Komo amo timouikaj iniuan akin amo tikinyekitaj, uelis okachi titechikoitaskej. Uan komo sayoj timouikaj iniuan akin tanemiliaj kemej tejuan, ueliskia tiknemiliskej ke tein tiknemiliaj, tein tikmachiliaj uan tein tikchiuaj sayoj yejua tein kuali.

“Xitechnextilikan ke nantechueyiyoltasojtaj” (2 CORINTIOS 6:13).

¿Toni kijtosneki? Tajtol yolo kijtosneki tein tikmachiliaj uan tein tiknemiliaj. Komo sayoj timouikaj iniuan akin tanemiliaj kemej tejuan, amo tiknextijtoskiaj ke titetasojtaj. Techpaleuis maj amo ijkon techpano, komo kuali timouikaj iniuan akin taman tanemiliaj.

Keman kuali tikinixmatij oksekin tikajsikamatij keyej no taman kichiuaj teisa, uan no, keman timosentiliaj iniuan okachi tikinpatiuitaj. Hasta no tikmachiliaj tein kimachiliaj, ijkuak yolpakij oso tayokoyaj.

Maj tikitakan tein kipanok Nazaré, monekik amo kinchikoitasok akin kayomej itech okse altepet. Yejua kijtoua: “Miak taman tiksenchiuayaj uan tisentekitiaj. Kemej kuali nikinixmatik, nikitak ke amo ijkon kemej nechiluiayaj, keman kuali tionmouika iniuan akin taman kemej nemij, amo tikonita ininnepololuan ta tikontasojta uan tikonpatiuita”.

Xionmochikaua tiontajtos iniuan akin kayomej itech okseki altepemej, akin taman kemej moitaj oso taman kemej tajtouaj. Xikonchiua nejin:

• Xikonilui maj mitsoniluikan tein kichiuaj.

• Xikonyoleua maj mouan takuakan.

• Xikonkaki tein kinpanouani uan xionmochikaua tikonmatis tein kiitaj ke moneki.

Komo kuali tikonkaki, okachi kuali tikonajsikamatis uan mopatas kemej tikonita.