixtalij maj tayekankatiopixkat kemej Melquisedec.
11 Onkak miak taman para ika tamechnojnotsaskej Cristo, sayoj ke ouij se kimelauas, porin namejuan amo namochikauaj nankiajsikamatiskej.*
12 Porin maski axkan monekiskiaya nanyeskij nantamachtianij, oksepa moneki maj aksa* namechmachti tein yekinika namomachtijkej itech itajtol Dios. Oksepa namechpoloua leche uan amo tapalol.
13 Akin kisentoka motamaka ika leche amo kiixmati itajtol Dios tein techmachtia tein kuali yetok, porin yekin moskaltijtok.
14 Sayoj ke, tapalol kikuaj akin semi takuaujtamatij, akin kimatij keniuj kuali kikuiskej inintanemilil uan ijkon ueli kimatij toni kuali uan toni amo.
Tajtolmelaualismej
^ Oso “kiixpejpenaj”.
^ Oso “mochiuak ajsitok”.
^ Oso “nantakakiskej”.
^ Oso “akin”, “akaj”.
