Tisejsemej moneki tikixtaliskej toni tikchiuaskej
Tein ika timoixyekanaskej itech tonemilis techpaleuis maj tiyolpakikan oso amo. Jehová kimati nejon, uan yejua ika kineki maj timoixyekanakan ika itanauatiluan.
Jehová kineki maj tiyolseujkanemikan uan maj tiyolpakikan.
“Nejua, Jehová, nimoDios, akin mitsmachtia para kuali tietos, akin mitsixyekana itech ojti kampa moneki tinejnemis. Nikuelitaskia, xiktakamati notanauatiluan. Komo kemaj tiktakamati, tiyolseujtos uan amo tamis ijkon kemej se río, uan tikchiujtos tein kuali yetok tein yeski kemej olas itech ueyiat” (Isaías 48:17, 18).
Itech tonemilis uelis tikixtaliskej tikchiuaskej miak taman, sayoj ke kemej Jehová toTachijchiujkauj yejuatsin kimati keniuj okachi kuali tinemiskej. Yejuatsin kineki maj timoixyekanakan ika tein techyolmajxitia, porin kimati ke yejua tein okachi uelis techpaleuis. Komo tiktakamatij itanauatiluan Dios kuali techyas, porin nochipa tikixtaliskej tikchiuaskej tein kuali yetok uan ijkon tiyolseujkanemiskej uan tiyolpakiskej.
Jehová amo techtajtania maj tikchiuakan tein amo ueli tikchiuaj.
“Nejin tanauatilmej tein axkan nimitsmakatok, amo tel ouij para tikinajsikamatis uan amo no tel ouij tikintakamatis” (Deuteronomio 30:11).
Xa moneki tikpataskej kemej titanemiliaj uan tein tikchiuaj para tinemiskej ijkon kemej Dios techyolmajxitia. Sayoj ke Jehová amo techtajtania miak taman, porin kemej yejuatsin techchijchiuak kimati ke amo nochi ueli tikchiuaj. Ijkon kemej okachi kuali tikixmatiskej tikitaskej ke amo ouij se kitakamatis itanauatiluan (1 Juan 5:3).
Jehová motenkaua ke kinpaleuis akin kiixtaliaj kitakamatiskej itanauatiluan.
“Nejua, Jehová moDios, nikitskijtok moyekmay, akin mitsiluia: ‘Amo ximoui. Nejua nimitspaleuis’” (Isaías 41:13).
Uelis tinemiskej ijkon kemej Dios technauatia porin yejuatsin techpaleuia. Ika Biblia, yejuatsin techpaleuia, techyolchikaua uan kichiua maj tikchiakan tein kuali.
Itech nochi taltikpak tel miakej kiitanij keniuj tein tayolmajxitia Biblia kinpaleuiani maj okachi kuali nemikan. ¿Tikonuelitaskia tionmomachtis Biblia uan okachi tikonmatis tein tayolmajxitia? Uelis tionmomachtis amaix ¡Uelis tiyolpakiskej nochipaya! Amo moixtaua uan moajsi itech jw.org. Nejin amaix kipia nejin eyi tamachtilis:
-
“¿Keniuj uelis mitsonpaleuis tein Biblia kijtoua?”.
-
“Biblia kijtoua ke uelis tikchiaskej tein kuali”.
-
“¿Uelis tikneltokaskej ox yekmelauj tein kijtoua Biblia?”.
Ijkon kemej okachi tionmomachtis itajtol Dios, tikonitas ke tein tayolmajxitia tapaleuia axkan uan no “nochipa takuaujtamach” (Salmo 111:8). Tikchiuaskej tein Biblia kijtoua ke kuali yetok yejua tein techpaleuis maj okachi kuali tinemikan. Maski ijkon, Dios amo techchikaujkauia para maj tiktakamatikan (Deuteronomio 30:19, 20; Josué 24:15). Nejon se taman tein tisejsemej moneki tikixtaliskej tikchiuaskej.
