Juan 12:1-50
12 Chikuasen tonal achto ke mochiuaskia iluit tein monotsa Pascua, Jesús ajsik Betania, kampa nemia Lázaro, akin Jesús kichiujka maj oksepa nemi.*
2 Uan kitakualchiuijkej ompa. Marta kintatekilijtoya uan Lázaro no takuajtoyaj iuan Jesús.
3 María kikuik kemej tajko litro aceite tein kualtsin ajuiyak uan semi patiyoj, tachijchiuj ika senkis nardo,* kimetstekilij Jesús uan kiuajuachilij ika itson. Uan itech nochi kali taajuiyayak.
4 Sayoj ke Judas Iscariote, semej imomachtijkauan Jesús akin yaya kitemaktitiya, kijtoj:
5 “¿Keyej amo tiknamakakej nejin aceite ika 300 denarios* uan tikinmakakej pobres nejon tomin?”.
6 Tein melauj, amo kijtoj nejon porin yekmelauj kinekia kinpaleuis pobres, ta porin tachtekia; kemej yejua kipiaya kaxontsin kampa kipantaliayaj tomin, kiichtekia tomin tein ompa kipantaliayaj.
7 Uan Jesús kijtoj: “Xikaua; maj kichiua nejin tein ipa mochiua, ijkon kemej kichiuaskej keman nechtokaskej.
8 Porin pobres nochipa namouan yetoskej, sayoj ke nejua amo nochipa namouan nietos”.
9 Nejon hora, tel miakej judíos kimatkej ke Jesús yetoya ompa Betania uan kiitakoj, uan amo sayoj yejua, ta no kiitakoj Lázaro, akin yejua kichiujka maj oksepa nemi.*
10 Uejueyi tiopixkamej axkan peujkej kiitaj keniuj no kimiktiskej Lázaro
11 porin keman miakej judíos ompa yayaj uan kiitayaj Lázaro, takuaujtamatiaj iuan Jesús.
12 Mostika, nochin akin iluitikoj kimatkej ke Jesús ejkotoyaya Jerusalén.
13 Yejua ika, kikuikej koujxiujmayit uan kinamikitoj, uan peujkej chikauak kijtouaj: “¡Timitstataujtiaj, xikmakixti! ¡Tatiochiual akin ualajtok itokaykopa Jehová,* Tekiuaj itech xolal Israel!”.
14 Keman Jesús kiajsik se burrito, ipanko motalij, ijkon kemej ijkuiliujtok:
15 “Amo ximoui ichpoch Sion. ¡Xikita! Ualajtok motekiuaj, tokotsyetiuits ipanko se burrito”.
16 Imomachtijkauan amo kiajsikamatiaj nejin. Sayoj ke, keman Jesús kiueyitalijkej, kielnamikkej ke nejin ipa ijkuiliujtoya ke kipanoskia uan ke yejua nejon tein kichiuilijkaj.
17 Uan akin kiitakej ke Jesús kiluij Lázaro maj ualkisani keman kichiuak maj oksepa nemi,* kitematiltijtiayaj nejon.
18 No yejua ika kinamikitoj, porin kitekakilijkaj ke kichiujka nejon milagro.
19 Yejua ika fariseos moiluijkej: “¿Nankiitakejya? Amo teyi ueli tikchiuaj. ¡Xikitakan keniuj nochin kitojtokaj!”.
20 Nejon tonal no yetoyaj seki griegos akin kiueyichiuakoj Dios itech iluit.
21 Yejuan kiajsitoj Felipe, akin katka kayot Betsaida tein poui Galilea, uan kiluijkej: “Tejuatsin, tiknekij tikitaskej Jesús”.
22 Felipe kiluito Andrés, uan Andrés uan Felipe kiluitoj Jesús.
23 Sayoj ke Jesús kinnankilij: “Ejkokya hora keman akin yolik kemej takat kiueyitalitij.
24 Yekmelauj namechyekiluia ke komo trigojtet amo uetsi talpan uan palani,* kisentoka sayoj se trigojtet. Sayoj ke komo palani, kitemaka miak takilot.
25 Akin okachi kitayekanaltia nemis,* mikis, sayoj ke akin axkan motemaka mikis,* makisas para nemis nochipaya.
26 Komo aksa* kineki nechtekitilis, maj nechtojtoka; uan kampa nejua nietos ompa no yetos notekitikauj. Komo aksa nechtekitilia, noTajtsin kitatiochiuis.
27 Axkan niyoltajyouijtok. Uan ¿toni ueliskia nikijtos? NoTajtsin, xinechmakixti itech nejin hora tein semi ouij. Sayoj ke yejua ika niejkok hasta nejin hora.
