¿Toni tikonchiuas axkan ke tikonixmatiya Dios?
“Nankixmatij ya Totajtsin Dios.” (GÁL. 4:9)
1. ¿Keyej akin kipatanaltia se avión moneki achto kiyekitas tepos ika se amat kampa tekpantok tein moneki kiitas?
ACHTO ke se taltikpaknenkej kipatanaltia se avión tein amo niman uelis uetsis, kiita ika nejmachkayot ox kuali moajsi. Kitekitiltia se amat kampa tekpantok panoua 30 taman tein moneki kiitas sejse ox kuali yetok. Komo amo kichiuaskia, okachi uelis uejueliuis ejekaixko uan uetsis. ¿Tikonmati akoni tein kipatanaltia tepos okachi kiiluiaj maj kiita nejon amat achto ke kisas? ¡Akin okachi miak xiujmejya kichiuani nejon tekit! ¿Keyej? Porin kemej uejkaujya ika tekitini, okachi amo ouij uelis kinemilis ke amo teyi panos uan amo kiyekitasok tepos achto ke kipatanaltis.
2. ¿Toni moneki kisentokaskej kiyekitaskej akin kichiuaj kemej Cristo?
2 Ijkon kemej se akin kipatanaltia tepos kiyekita achto ke kisas, tejuan no moneki tikuiskej kemej yeskia se amat kampa tekpantok seki taman tein techpaleuis maj tikmatikan ox chikauak totakuaujtamatilis. Maski yankuixtok timoauijkej oso uejkaujya, motelneki maj tiksentokakan tikitakan ox chikauak totakuaujtamatilis uan taueyichiualis tein tikmakaj Jiova. Komo amo tikchiuaskiaj, uelis tikpoloskej tokuali uikalis iuan. Ijkon technejmachtia Biblia: “Naken moyolmachilia ke yejua semi se yek takuautamatkatagat ya, [...] ma kiyekita niyalis para ma amo uetsiti” (1 Cor. 10:12).
3. ¿Toni monekia kichiuaskej itatojtokakauan Cristo tein nemiaj Galacia?
3 Itatojtokakauan Cristo akin nemiaj Galacia monekia kiyekitaskej keniuj yetoya inintakuaujtamatilis uan kitasojkamatiskej nemakixtilis tein Dios kinmakaka. Ika inemilis Jesús tein kitemakak, nochin akin takuaujtamatiskiaj iuan, ueliskiaj kiixmatiskej Dios kemej amo keman ijkon kinemilijkaj: ¡ueliskiaj mochiuaskej ikoneuan! (Gál. 4:9.) Komo kinekiaj kipiaskej nejon tatiochiualis, akin nemiaj Galacia monekia kiixtopeuaskej inintamachtilis seki judíos, akin kijtouayaj ke monekia kitakamatiskej Tanauatil tein kiselijka Moisés. Sayoj ke akin amo katkaj judíos tein pouiaj itech nechikol amo keman moajsikej itech nejon Tanauatil. Judíos uan tein amo judíos monekia moskaltiskej kemej akin kichiuaj kemej Cristo, tein no kijtosnekia ke monekia kiajsikamatiskej ke Dios amo tajtaniaok maj kitakamatinij Tanauatil tein kiselij Moisés uan ijkon kinitaskia ke yolmelaujkej.
YEKINIKA TAMAN TEIN TAPALEUIA MAJ SE KIIXMATI DIOS
4, 5. ¿Toni kinyolmajxitij Pablo akin nemiaj Galacia, uan keyej no semi techpaleuia tejuan?
4 Dios kichiuak maj moijkuilo itech Biblia tein tatitanil Pablo kinyolmajxitij akin nemiaj Galacia, porin kineki kinpaleuis nochin itatojtokakauan Cristo tein nemiskej maj amo kikauakan tamachtilis tein kitemaka Biblia uan maj amo oksepa kiajsitij tein kikaujkej. Jiova ika ichikaualis kichiuak maj Pablo kinyolchikauani maj amo kikauanij Dios, amo sayoj akin moajsiaj itech nechikolmej ompa Galacia ta nochin itekitikauan.
