Niyolik itech xolal Mulhouse, tein poui itech ueyi altepet Francia uan nimoskaltij kampa nemiaj tekitinij uan ompa semi onkaya tateuilis. Tein nikelnamiki keman katka ninojnel yejua keniuj moteuiayaj kalyetouanij. Itech nokalyetouanij, takamej amo kuali kinitayaj siuamej uan amo semi kipoujkaitayaj tein kinemiliayaj. Nechiluiayaj ke siuat monekia yetos kampa takualchiuaj uan ke monekia kiyekpias itakauj uan ikoneuan.

Nikpanok tein semi ouij keman nimoskaltij. Keman nikpiaya majtakti xiuit, nopopaj momikilij porin tel tauanaya. Makuil xiuit satepan, semej nokniuan akin tayekanaya momiktij uan nikitak keniuj kimiktijkej aksa keman sekin kalyetouanij moteuijtoyaj, nejon nechtelmoujtij. Seki nochankauan nechmachtijkej maj nikui navaja uan pistola uan maj nitateui nochipa keman monekiskia. Nochipa nitaixnamikia, nimotalilij tatuaje itech nochi nonakayo uan niteltauanaya.

Keman nikpiaya 16 xiujmej niktamiaya kemej 10 hasta 15 cervezas itech se tonal uan peuak nikui droga. Niknamakaya tepos uijuisol uan nitachtekia uan ijkon uelia nikixtauaya nochi nejon. Ijkuak sayoj nikpiaya 17 xiujmej, nechtsakuakajya itech cárcel. Sennochia, dieciochojpa nechtatsakuiltijkej tekiuanij porin nitachtekik uan nitateuij.

Keman nikpiaya 20 xiujmej, okachi nikchiuak tein amo kuali. Mojmostaj nikchichinaya hasta 20 cigarros tein kipiaya marihuana uan nikuia heroína uan okseki taman drogas. Miakpa yaya nimomikilitiya porin niktelkuia drogas. Niknamakaya droga uan nochipa nikuikatinemia pistola. Se tonal nikmotak se takat; sayoj ke bala motsakuilij itech tepos tein kipiaya icinturón. Keman nikpiaya 24 xiujmej nomomaj momikilij uan peuak okachi nitateuia. Akin nechitayaj nechmouiliayaj uan kipanauiayaj ojti. Miakpa, itamian semana nechtsakuayaj satepan ke nimoteuiaya oso nechuikayaj kaltapajtiloyan maj nechijtsomakan kampa nechkojkokojkaj.

Keman nikpiaya 28 xiujmej nimonamiktij uan amo nikpoujkaitaya nonamik. Niktsajsiliaya uan nikmaaya. Amo niyetoya iuan; niknemiliaya ke sayoj monekia nikmakas tein patiyoj tein nikichtekia. Sayoj ke panok se taman tein amo nikchiaya: yejua peuak momachtia Biblia iniuan itaixpantijkauan Jiova. Satepan keman yekinika kimachtijkej, kikauak tachichinalis, amo kinekik tomin tein nikichtekia uan nechkepilij nochi tein patiyoj tein nikmakaka. Nikiluij maj  amo kisentokaok momachti Biblia. Nitelkualantoya; nikixpichiliaya pokti tein nikchichinaya uan nikpinaujtiaya ininixpan akin nemiaj ompakauin.

Se youak, keman niteluintitoya, niktikuiltij kali kampa tinemiaj. Nonamik nechmakixtij nejua uan tokonetsin akin kipiaya makuil xiuit. Keman niixpetanik semi amo kuali nimomachilij. Senkis niknemiliaya ke Dios amo keman nechtapojpoluiskia. Nikelnamikik ke se tiopixkat kijtojka ke akin amo yolkualmej youij miktan. Hasta akin nechpajtiaya tein moixmati kemej psiquiatra nechiluij: “Amo keman timopatas. Amo akin uelis mitspaleuis”.

Satepan keman chichinauik tochan, timokaltalitoj iniuan nomontatuan. Itaixpantijkauan Jiova kiitakoj nonamik uan nikintajtanij ox Dios nechtapojpoluiskia. Kitapojkej Biblia uan nechixtajtoltilijkej 1 Corintios 6:9-11. Ompa kijtoua tachiualismej tein Dios amo kiuelita, sayoj ke no kijtoua: “Nansekimej ijkon nankichiujtinemiaj”. Nejon tajtolmej nechajsikamatiltijkej ke ueliskia nimopatas. Itaixpantijkauan Jiova nechixtajtoltilijkej 1 Juan 4:8 uan ika nechnextilijkej ke Dios nechtasojta. Nejon semi nechyolchikauak, uan nikiniluij maj nechmachtianij ika Biblia ojpa semana uan peuak niyouj nechikolmej kampa kichiuaj kemej Cristo. Nochipa niktataujtiaya Jiova.

Itech sayoj se metsti, nikixtalij nikauas drogas uan tauanalis. Sayoj ke, kemej nonakayo kisentokaya nechtajtaniaya, peuak nikmachilia miak taman, nechtelkokouaya notsontekon, noijtik uan nikpiaya calambres uan nikochitaya tein tel amo kuali. Sayoj ke, nikmachiliaya ke Jiova nechpaleuijtoya uan nechyolchikaujtoya. Nechpanouaya ijkon kemej Pablo, se itekitikauj Dios, yejua kijtoj keniuj yejuatsin kipaleuij: “Itech nochi taman nikpia chikaualis itechkopa akin nechmaka chikaualis” (Filipenses 4:13, TNM). Satepan, no uelik nikauak tachichinalis (2 Corintios 7:1).

Biblia nechpaleuij maj nikyektali nonemilis uan maj kuali timouikakan kemej kalyetouanij. Peuak nikpoujkaita nonamik, niknojnotsa ika netasojtalis uan niktasojkamatilia tein kichiua. No peuak okachi nipanoua tiempo iuan nosiuapiltsin. Se xiuit satepan ke nimomachtijtoya Biblia, nikchiuak kemej nonamik: nikixtalij nimochiuas itaixpantijkauj Jiova uan nimoauij.

Senkis nikneltoka ke Biblia nechmakixtij. Hasta nochankauan akin amo itaixpantijkauan Jiova kijtouaj ke komo amo nimopataskia, xa nimomikiliskia itech se neteuilis oso porin nikuia miak drogas.

Tonemilis kemej kalyetouanij senkis mopatak keman peuak nikchiua tein kinamiki kichiuas se tetakauj uan se tepopaj ijkon kemej tamachtia Biblia (Efesios 5:25; 6:4). Peuak tiksenchiuaj seki taman. Amo niktemouaok maj nonamik nochipa yeto kampa takualchiuaj; ta panoua miak tonalmej kiteixmatiltia tein kijtoua Biblia uan niyolpaki nikpaleuis. Uan yejua nechpaleuia maj kuali nikixyekana nechikol kampa kichiuaj kemej Cristo.

Netasojtalis uan teiknelilis tein Dios nechnextiliani senkis kipatani nonemilis. Nikmati ke akin yeski uelis kichipauas inemilis uan yolpakis ika inepaleuil Biblia. Yejua ika, nikneki ika nochi noyolo nikinixmatiltis akoni Jiova akin moitaj ke amo keman mopataskej porin nejua no ijkon nimoitaya. Biblia nechmachtiani maj nikinpoujkaita nochin, yeskij takamej oso siuamej, sayoj ke no nechmachtij maj nikpoujkaita nonemilis.