28 NoTajtsin, xikueyitali motokay”. Uan ne iluikak mokakik ke Dios kiualijtoj: “Nikueyitalijya uan oksepa nikueyitalis”.
29 Akin ompa yetoyaj kikakkej nejon, uan sekin peujkej kijtouaj ke tatikuinka. Oksekin kijtojkej: “Se ángel kinojnotsak”.
30 Uan Jesús kijtoj: “Nejin amo mokakik para maj nechpaleui nejua, ta para maj namechpaleui namejuan.
31 Axkan kiixtalijtokej tein kinnamiki kiseliskej akin nemij nikan taltikpak uan akin taixyekana nikan taltikpak kikalantamotaskej.
32 Sayoj ke nejua, keman nechajokuiskej,* nikchiuas maj nouan motokikan akin pouij itech nochi tataman xolalmej”.
33 Tein melauj, nejin kijtoj para kinextis keniuj yaya momikiliti.
34 Uan akin ompa yetoyaj kinankilijkej: “Tikmatij ke itech iTanauatil Moisés kijtoua ke Cristo nochipa nemis. ¿Keniuj tejua tikijtoua ke akin yolik kemej takat moneki kiajokuiskej? ¿Akoni nejon takat?”.
35 Yejua ika Jesús kiniluij: “Tanex yetos namouan se tepitsinok. Xinejnemikan keman nankipiaskej tanex, ijkon tayouayanilot amo namechxijxikos; akin nejnemi keman tayouayan amo kimati kani youi.
36 Keman nankipiaskej tanex, xitakuaujtamatikan itech tanex, ijkon nanemiskej kampa tatanestok”.
Keman kitamiijtoj nejin, Jesús yajki uan motatij.*
37 Maski kichiujka miak milagros ininixpan, amo itech takuaujtamatiaj,
38 para maj mochiuani nejin tein kijtoj tanauatijkej* Isaías: “Jehová,* ¿akoni takuaujtamati itech tein tikteixmatiltiaj? ¿Uan akoni kiixmatiltianij ichikaualis* Jehová?”.*
39 Isaías no kijtoj keyej amo ueliaj takuaujtamatiaj:
40 “Kichiuak maj amo tachiakan uan maj yoltakuaujkej, para maj amo tachiakan nion maj kiajsikamatikan toni moneki kichiuaskej nion maj mokepakan iuan Dios uan maj nejua nikinpajti”.
41 Isaías kijtoj nejin porin kiitak ke kipiaya ueyi tanauatil, uan ika tajtoj.
42 Maski ijkon, hasta miakej akin kinixyekanayaj judíos itech takuaujtamatkej, sayoj ke amo kijtouayaj senteixtenoj porin kinmouiliayaj fariseos, porin yejuan amo kinkauaskiajok maj mosentilikan kampa taueyichiuaj judíos.
43 Nejon taixyekananij okachi kinekiaj maj oksekin kinueyitalikan uan amo maj kinueyitali Dios.
44 Sayoj ke Jesús chikauak kijtoj: “Akin nouan takuaujtamati amo sayoj nouan takuaujtamati, ta no iuan akin nechualtitanik;
45 uan akin nechita nejua, no kiita akin nechualtitanik.
46 Niualaj nikan taltikpak kemej se tanex, ijkon akin nouan takuaujtamatis amo yetosok tayouayanijtik.
47 Sayoj ke, komo aksa kikaki tein nikijtoua uan amo kichiua, nejua amo nikixtalia maj kitatsakuiltikan; porin amo niualaj nikixtaliko maj kintatsakuiltikan akin nemij nikan taltikpak, ta nikinmakixtiko.
48 Akin nechixtopeua uan amo kineltoka tein nikijtoua, yetokya akin kiixtalis maj kitatsakuiltikan: tein nikijtoj, yejua tein kiixtalis maj kitatsakuiltikan keman ejkos tonal.
49 Porin amo nikijtouani tein nejua niknemilia, ta noTajtsin akin nechualtitanik nechnauatij tein moneki nikijtos uan tein moneki nitamachtis.
50 Uan nikmati ke se kitakamatis kichiua maj se nemi nochipaya. Yejua ika nochi tein nikijtoua, nikijtoua ijkon kemej noTajtsin nechiluij”.
Tajtolmelaualismej
^ Itech griego, “kiajokka”.
^ Itech griego, “kiajokka”.
^ Itech griego, “kiajokuik”.
^ Itech griego, “miki”.
^ Itech griego, “kitasojta inemilis”.
^ Itech griego, “kitauelita inemilis”.
^ Oso “akin”, “akaj”.
^ Nejin kijtosneki keman kimiktiskej itech kouit.
^ Oso “mocholtij”.
^ Xikonita tanauatijkej.
^ Itech griego, “imay”.
