Mateo 24:1-51
-
TEIN KINEXTIS KE CRISTO MOKEPAKYA (1-51)
24 Keman Jesús kistiaya den templo, imomachtijkauan kiajsitoj uan kinextilijkej templo uan ikalikxiuan.
2 Uan yejua kiniluij: “¿Nankiitaj nochi nejin? Namechyekiluia ke nikan nion se tet nepaniujtos iuan okse. Nochi tamixitinis”.
3 Keman tokotsyetoya itech Olivojtepet, imomachtijkauan kiajsitoj keman amo akaj kinkaktoya uan kitajtanijkej:* “Xitechilui, ¿kemanian panos nejon? ¿Toni kinextis ke timokepakya* uan ke tamitiya tein mochiujtok itech taltikpak?”.*
4 Jesús kinnankilij: “Ximoyekpiakan. Maj amo akin namechkajkayaua,
5 porin miakej ualaskej, kikuiskej notokay uan kijtoskej ‘Nejua niCristo’, uan kinkajkayauaskej miakej.
6 Nankikakiskej ke moteuijtokej uan nankimatiskej ke miakkan no moteuijtokej. Amo ximomoujtikan, porin nejin moneki mochiuas, sayoj ke ayamo tatamis.
7 ”Porin akin nemij itech seki xolalmej moteuiskej iniuan akin nemij itech okseki xolalmej uan akin nemij itech se altepet iniuan akin nemij itech okse altepet, uan miakkan onkas mayan uan talolinis.
8 Nochi nejin kinextis ke uejueyi tajyouilis* yekin peujtiuj.
9 ”Ijkuak, namechtajyouiltiskej uan namechmiktiskej, uan itech nochi xolalmej namechtauelitaskej porin nantakuaujtamatij itech notokay.
10 Uan miakej amo takuaujtamatiskejok, motemaktiskej se iuan okse, uan motauelitaskej se iuan okse.
11 Nesiskej miakej tanauatianij akin amo melaujkej uan kinkajkayauaskej miakej,
12 uan kemej okachi mochiuas tein amo kuali,* okachi miakej amo tetasojtaskejok.
13 Sayoj ke akin taxikos hasta keman tatamis, makisas.
14 Uan itech nochi taltikpak moteixmatiltis kuali tanauatilmej* tein ika tajtoua iTaixyekanalis Dios uan ijkon nochin uelis kikakiskej,* uan satepan tatamis.
15 ”Yejua ika, ijkon kemej Dios kijtoj itechkopa tanauatijkej* Daniel, nankiitaskej tein tetajyaltij uan tein taixpoloua ijkatok kampa iaxka Dios* (akin kiitstok* tein kijtoua nejin maj kuali kiajsikamati).
16 Keman moitas nejin, akin yetoskej Judea, maj cholokan itech tepemej.
17 Akin yetos kalkuako, maj amo pantemo takixtiti ikalijtik,
18 uan akin yetos italpan, maj amo mokepa kikuiti ipantaken.
19 ¡Teikneltijkej siuatsitsin akin kokoxkayetoskej oso tachichitijtoskej itech nejon tonalmej!
20 Miakpa ximotataujtikan para amo nancholoskej itech tonalmej keman taseseya oso itech tonal sábado keman moseuiaj.
21 Porin ijkuak, mochiuas se tetsaujkatajyouilis. Amo mochiuani se ijkon, desde keman peuak taltikpak* hasta axkan, uan amo keman oksepa mochiuas.
22 Tein melauj, komo nejon tonalmej uejkauaskiaj, amo akin makisaskia; sayoj ke para maj Dios kinpaleui akin kinijitak,* nejon tonalmej amo uejkauaskej.
23 ”Uan takan namechiluiaj ‘¡Xikitakan, nikan yetok Cristo!’ oso ‘¡Ne yetok!’, amo xikneltokakan.
24 Porin nesiskej cristos akin amo melaujkej uan tanauatianij akin amo melaujkej, uan kichiuaskej uejueyi milagros uan uejueyi taman tein se kimojkaita para kinkajkayauaskej, komo ueli, hasta akin Dios kinijitak.*
25 Xikelnamikikan ke namechnejmachtijya.
26 Yejua ika, takan namechiluiaj ‘¡Xikitakan, yetok ne taluakyan!’, amo xiakan; takan namechiluiaj ‘¡Xikitakan, yetok ne kalijtik!’, amo xikneltokakan.
27 Porin keman mokepasya* akin yolik kemej takat yeski kemej ijkuak tapetani itech nochi iluikak, uan moita desde kampa ualkisa tonaltsin hasta kampa pankalaki.
28 Kampa yetos miket, ompa mosentiliskej uejueyi totomej.*
29 ”Nimantsin de nejon ueyi tajyouilis itech nejon tonalmej, tonaltsin tileuis, metsti amo tauis, sitalimej ualpanuetsiskej uan tein onkak ne iluikak kitsetseloskej.
