Hechos 2:1-47
2 Keman mochiujtoya iluit tein monotsa Pentecostés, nochin senyetoyaj kalijtik.
2 Yejuan tokotsyetoyaj, uan sepasan mokakik ke chikauak takakistik ne iluikak, kemej keman chikauak taijkoyoka, uan takomonik kalijtik.
3 Uan kiitakej ke neskej kemej yeskia seki titsitsin* tein moxejxelojtiajkej, uan sejse tit* motalij inintech sejse.
4 Nochin kiselijkej ichikaualis Dios uan nochin peujkej tajtouaj itech tataman tajtolmej, ijkon kemej ichikaualis Dios kichiuaya maj tajtokan.
5 Itech nejon tonalmej, ompa Jerusalén yetoyaj judíos akin semi taneltokayaj akin kayomej itech nochin altepemej.
6 Yejua ika, keman takakistik, mosentilijkej miakej akin amo kimatiaj toni mochiujtoya porin sejse kikakia ke tajtojtoyaj itech inintajtol.
7 Tein melauj, senkis kimojkaitayaj uan kijtouayaj: “Xikinitakan nochin nejin akin tajtojtokej. Yejuan kayomej Galilea, ¿melauj?
8 Komo ijkon, ¿keniuj tisejsemej tikaktokej ke tajtouaj kemej tejuan?
9 Akin touan yetokej kayomej Partia, Media, Elam, Mesopotamia, Judea, Capadocia, Ponto uan tal tein poui Asia,
10 Frigia, Panfilia, Egipto uan talmej tein pouij Libia tein yetok Cirenejkopa, takalpanouanij akin ualeuaj Roma, judíos uan akin kiselijkej inintamachtilis judíos,
11 akin kayomej Creta uan Arabia, tinochin tikinkakij itech totajtol ke ika tajtouaj uejueyi taman tein Dios kichiua”.
12 Kemaj, nochin kimojkaitayaj uan amo kimatiaj toni mochiujtoya, uan moiluiayaj: “¿Toni kijtosneki nejin?”.
13 Sayoj ke oksekin kinkejkelouayaj uan kijtouayaj: “Uintitokej”.
14 Sayoj ke Pedro moketsak iniuan 11 tatitanilmej uan chikauak kijtoj: “Akin nanemij Judea uan Jerusalén, kuali xikakikan tein nikijtoua uan xikmatikan nejin.
15 Tein melauj, yejuan amo uintitokej kemej namejuan nankinemiliaj, porin yekin kemej chiknaui hora kualkan,*
16 ta mochiujtok tein kijtoj tanauatijkej* Joel:
17 ‘Dios kijtoua: “Uan itech tonalmej keman tatamitiya* nikinmakas* nochikaualis akin pouij itech nochi tataman xolalmej. Namookichpipiluan uan namosiuapipiluan kitematiltiskej tein nikiniluis, namotelpochuan kinitaltiskej seki taman uan akin xiuejkejya* takochitaskej,
18 uan hasta notakeualuan takamej uan siuamej nikinmakas* nochikaualis nejon tonalmej, uan yejuan kitematiltiskej tein nikiniluis.
19 Nikchiuas uejueyi taman tein se kimojkaita ne iluikak uan milagros itech taltikpak: onkas esti, tit* uan mixpokti.
20 Tonaltsin tileuis uan metsti mokepas esti achto ke ualas iueyi tonal Jehová,* tonal keman kinextis ke ueyichiujkej.
21 Uan akin kitataujtis Jehová* maj kipaleui uan kinotsas ika itokay, makisas”’.
22 ”Israelitas, xikakikan nejin: Kemej nankimatij, Jesús akin kayot Nazaret, Dios kiualtitanik. Uan itechkopa, namoixpan kichiuak milagros uan uejueyi taman tein se kimojkaita.
23 Nejin takat, akin kitemaktijkej ijkon kemej Dios kiixtalij uan kimatiaya achto ke panoskia, namejuan nankikoujpampilojkej keman nankitemaktijkej ininmako takamej akin amo yolkualmej* uan nankimiktijkej.
24 Sayoj ke Dios kichiuak maj oksepa nemi para maj mikilis amo kixijxiko, porin mikilis amo ueliskia kisentokas kipixtos.
25 Porin David ika tajtoj Cristo keman kijtoj: ‘Nochipa nikpia Jehová* noixpan, porin yejua yetok noyekmakopa para maj amo keman nion teyi nechteltekipacho.
26 Yejua ika niyolpakik uan nitajtoj ika miak pakilis. Nejua nitakuaujtamattinemis mouan,
27 porin amo tinechkauas itech Miketekoch,* nion tikauas maj uejueliui inakayo motekitikauj akin amo mitskaua.
