Sayoj ke keman nikpiaya kemej 13 xiujmej peuak amo semi kuali nimouikaok iuan Jiova. Niknemiliaya ke akin iniuan nimomachtiaya uelia kichiuayaj tein kinekiaj, uan nejua no niknekia ijkon nikchiuas. Niknemiliaya ke tanauatilmej tein notatuan nechtaliliayaj uan tein kipia Biblia semi ouij se kintakamatis, uan ke miak taman moneki se kichiuas keman se kiueyichiua Jiova. Maski nikneltokaya ke Jiova yekmelauj nemi, peuak nikmachilia ke nechpolouaya teisa.

Maski niksentokaya nitanojnotsaya ika Biblia, semi tepitsin tein nikchiuaya. Keman niaya nitanojnotsati, amo nimomachtiaya achto, yejua ika ouij nechkisaya nikinnojnotsas taltikpakneminij oso nikmatis toni niksentokas nikiniluis. Yejua ika amo nikpiaya akoni oksepa nikalpanos nion nitamachtiaya ika Biblia uan amo nechyolpaktiaya nitanojnotsas. Nejon kichiuak maj okachi amo nikuelitani nitanojnotsas. Nimotajtaniaya: “¿Keniuj oksekin ueli tanojnotsaj nochi semanas uan mejmetstika?”.

Keman nikpiaya 17 xiujmej niknekia noselti nimoixyekanas, yejua ika ninemito Australia. Maski  notatuan motekipachojkej, kinemiliayaj ke ompa niksentokaskia niktekitiliskia Jiova.

Ompa Australia okachiok nimouejkatilij iuan Jiova. Amo semi niayaok nechikolmej uan nimouikaya iniuan okseki telpochmej uan ichpochmej akin ijkon kemej nejua, yayaj se nechikol uan mostika youak yayaj mijtotitij uan tauanatij. Axkan nikajsikamati ke niktekitilijtoya Jiova uan no nikchiujtoya tein kichiuaj akin amo kitekitiliaj, sayoj ke nion se taman nechyolpaktiaya.

Kemej ome xiuit satepan nikixmatik se tokniuj siuat akin maski amo kimatik, ika tein kichiuak nechpaleuij maj niknemiliani toni monekia nikchiuas. Ninemia iniuan naui tokniuan siuamej. Se tonal, tikyoleujkej tokniuj takalpanojkej uan inamik, Tamara, maj mokauanij tochan se semana. Keman tokniuj takalpanojkej kipiaya tekimej itech nechikol, Tamara touan mokauaya uan semi timouetskitiayaj. Nejon semi nikuelitak. Amo nikchiaya maj se tokniuj akin nochipa kitekitilijtoya Jiova semi yolpakini, maj amo ouij tekisani iuan se tajtos uan maj amo moueyimatini.

Tamara semi kipatiuitaya tein Biblia tamachtia uan semi kiuelitaya tanojnotsas, uan nejon kichiuaya maj oksekin no kiuelitanij. Yejua semi yolpakia porin mochikauaya kitekitilis Jiova, sayoj ke nejua amo niyolpakia porin amo ijkon nikchiuaya. Semi nechpaleuij yolpakilis tein kinextiaya uan kemej tanemiliaya. Tein kichiuak nechelnamiktij ke Jiova kineki maj tinochin tiktekitilikan “ika yolpakilis” (Sal. 100:2).

Niknekia niyolpakis kemej Tamara, sayoj ke monekia nikpatas seki taman. Nejin yolik nikchiujtiaj. Peuak nimomachtia achto ke niaskia nitanojnotsatiuj uan kemansa nimochiuaya precursora auxiliar. Nejin nechpaleuij maj amo semi nimouini keman nitanojnotsaya uan maj amo ouij nechkisani nitajtos. Kemej okachi niktekitiltiaya Biblia, okachi nechyolpaktiaya nitanojnotsas. Niman nikixtalij nimochiuas precursora auxiliar mejmetstika.

 Peuak nimouika iniuan tokniuan akin tataman xiujmej kipiayaj, akin kuali mouikayaj iuan Jiova uan kinyolpaktiaya kitekitiliskej. Tein kichiuayaj nechpaleuij maj nikitani toni niktayekanaltijtoya uan maj nikixtaliani mojmostaj nikixtajtoltis Biblia. Okachi nechyolpaktiayaya nitanojnotsas uan satepan nimochiuak precursora regular. Oksepa niyolpakia uan kuali nimomachiliaya itech nechikol.

Se xiuit satepan nikixmatik Alex, se tokniuj akin semi kualtakat, kitasojta Jiova uan kiuelita tanojnotsas. Katka tapaleuijkej itech nechikol uan chikuasen xiujmejya katka precursor. No tapaleuito Malaui seki metsti porin monekiaj okachi tanojnotsanij. Ompa iniuan tanojnotsaya seki misioneros akin kikauilijkej se kuali neskayot, uan kiyolchikaujkej maj kisentokani kitayekanaltiani kitekitilis Jiova.