30 Uan nesis ne iluikak tein kinextis ke ualajtok akin yolik kemej takat uan nochin akin nemij itech taltikpak* semi tayokoyaskej.* Uan kiitaskej ualajtok itech mixti ne ejekaixko ika chikaualis uan ueyi kualtsinyot.
31 Chikauak mokakis trompeta uan kintitanis iangeluan uan yejuan kinsentiliskej taijitalmej* akin moajsiskej noyampa,* desde kampa peua iluikak hasta kampa tami.
32 ”Maj ika titajtokan se higojkouit. Nimantsin keman maselia uan maxiujyoua, namejuan nankimatij ke amo uejkaua tatakisya.*
33 No ijkon namejuan, keman nankiitaskej nochi nejin, xikmatikan ke yejua* amo uejka yetok, ejkotokya.*
34 Namechyekiluia ke akin nemij axkan amo mikiskej hasta maj mochiua nochi nejin.
35 Iluikak uan taltikpak ixpoliuiskej, sayoj ke notajtoluan amo keman ixpoliuiskej.
36 ”Nejon tonal uan hora amo akin kimati, nion ángeles akin nemij ne iluikak nion iKoneuj Dios; sayoj noTajtsin.
37 Porin ijkon kemej katka keman nemia Noé, no ijkon yeski keman mokepasya* akin yolik kemej takat.
38 Porin itech nejon tonalmej achto ke tetsaujkakiouiskia miakej tatakuajtoyaj uan tatayitoyaj, takamej uan siuamej monamiktijtoyaj... hasta tonal keman Noé kalakik itech arca;
39 uan amo takakkej hasta ke tetsaujkakiouik uan kintamiuikak at. Ijkon yeski keman mokepasya* akin yolik kemej takat.
40 Ijkuak, ome takamej yetoskej kampa tatokaj: se kiuikaskej uan okse kikaujteuaskej.
41 Ome siuamej tistoskej ika metat: se kiuikaskej uan okse kikaujteuaskej.
42 Yejua ika nochipa xitachixtokan, porin amo nankimatij toni tonal ualas namoTekotsin.
43 ”Xikmatikan se taman: komo akin iaxka se kali kimatiskia toni hora youak ualaskia tachtekkej, ijsatoskia* uan amo kikauaskia maj kalaki ichan.
44 Yejua ika namejuan no xitachixtokan, porin akin yolik kemej takat ualas itech se hora keman amo nankinemiliaj.
45 ”¿Akoni yekmelauj takeual takuaujtamach uan tamatkej, akin iteko kiixtalij maj kinixyekana uan maj kintamaka keman moneki akin tekitij kalijtik?
46 ¡Yolpakis nejon takeual komo iteko kiajsiki kichiujtok nejon!
47 Namechyekiluia ke kiixtalis maj kiixyekana nochi tein iaxka.
48 ”Sayoj ke, komo se tonal nejon takeual kichiua tein amo kuali uan peua moyoliluia ‘Noteko uejkaujtok’
49 uan peua kinteuia itakeualikniuan uan peua takua uan tayi iniuan akin nochipa tauantokej,
50 iteko nejon takeual ualas se tonal keman amo kichia uan itech se hora tein amo kimati,
51 uan semi chikauak kitatsakuiltis uan kikauatiuj iniuan taixkajkayauanij. Ompa ne chokatos uan tananatskatos.
Tajtolmelaualismej
^ Oso “kitajtoltijkej”.
^ Tajtol griego, parousía. Xikonita keman Cristo mokepasya.
^ Xikonita tonalmej; tein mochiujtok.
^ Nejin tajyouilis tamati kemej tein kimachilia se siuatsin keman yolitiya ikonetsin.
^ Itech griego, “kitapanauiliskej tanauatil”, tein kijtosneki ke kiixtopeuaskej itanauatiluan Dios.
^ Oso “tajtolmej”.
^ Oso “akin yeski uelis kikakis”.
^ Xikonita tanauatijkej.
^ Oso “kampa taueyichiuaj”.
^ Nejin kijtosneki akin kiixtajtoltia (kileroua) tein achto kijtojka Daniel.
^ Oso “nemij takamej uan siuamej”.
^ Oso “kinixpejpenak”.
^ Oso “kinixpejpenak”.
^ Itech griego, parousía. Xikonita keman Cristo mokepasya.
^ Oso “águilas”.
^ Itech griego, “uejueyi kalyetonij”.
^ Oso “moyolixkojkomoniskej porin tayokoyaskej”.
^ Oso “taixpejpenalmej”.
^ Oso “naujkan itech taltikpak”.
^ Oso “takauaniti (tapatsmikiti)”.
^ Nejin kijtosneki akin yolik kemej takat.
^ Oso “yetokya kaltenoj”.
^ Tajtol griego, parousía. Xikonita keman Cristo mokepasya.
^ Tajtol griego, parousía. Xikonita keman Cristo mokepasya.
^ Oso “tachixtoskia”, “ixpetantoskia”.
