Hechos 12:1-25
12 Itech nejon tonalmej, tekiuaj Herodes peuak kintajyouiltia seki tokniuan itech nechikol.
2 Kimiktij Santiago, iikniuj Juan, ika machete tein ojkan tenej,*
3 uan keman kiitak ke judíos kiuelitakej nejon, tanauatij maj kikitskikan Pedro. (Nochi nejin mochiuak itech tonalmej keman mochiujtoya iluit keman kikuaj pantsin tein amo kisamaualtiaj).*
4 Yejua ika tanauatij maj kikitskikan, kitsakkej uan kinixtalij naui oloch soldados akin mopapatatiaskiaj para kipixtoskej. Itech sejse oloch soldados moajsiaj nauin. Kichiuak nejon porin kinekia kiuikas ininixpan nochin satepan ke panoskia iluit tein monotsa Pascua.
5 Yejua ika kikaujkej Pedro maj tsakto. Sayoj ke, tokniuan kisentokayaj chikauak kitataujtijtoyaj Dios maj kipaleui.
6 Se youak achto ke Herodes kiuikaskia ininixpan nochin, Pedro kochtoya tatajko de ome soldados akin inintech ilpitoya* ika ome cadena, uan puertajixpan yetoyaj tajpianij akin tajpixtoyaj kampa tsaktoya.
7 Sayoj ke ompa nestiuetsito iángel Jehová,* uan se tanex tauij kampa tsaktoya. Yejua kijxitij* Pedro keman kielchikiujolinij uan kiluij: “¡Nimantsin ximoketsa!”. Uan cadenas uejuetskej de imauan.
8 Ángel kiluij: “Ximotasalti* uan ximotekakti”. Yejua ijkon kichiuak. Ompa, ángel kiluij: “Ximotalili mopantaken uan xinechtojtoka”.
9 Pedro kisak uan kitojtokak, maski amo kimatia ox melauak tein ángel kichiujtoya. Tein melauj, yejua kinemiliaya ke takochitstoya.
10 Keman kinpanauijkej yekinika uan ojpatika oloch tajpianij, ajsikej itech tepospuerta kampa se kisa uan se youi ueyi xolal uan iselti tatapouik. Ompa, kiskej uan kisentokakej nejnenkej itech se ojti. Uan ángel ixpoliujtiuetsik.
11 Nejon hora, Pedro kiajsikamatik tein mochiujka uan kijtoj: “Axkan nikyekmati ke Jehová* kiualtitanik iángel uan nechmakixtij imako Herodes uan no nechmakixtij para maj amo nechpano nochi tein judíos kichiayaj maj nechpano”.
12 Satepan ke kiajsikamatik nejin, yajki ichan María, kampa mosentilijtoyaj miakej imomachtijkauan Jesús uan kichiujtoyaj netataujtil. Uan María katka inan Juan akin kinotsayaj Marcos.
13 Keman takakalatsak, se siuapil akin katka takeual, akin monotsaya Rode, kiitato akoni tanotstoya.
14 Keman kitenixmatik Pedro, semi yolpakik, uan amo kitatapouilij, ta motaloj kalijtik kiniluito oksekin ke Pedro yetoya kaltenoj.
15 Yejuan kiluijkej: “Tikuatapolojtok”. Sayoj ke kemej yejua kisentokaya kijtouaya ke melauak katka, yejuan peuak kijtouaj: “Amo yejua, ta iángel”.
16 Sayoj ke Pedro kisentokaya takakalatstoya. Keman yejuan tatapojkej uan kiitakej, semi kimojkaitakej.
17 Yejua kinnejnextilij ika imay maj amo tajtokan uan kintamitapouij keniuj Jehová* kikixtijka kampa tsaktoya. Uan kiniluij: “Xikinmatiltikan nejin Santiago uan tokniuan”. Keman kijtoj nejin, kisak uan yajki okseko.
18 Keman tanesik, soldados peujkej yolpoliuij porin amo kimatiaj toni mochiujka iuan Pedro.
19 Herodes semi kitemojtinemik; sayoj ke kemej amo kiajsik, kintatsintokij tajpianij, uan tanauatij maj kintatsakuiltikan. Satepan, eujteuak Judea uan temok Cesarea uan mokauak seki tonalmej ompa.
20 Tekiuaj Herodes semi kualantoya iniuan* akin nemiaj Tiro uan Sidón. Sayoj ke kemej yejuan kikouayaj takual tein onkaya itech ialtepeuj Herodes, mosentilijkej para kiitatiuij. Yejuan kitataujtijkej Blasto, akin kiitaya nochi tein monekia ichan* tekiuaj, maj kintanojnochi para maj Herodes amo iniuan kualantook.
21 Keman ejkok tonal tein ixyetoya, Herodes motakentij ika tasal tein motaliliaj tekiuanij, motalij kampa motaliaj tamelauanij uan peuak kitemaka se tanojnots ininixpan nochin.
22 Uan akin ompa mosentilijkaj, peujkej tsajtsij: “¡Tajtojtok se dios, uan amo se takat!”.
23 Nimantsin iángel Jehová* kichiuak maj kokolispeuani, porin amo kiueyitalij Dios. Uan ijkochyouak uan momikilij.
24 Sayoj ke itajtol Jehová* kisentokak moteixmatiltij uan okachi miakej peujkej taneltokaj.
25 Uan keman Bernabé uan Saulo kitamitemakakej nochi tein tokniuan kititankaj ompa Jerusalén, mokepkej uan kiuikakej Juan, akin no kinotsayaj Marcos.
Tajtolmelaualismej
^ Oso “espada”.
^ Oso “amo kiposonaltiaj”, “amo kisoneuaj”.
^ Oso “tsikaujtoya”.
^ Oso “kitachialtij”, “kiixpetanij”.
^ Oso “Ximotajkoilpi”, “Ximotajkotsiko”.
^ Oso “kinteuisnekia”.
^ Itech griego, “kampa kochia”.