28 Tinechixmatiltij ojmej tein teajxitiaj kampa se nemis. Tikchiuas maj semi niyolpaki moixpan’.
29 ”Nokniuan, maj ika namechyeknojnotsa touejkaujtat David, akin momikilij uan kitokkej, uan miketekoch kampa toktok yetok itech toueyi xolal.
30 Yejua katka tanauatijkej uan kimatia ke Dios moyektenkaujka iuan ke semej ikoneuan taixyekanaskia kemej tekiuaj,
31 yejua ika achto kimatik ke Cristo oksepa nemiskia uan ika tajtoj, uan kijtoj ke nion kisenkauaskiaj itech Miketekoch* nion uejueliuiskia inakayo.
32 Dios kichiuak maj oksepa nemi nejin Jesús, uan tinochin tikitakej nejon.
33 Yejua ika, kemej yejua yajki iluikak uan motalito iyekmakopa Dios uan toTajtsin kimakak ichikaualis tein motenkaujka ke kimakaskia, yejua kitemakak* tein namejuan nankiitaj uan nankikakij.
34 Porin David amo pankisak iluikak, sayoj ke yejua kijtoua: ‘Jehová* kiluij noTekotsin: “Ximotali noyekmakopa
35 hasta maj nikintali akin mitstauelitaj kemej mometstapech”’.
36 Yejua ika, maj nochin itech xolal Israel kiyekmatikan ke Dios kiixtalij kemej toTekotsin uan Cristo nejin Jesús akin namejuan nankikoujpampilojkej”.
37 Keman kikakkej nejin, semi moyolkokojkej uan kintajtanijkej* Pedro uan okseki tatitanilmej: “Nokniuan, ¿toni moneki tikchiuaskej?”.
38 Pedro kiniluij: “Ximoyolpatakan, uan nansejsemej ximoauikan itokaykopa Jesucristo para maj namechtapojpoluilikan namotajtakoluan uan Dios namechtayokolis ichikaualis.
39 Porin Dios motenkauak ke namechmakas ichikaualis namejuan uan namokoneuan, uan nochin akin uejka yetokej, nochin akin toDios Jehová* kinnotsas”.
40 Uan kisentokak kinnojnotsak uan kuali* kinixmatiltij itajtol Dios uan kinyolmajxitij: “Amo xipouikan iniuan nejin akin amo yolkualmej para amo nanixpoliuiskej”.
41 Yejua ika akin kiuelkakkej tein Pedro kijtojka, moauijkej. Nejon tonal kemej eyi mil no mochiujkej imomachtijkauan Jesús.
42 Uan kisentokakej kitemojkej momachtiskej tein tamachtiayaj tatitanilmej, mosentiliskej,* sentakuaskej uan kichiuaskej netataujtil.
43 Tein melauj, nochin peujkej kimojkatokaj Dios, uan tatitanilmej peujkej kichiuaj uejueyi taman tein se kimojkaita uan milagros.
44 Nochin akin peuayaj taneltokayaj senyetoyaj uan momamakayaj nochi tein kipiayaj,
45 uan kinamakayaj inintal uan tein kipiayaj, uan tomin tein kisentiliayaj kinmakayaj sejse ijkon kemej kinpolouaya.
46 Mojmostaj mosentiliayaj itech templo. Takuayaj itech tataman kalmej uan mouauantiaj* inintapalol ika miak pakilis uan ika nochi ininyolo,
47 kiueyitalijtiayaj Dios uan nochin kuali kinitayaj. Uan no, mojmostaj Jehová* kichiuaya maj momiakilikan taneltokanij akin momakixtiskiaj.
Tajtolmelaualismej
^ Oso “titsitsin kemej yeskia nenepilmej”.
^ Oso “tekol”.
^ Itech griego, “expatika hora”.
^ Xikonita tanauatijkej.
^ Oso “itamian tonalmej”.
^ Itech griego, “nikintoyauilis”.
^ Oso “tatajmejya”, “tatotsitsinya”.
^ Itech griego, “nikintoyauilis”.
^ Oso “tekol”.
^ Oso “akin amo kitakamatij tanauatil”.
^ Oso “Hades”, kampa moseuijtokej mikemej. Xikonita miketekoch.
^ Oso “Hades”, kampa moseuijtokej mikemej. Xikonita miketekoch.
^ Itech griego, “kitoyauak”.
^ Oso “kintajtoltijkej”.
^ Oso “ajsitok”.
^ Oso “momamakaskej tein kipiayaj”.
^ Oso “moyekoltiayaj”.
