Jesucristo kiniluij imomachtijkauan: “Xikintanextilikan nijin taltikpakuani ika namochipaukanemilis. Uan kuak yejuan kitaske ya den namokualitachiualisuan; ijkuakon yejuan no kimouistiliske Namoueyitajtsin ten yetika ne eluiyaktsinko” (Mateo 5:16). Yejua ika, kuali tiktekitiltiaj tein kichijchiuaj tamatinij, kemej Internet. Uan itech jw.org/ncj ompa sayoj moteixmatiltia tein kineltokaj uan tein kichiuaj itaixpantijkauan Jiova. ¿Toni kipia?

Monankiliaj ika Biblia netajtanilmej tein okachi mochiuaj. Uelis tikonajsis itanankililuan netajtanilmej tein okachi motelnekij tein motajtanianij taltikpakneminij. Kemej neskayot, tratados ¿Ejkos tonal keman tamis tajyouilis? uan ¿Uelis oksepa nemiskej akin momikilijkejya? uelis tikontemouis itech Internet kampa timoteixmatiltiaj uan itech panoua seiscientos tataman tajtolmej. No uelis tikonajsis Traducción del Nuevo Mundo itech panoua ciento treinta tataman tajtolmej; miak nepaleuilmej tein ika uelis timomachtiskej Biblia, kemej amaix ¿Toni yekmelauj tamachtia Biblia?, uan amaixmej Tanejmachtijkej uan ¡Despertad! tein yankuixtok kiskej. Miak amaixmej ueli se kiixtajtoltia oso se kikaki itech Internet, oso no ueli se kitemoltia tein satepan uelis se kikakis, uan no itech MP3, PDF oso EPUB. Komo tikonneki, uelis tikonkixtis itech amat seki páginas uan tikonnextilis aksa akin kineki kimatis okachi itech itajtol. No moajsij ika video itech miak tataman tajtolmej ika señas, uan ueli se kitemoltia taixtajtoltilis kampa mokaki kemej yeskia monojnotsaj taltikpakneminij, tamouisolmej tein mokixtiaj itech Biblia uan kualtsitsin nekuikatilmej tein uelis tikakiskej keman tiueliskej.

Moteixmatiltia tein kichiuaj itaixpantijkauan Jiova. Ompa moajsij yankuik tanauatilmej uan seki video tein ika tajtoua tekit tein tikchiuaj semanauak taltikpak, tekimej tein ika tikinpaleuiaj taltikpakneminij keman mochiua se tetsauit uan tein panoua uan kinpaleuia oso kinijtakoua itaixpantijkauan Jiova. Uan no, moijtoua katiyejua uejueyi nechikolmej amo uejkaua mochiuaskej uan kemanian, uan no keniuj uelis titanotsaskej itech tataman kalmej Betel.

Ika nochi nejin, tikchiuaj tamachtilis tein melauak tein moneskayotia kemej tanex maj taui itech nochi taltikpak, hasta kampa okachi uejka uan ijkon nochin taltikpakneminij kiseliskej nepaleuil, kemej itech Antártida kampa tel taseseya uan tel uejka moajsi. Tikchiuaj netataujtil uan ijkon maj “moijsiukamoyaua in Tajtoltsin de Totekotsin” noyampa taltikpak uan ika nejon maj moueyitali yejuatsin (2 Tesalonicenses 3:1).

• ¿Keniuj tapaleuia jw.org/ncj maj okachi miakej taltikpakneminij kiixmatikan tein tamachtia Biblia?

• ¿Toni tikonuelitaskia tikontemos kampa timoteixmatiltiaj itech Internet?