Tepitsin taman tein kinpanok Nicolas uan isiuatsin Céline, porin sucursal de Francia kiniluij maj tapaleuitij itech okse nechikol. Yejuan kijtouaj keniuj kinouijmakak mopataskej: “Yekinika semi tiyolpakkej, sayoj ke satepan okachi ouij katka porin tikintemouayaj totasojikniuan. Kemej yekin tikinixmattiayaj tokniuan, amo miakej iniuan timouikayaj”. a Komo no ijkon mitsonpanoua, ¿toni uelis mitsonpaleuis xionmomati? ¿Keniuj uelis mitsonpaleuiskej oksekin tokniuan? ¿Keniuj uelis mitsonyolchikauaskej uan no tikonyolchikauas oksekin kampa tionmopatak?

NAUI TAMAN TEIN BIBLIA KIJTOUA UELIS MITSONPALEUIS

1. Xiontakuaujtamati iuan Jehová (Sal. 37:5). Kazumi akin kayot Japón, 20 xiujmejya tapaleuijtoya itech se nechikol, sayoj ke monekik yas nemitiuj okseko porin itakatsin kititankej maj okseko tekititi. ¿Toni kichiuak para maj ‘Jehová kiixyekana’? Yejua kijtoua: “Miakpa niktataujtij Jehová, nikiluij ke nimomachiliaya noselti, nimouia uan semi nimotekipachouaya. Uan yejuatsin nochipa nechpaleuij maj nimoyolchikaua”.

¿Toni mitsonpaleuis okachi xiontakuaujtamati iuan Jehová? Ijkon kemej se planta kineki at uan okseki taman tein kipaleuis maj moskalti, tejuan no moneki tikchiuaskej seki taman para okachi titakuaujtamatiskej. Nicolas, akin achto ika titajtojkej, tanemilij itech tein kichiujkej Abrahán, Jesús uan Pablo, yejuan kichiujkej miak taman para kiyolpaktiskej Dios, nejon kipaleuij maj kineltoka ke Jehová no kipaleuiskia. Komo mojmostaj timomachtiaj Biblia, amo sayoj techpaleuis keman okseko  tinemitiuij, ta no timomachtiskej keniuj uelis tikinyolchikauaskej tokniuan itech yankuik nechikol.

2. Amo xikonita tein kichiuayaj itech okse nechikol uan tein kichiuaj kampa tionmopatak (Ecl. 7:10). Se tokniuj takat akin monotsa Jules, kijtoua ke keman kisak de Benín uan yajki Estados Unidos, monekik momatis kemej ompa nemiaj, yejua kijtoua: “Nikmachiliaya ke monekia nikintapouis tein nikchiuaya uan tein nechpanoka nochin akin nikinixmatia”. Kemej amo momattoya kichiuas nejon, amo kuali momachiliaya uan peuak amo iniuan mouikaok tokniuan. Sayoj ke keman okachi kinixmatik kipatak tein kinemiliaya, yejua kijtoua: “Nikitani ke amo semi titatamamej, sayoj taman tein tikijtouaj uan tein tikchiuaj. Uan moneki maj tikauakan maj kichiuakan tein momattokej kichiuaskej”. Yejua ika amo xikonita tein kichiuayaj itech okse nechikol uan tein kichiuaj itech nechikol kampa tionyetok. Se precursora akin monotsa Anne-Lise, kijtoj: “Amo ninemiti okseko para nikajsis tein okseko nikaujteuj, ta para nikixmatis okseki taman”.

Tayekananij amo no moneki kiitaskej tein kichiuayaj itech okse nechikol uan tein kichiuaj kampa ajsikej. Xa seki taman amo kichiuaj kemej kampa yetoyaj, sayoj ke nejon amo kijtosneki ke amo kuali yetok. Okachi kuali maj kimatikan keyej kichiuaj seki taman achto ke kijtoskej tein kinemiliaj (Ecl. 3:1, 7b). Okachi tapaleuis komo tokniuan kiitaj tein kuali tein kichiuaj tayekananij uan amo tein kijtouaj (2 Cor. 1:24).

3. Xikontekitili Jehová iniuan tokniuan (Filip. 1:27). Keman se mokalpata moneki tiempo uan tesioujtij, sayoj ke niman keman tionajsis, xionmonechiko iniuan tokniuan itech Kali kampa tiMosentiliaj. Tokniuan moneki miakpa mitsonitaskej para uelis mitsonixmatiskej uan ijkon mitsonpaleuiskej. Lucinda kijtoua tein yejua uan ome isiuapipiluan kichiujkej keman yajkej nemitoj itech se ueyi xolal ompa Sudáfrica: “Nechyolmajxitijkej maj nitapaleui itech nechikol, maj nitanojnotsa iniuan tataman tokniuan uan maj nitanankili itech nechikolmej, uan ijkon nikchiuak. No tikiniluijkej tokniuan ke uelis mosentiliskej tochan para yaskej tanojnotsatiuij”.

Komo tiontekiti iniuan tokniuan itech nechikol kampa tionmopatak, ‘nansentekititoskej para nantakuaujtamatiskej itech kuali tanauatilmej’. Tayekananij kiluijkej Anne-Lise, akin achto ika titajtojkej, maj tanojnotsani iniuan nochin tokniuan. Yejua kijtoua: “Niman nikitak ke se kichiuas nejin, tepaleuia maj okachi se kinixmati tokniuan”. Komo tiontapaleuia keman mochipaua oso moyektalia Kali kampa tiMosentiliaj, oksekin kiitaskej ke tikonmachilia ke tionyetokya itech monechikol. Keman tionmochikauas okachi tikonixmatis tokniuan, niman kuali mitsonseliskej uan tionyolpakis keman iniuan tionyetos.

