Sekin kinchikoitaj oksekin porin tataman ininaltepeuj, taman kemej ixtamatij, okse ininxolal, taman kemej tajtouaj, okse inintaneltokalis, porin takat oso siuat uan no kiitaj ox kipiaj tomin oso amo. Miakej kinijijtouaj oksekin porin xiujmej tein kipiaj, amo semi momachtijkej, mokokouaj oso taman kemej moitaj. Sayoj ke kinemiliaj ke amo techikoitaj.

¿Xa no tiontechikoita maski amo tikonmati? Niman tikmatij keman oksekin techikoitaj, sayoj ke ouij techkisa tikmatiskej ke no tikchiuaj. Tinochin kemansa titechikoitaj. Sociólogo David Williams kijtoua ke komo sekin amo kuali kinitaj oksekin, keman moajsiskej iniuan semej, “amo kuali kiseliskej maski amo kimatiskej”.

Maj ika titajtokan se takat akin monotsa Yovitsa, yejua nemi itech se altepet ompa Europa. Ompa moajsi se xolal kampa amo miakej nemij. Yejua kijtoua: “Niknemiliaya ke akin ompa nemiaj amo yolkualmej katkaj. Amo nikmatia ke nitechikoitaya. Nimoyoliluiaya: ‘Amo nimopolojtok ta melauak tein niknemilia’”.

Miakej tekiuanij tanauatiaj maj amo techikoitakanok. Sayoj ke, amo ueli kiyektaliaj nejon kuejmol. ¿Keyej? Porin sayoj kinnauatiaj maj kichiuakan uan amo porin kimachiliaj nion kinemiliaj, uan keman se techikoita peua itech totanemilil uan toyolijtik. Sayoj ke, ¿keniuj amo titechikoitaskejok?