Itech xiuit 2003, Alex uan nejua timonamiktijkej, uan tiksentokaj tiktekitiliaj Jiova miak tonalmej. Timomachtianij miak taman tein semi techpaleuiani, uan Jiova semi techtatiochiuiani.

Itech xiuit 2009, techyoleujkej maj titapaleuitij Timor Oriental kemej misioneros, se altepet tein amo ueyi tein yetok kampa ika moajsi Indonesia. Amo tikchiayaj tikseliskej nejon tayoleualis, semi tiyolpakiaj uan no timouiaj. Makuil metsti satepan tiajsikej xolal Dili.

Ompa Timor Oriental amo nemiaj kemej timomattoyaj, tajtouayaj okse tajtol uan onkaya okseki taman takual. Keman titanojnotsayaj, miakpa tikinixmatiaj taltikpakneminij akin semi kipanouayaj tatasojtilis, amo semi momachtijkaj uan semi kintajyouiltiayaj. Uan tikinixmatkej miakej akin amo kuali yetoyaj uan amo kuali momachiliayaj porin onkaya neteuilis uan porin miakej kintajyouiltiayaj oksekin. *

 ¡Tanojnotsalis semi kualtsin katka! Kemej neskayot, se tonal niknojnotsak María, se siuapil akin kipiaya 13 xiujmej akin semi tayokoxtoya. * Imomaj momikilijka seki xiujmej achto uan ipopaj sayoj kemansa kiitaya. María amo kimatia toni kichiuas itech inemilis ijkon kemej okseki konemej akin ompa nemiaj. Nikelnamiki se tonal keman nechtapouij keniuj momachiliaya uan semi chokaya. Sayoj ke amo nikajsikamatia tein nechiluiaya porin ayamo kuali nitajtouaya itajtol. Yejua ika niktataujtij Jiova uan niktajtanij maj nechpaleui maj ueli nikyolchikaua. Ompa peuak nikixtajtoltilia seki tajkuilolmej tein ueliskia kiyolseuis. Ijkon kemej panotiajkej xiujmej, nikitak keniuj tein Biblia tamachtia kipaleuij maj kipatani kemej tanemiliaya, kemej motakentiaya uan tein kichiuaya. Moauij uan axkan no kinmachtia oksekin ika Biblia. Moajsij miakej tokniuan akin kemej yeskiaj ichankauan uan kimachilia ke semi kitasojtaj.

Senkis moita ke Jiova tapaleuijtok maj miakej kitekitilikan ompa Timor Oriental. Maski miakej tokniuan yankuixtokok moauijkej, itech majtakti xiujmej tein panouanij, miakej precursores, tapaleuianij itech nechikol oso tayekananij. Oksekin tapaleuiaj itech Kali kampa Motajtolkepaj Amaixmej. Yejuan kitajtolkepaj toamaixuan itech tajtolmej tein ompa onkakej. Semi nechyolpaktiaya nikinkakis keman mokuikatiayaj itech nechikolmej, nikitas ke yolpakiaj uan nikitas keniuj peuaya kuali mouikayaj iuan Jiova.

Ompa Timor Oriental amo tinemiaj kemej timomattoyaj tinemiskej Australia. Sayoj ke semi tiyolpakiaj. Kemansa tiayaj itech se autobús tein amo ueyi katka iniuan miakej taltikpakneminij akin yajkaj kikouatoj pescado tatipauats uan okseki taman takual. Seki tonalmej titamachtiayaj ika Biblia itech kalmej tein amo uejueykej kampa semi takauania (tapatsmikia), pisoj katka tal uan onkayaj miak piomej. Maski ouij katka, miakpa niknemilij: “¡Semi nikuelita nikan nietos!”.

Keman itech nitanemilia nonemilis, semi niktasojkamati maj notatuan mochikauanij nechpaleuiskej maj nikixmati Jiova uan maj amo nechsenkauanij, hasta itech xiujmej keman amo semi kuali nimouikayaok iuan Jiova. Tein kijtoua Proverbios 22:6 notech mochiuani. Nopopaj uan nomomaj semi yolpakij porin Alex uan nejua tiktekitilijtokej Jiova. Itech xiuit 2016, peuak titakalpanouaj itech nechikolmej kampa taixyekana Betel tein moajsi Australasia.

Amo ueli nikneltoka maj achto niknemiliani ke semi ouij se tanojnotsas, porin axkan semi nikuelita. Nikitani ke komo tiktekitiliaj Jiova ika nochi toyolo yejua tein kichiua maj tiyolpakikan, maski tein yeski ouijkayot tikpanoskej. Semi niyolpakini 18 xiujmej tein niktekitiliani Jiova iuan Alex. Axkan nikita ke melauak tein kijtoj David keman kiluij Jiova: “Nochin akin motech mopaleuiaj yolpakiskej, nochipa tsajtsiskej ika yolpakilis [...], uan tikchiuas maj yolpakikan akin kitasojtaj motokay” (Sal. 5:11).