4. Xikontemo tikonpias oksekin motasojikniuan (2 Cor. 6:11-13). Komo oksekin kiitaj  ke ininka tionmotekipachoua okachi niman kinekiskej kuali mouan mouikaskej. Yejua ika, achto ke peuas uan keman tamis nechikol xikonnojnotsa tokniuan uan xikinixmati. Xionmochikaua amo tikonelkauas inintokay. Komo tiontetasojta uan kuali tikinnojnotsa, uan tikonelnamiki inintokay, kiuelitaskej mouan yetoskej uan kinekiskej kuali mouan mouikaskej.

Amo xionmopata sayoj porin tikonneki maj oksekin kuali mitsonitakan, ta xikonchiua uan xikonijto tein ipa tionmomattok. Xikonchiua ijkon kemej Lucinda, yejua kijtoua: “Tikinyoleuayaj tokniuan maj yakan tochan, yejua ika tel kualtsin iniuan timouikaj”.

“KUALI XIMOSELIKAN SE IUAN OKSE”

Seki tokniuan mouij kalakiskej itech Kali kampa tiMosentiliaj komo amo akin kiixmatij. Yejua ika komo aksa ajsi itech monechikol, ¿keniuj uelis tikonpaleuis? Tatitanil Pablo kijtoj: “Kuali ximoselikan se iuan okse, ijkon kemej Cristo no kuali namechselij namejuan” (Rom. 15:7). Tayekananij uelis kichiuaskej kemej Cristo uan kinpaleuiskej maj kuali momachilikan akin yekin ajsij itech nechikol (xikonita recuadro “ Tein moneki mochiuas keman aksa mopata de nechikol”). Nochin tokniuan, hasta konemej uelis tapaleuiskej maj kuali momachilikan akin yekin mopatakej de nechikol.

Para kuali tikinseliskej akin yekin ejkokej itech nechikol uelis tikinyoleuaskej tochan uan tikiniluiskej ke uelis tikinpaleuiskej komo teisa moneki. Se tokniuj siuat kixeloj tiempo para kiuikas okse tokniuj siuat akin yekin ajsika itech inechikol maj kiixmati xolal uan kimelauilij kani kikuis autobús. Tokniuj semi kitasojkamatik nejon uan semi kipaleuij.

SE TAMAN TEIN MITSONPALEUIS OKACHI XIKONTEKITILI JEHOVÁ

Komo tionmopatak itech okse nechikol xa tionmoui uan tionmotekipachoua. Sayoj ke xikonnemili nejin: se tototsin tein yekin momachtijtok patanis xa amo uejka ajsis porin ixmojmouiok, sayoj ke komo kisentoka momamachtia,  satepan okachi uejka uelis yas. No ijkon, keman tionmopatas itech okse nechikol, amo xionmoui para uelis tikontekitilis Jehová. Nicolas uan Céline kijtouaj: “Se momachtia miak taman keman se mokalpata. Tejuan semi techpaleuij maj tiknextikan seki taman tein kuali porin timomachtijkej tikchiuaskej seki taman uan tikinixmatkej oksekin”. Jean-Charles, akin achto ika titajtojkej, kijtoua keniuj kinpaleuij ichankauan keman mokalpatakej, yejua kijtoua: “Timopataskej itech okse nechikol kinpaleuij tokoneuan maj kinekikan kitekitiliskej Jehová. Amo uejkauak, tosiuapil peuak panoua taixpan itech nechikol tein mochiua itajkotian semana, uan tookichpil peuak tanojnotsa iniuan tokniuan”.

¿Uan toni uelis tikonchiuas komo amo ueli tiontapaleuiti kampa okachi moneki? Komo tikonchiua itech monechikol tein tayolmajxitia nejin tamachtilis, tokniuan kimachiliskej kemej yeskia yekin ompa tionajsik. Xiontakuaujtamati iuan Jehová uan xiontanojnotsa iniuan tokniuan, xikonixmati oksekin tokniuan uan okachi kuali xionmouika iniuan akin ipa tikonixmatia. No uelis tikonpaleuis akin yekin ejkokej itech nechikol oso akin moneki maj kinpaleuikan. Komo tikonchiua nejin, okachi tionmotokis iuan Jehová porin keman timotasojtaj tiknextiaj ke yekmelauj tikchiuaj kemej Cristo (Juan 13:35). Uelis tikonyekmatis ke “nejin semi kiyolpaktia Dios” (Heb. 13:16).

Maski ouij kinkisani miakej tokniuan, ueli momatij uan yolpakij itech yankuik nechikol kampa ajsij. ¡Uan tejuatsin no uelis ijkon tikonchiuas! Anne-Lise kijtoua: “Keman nimopatak itech okse nechikol nechpaleuij maj okachi nikinixmati tokniuan”. Kazumi kijtoua ke “keman se nemiti okseko okachi ueli se kiita keniuj Jehová tepaleuia”. ¿Uan keniuj momachilia Jules? Yejua kijtoua: “Okachi miakej iniuan nimouika, uan semi niyolpaki. Kuali nimomachilia itech nechikol kampa niajsik uan amo niknekiskia nimopatas”.