Juan 5:1-47
5 Satepan ke mochiuak nejin, judíos kipiakej se iluit, uan Jesús pankisak Jerusalén.
2 Uan ompa Jerusalén, inakastan Ichkakalten, yetok se ueyi tanque tein itech tajtol hebreo monotsa Betzata, tein kiyoualojtokej kalikximej.
3 Ompa nakasikauetstoyaj miakej akin mokokouayaj, akin amo tachiayaj, metskoxojmej uan akin masepoujtoyaj oso metssepoujtoyaj.
4 *
5 Uan ompa yetoya se takat akin mokokouaya 38 xiujmejya.
6 Keman kiitak nejin takat ompa uetstoya uan kemej kimatik ke uejkaujya mokokouaya, Jesús kitajtanij:* “¿Tikuelitaskia tipajtis?”.
7 Takat akin mokokouaya kinankilij: “Tejuatsin, amo akin nechpaleuia maj nimopankalaki itech ueyi tanque keman at moolinia. Keman niouj nikalakiti, okse nechtani uan mopankalakia achto ke nejua”.
8 Jesús kiluij: “¡Ximoketsa! Xikajokui mopetauj* uan xinejnemi”.
9 Uan nejon takat nimantsin pajtik, kiajokuik ipetauj uan peuak nejnemi.
Nejon tonal katka tonal sábado keman moseuiayaj.*
10 Yejua ika judíos peujkej kiluiaj takat akin pajtikaya: “Axkan tonal keman se moseuia. Tanauatil kijtoua ke amo uelis tikmamas mopetauj”.
11 Sayoj ke yejua kinnankilij: “Takat akin nechpajtij nechiluij ‘Xikajokui mopetauj uan xinejnemi’”.
12 Yejuan kitajtanijkej: “¿Akoni mitsiluij ‘Xikajokui uan xinejnemi’?”.
13 Sayoj ke takat akin pajtikaya amo kimatia, porin ompa yetoyaj miakej uan Jesús yajkaya.
14 Satepan ke mochiuak nejin, Jesús kiajsik nejon takat itech templo uan kiluij: “Xikita, tipajtikya. Amo xitajtakook, amokan mitspanok teisa tein okachi amo kuali”.
15 Nejon takat yajki uan kiniluij judíos ke Jesús kipajtijka.
16 Yejua ika judíos kiixnamikiaj Jesús, porin kichiuaya nejin itech tonal sábado.
17 Sayoj ke yejua kinnankiliaya: “NoTajtsin tekititok hasta axkan, uan nejua no niksentoka nitekititok”.
18 Yejua ika judíos okachi kitemojtinenkej keniuj kimiktiskej, porin amo kichiuaya tein monekia itech tonal sábado, uan kinemiliayaj ke kinekia maj nochin kiitakan ke katka kemej Dios porin kiluiaya Dios “noTajtsin”.
19 Yejua ika, Jesús kiniluij: “Yekmelauj namechyekiluia ke iKoneuj Dios amo ueli kichiua nion se taman porin iselti ijkon kinemilia, sayoj kichiua tein kiita ke kichiua toTajtsin. Porin nochi tein kichiua toTajtsin, no ijkon kichiua iKoneuj.
20 Porin toTajtsin kitasojta iKoneuj uan kinextilia nochi tein yejua kichiua, uan kinextilis okachi uejueyi taman ke nejin para xikmojkaitakan.
21 Porin ijkon kemej toTajtsin kichiua maj oksepa nemikan* akin momikilijkejya, iKoneuj Dios no kichiua maj oksepa nemikan akin yejua kineki.
22 Porin toTajtsin amo kiixtalia tein kinamiki kiselis nion akin, ta kikauilij iKoneuj maj kichiua nochi nejon tekit,
23 para maj nochin kitakachiuakan* iKoneuj Dios ijkon kemej kitakachiuaj toTajtsin. Akin amo kitakachiua iKoneuj Dios, amo kitakachiua toTajtsin, akin kiualtitanik.
24 Yekmelauj namechyekiluia ke akin kikaki tein nikijtoua uan itech taneltoka akin nechualtitanik, nemis nochipaya uan amo kitatsakuiltiskej. Yeski kemej se akin momikilijkaya sayoj ke axkan oksepa yoltok.
25 ”Yekmelauj namechyekiluia ke ejkos hora, uan tein melauj ejkokya, keman mikemej kikakiskej itajtol iKoneuj Dios, uan akin kitakamatiskej, nemiskej.
26 Porin ijkon kemej toTajtsin kipia chikaualis para kichiuas maj oksekin nemikan, no kimakatok chikaualis iKoneuj para kichiuas maj oksekin nemikan.
27 Uan kimakak tanauatil para kiixtalis tein kinnamiki kiseliskej nochin, porin yejua akin yolik kemej takat.
28 Amo xikmojkaitakan nejin, porin ejkos hora keman nochin akin yetokej itech miketekochmej,* kikakiskej itajtol
29 uan ualkisaskej: akin kichiujkej tein kuali, nemiskej nochipaya, sayoj ke akin kichiujkej tein amo kuali, kiixtaliskej tein kinnamiki kiseliskej.
30 Noselti amo ueli teyi nikchiua. NoTajtsin nechiluia keniuj nikixtalis tein kinnamiki kiseliskej nochin, porin amo niktemoua nikchiuas tein nikneki, ta tein kineki akin nechualtitanik.
31 ”Komo sayoj noka nitajtojtinemiskia, oksekin amo kineltokaskiaj tein nikijtoua.*
32 Sayoj ke moajsi okse akin noka tajtoua, uan nikmati ke tein kijtoua melauak.
33 Namejuan nankintitankej takamej maj kiitatij Juan, uan yejua kiteixmatiltij tein melauak.
34 Amo moneki maj nion akin noka tajto, sayoj ke nikijtoua nejin para ximakisakan.
35 Nejon takat katka kemej se candil tein xotatoya uan tauiaya, uan namejuan seki tonalmej nankinekkej semi nanyolpakiskej ika itanex.
36 Juan kijtoj ke noTajtsin nechualtitanik. Sayoj ke nejua nikpia okse taman tein okachi kinextia ke noTajtsin nechualtitanik: nikchiujtok tein nechnauatij maj nikchiua.
37 Uan no, noTajtsin kijtouani ke yejua nechualtitanik. Namejuan amo keman nankitenkakinij nion nankiixitanij,
38 uan itajtol amo yetok itech namoyolo porin amo nankineltokiliaj akin yejua kiualtitanik.
39 ”Namejuan kuali namomachtiaj Tajkuilolamatsin porin nankinemiliaj ke namechpaleuis xinemikan nochipaya; uan yejua nejin Tajkuilolamatsin tein noka tajtoua.
40 Maski ijkon, namejuan amo nankinekij nanualaskej nouan para nanemiskej nochipaya.
41 Amo nikneki maj nechueyitalijtokan.
42 Sayoj ke, nikyekmati ke namejuan amo nankitasojtaj Dios.
43 Nejua niualaj itokaykopa noTajtsin uan namejuan amo notech nantaneltokaj. Sayoj ke komo okse ualaskia sayoj porin ijkon kinemilij, kemaj itech nantaneltokaskiaj.
44 ¿Keniuj nanechneltokilitij, ta namejuansan namoueueyitalijtokej uan amo nankitemouaj maj namechueyitali Dios akin sayoj setsin?
45 Amo xiknemilikan ke nejua namechteluiliti iixpan toTajtsin. Akin namechteluilia yejua Moisés, akin namejuan itech nantakuaujtamatij.
46 Tein melauj, komo nankineltokiliskiaj Moisés, no nanechneltokiliskiaj nejua, porin yejua kijkuiloj tein nikchiuaskia.
47 Sayoj ke, komo amo nankineltokaj tein kijkuiloj, ¿keniuj nankineltokatij tein nikijtoua?”.
Tajtolmelaualismej
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Oso “kitajtoltij”.
^ Oso “motapech”.
^ Itech griego, “moajokuikan”.
^ Oso “kipoujkaitakan”.
^ Nejin kijtosneki kampa moajsij mikemej uan akin Dios kinelnamiktok.
^ Oso “tein nikijtoua amo kualtiaskia”.