5 Tinochin semi techpaleuia maj tikelnamikikan keniuj Jiova techmakixtij uan timochiujkej tiitaixpantijkauan. Uan uelis techpaleuis nejin ome netajtanilmej: ¿Tikonelnamiki toni taman tikonchiuak tein mitsonpaleuij xionueli xionmoaui? ¿Tikonelnamiki keniuj peuak tikonixmati Jiova uan yejuatsin no peuak mitsonixmati kemej tionitasojikniuj, uan uelik tikonmachilij ke yekmelauj tikonpia nemakixtilis tein Dios kitemaka?
6. ¿Katiyejua amat kampa tekpantok tein moneki tikitaskej ika timomachtitij axkan?
6 Tinochin tikchiuanij chiknaui taman tein ixnesi itech recuadro “Tein moneki tikchiuaskej uan ijkon uelis timoauiskej uan tiksentokaskej timoskaltiskej”. Nejin uelis tikuiskej kemej se amat kampa tekpantok seki taman tein moneki tikitaskej, uan ijkon tikmatiskej ox chikauak totakuaujtamatilis uan amo tiknekiskej tikajsitiuij tein tikaujkej itech nejin taltikpak. Ijkon kemej se akin kipatanaltia avión nochipa achto kuali kiita amat kampa tekpantok tein moneki kiitas, tejuatsin no uelis tiontaxikos itech itekiyo Dios komo tikontekitiltia amat kampa tekpantok tein moneki tikonitas, uan ijkon tikonmatis ox kuali yetok motakuaujtamatilis.
AKIN DIOS KINIXMATIYA KISENTOKAJ KIISKALTIAJ ININKUALI UIKALIS IUAN
7. ¿Toni tein tamati kemej se neskayot moneki tiktojtokaskej uan keyej?
7 Amat kampa tekpantok tein moneki kiitas akin kipatanaltia tepos, kielnamiktia ke moneki kiyekitas sejse taman achto ke kisas. Tejuan no uelis tikitaskej ox timochiujtokej okachi kuali itekitikauan Dios uan toni tikchiuanij ijkuak timoauijkej uan hasta axkan. Pablo kijkuilouilij Timoteo: “Ne kuali tanextililis [‘kemej se neskayot’, TNM] ten nimitsinmaktilij ya, tejua xiksentoka xiktakamatiu [...] ika ne yek takuautamatilis uan ika ne tetasojtalis [...] porin no tipoutinemij iuan Cristo” (2 Tim. 1:13). Nejon “kuali tanextililis” moajsi itech iTajtol Dios (1 Tim. 6:3). Ijkon kemej se taixkopin tamachijchiuj uelis techmakas se tanemilil keniuj tamati teisa, nejon tamachtilis tein kitemaka Biblia kemej se neskayot, techmakas se tanemilil keniuj kineki Dios maj tinemikan. Yejua ika, maj tikitakan toni tikchiujkej uan ijkon uelik timoauijkej, uan maj tikitakan ox tiktojtokatokej tamachtilis tein kitemaka Biblia kemej se neskayot.
8, 9. 1) ¿Keyej moneki tiksentokaskej tikiskaltiskej totakuaujtamatilis uan totaixmatilis? 2) ¿Keyej moneki tiksentokaskej timoskaltiskej kemej itatojtokakauan Cristo uan keniuj tamati kemej ijkuak moskaltia se kouit?
8 Yekinika taman tein ixnesi itech amat kampa tekpantok tein moneki moitas, yejua maj tikselikan taixmatilis. Nejon techpaleuia maj tikpiakan takuaujtamatilis. Sayoj ke moneki tiksentokaskej tikiskaltiskej nejon ome taman (2 Tes. 1:3). Keman teisa moskaltia, amo ompa motsakuilia, ta kisentoka ueyia uan mopataua. Yejua ika, satepan ke timoauiaj, moneki tiksentokaskej tikiskaltiskej tokuali uikalis iuan Dios uan ijkon amo motsakuilis.
Koujmej nochipa kisentokaj moskaltiaj uan tejuan no ijkon moneki tikchiuaskej
9 Nejon tamati kemej ijkuak moskaltia se kouit. Nejin uelis mochiuas se ueyi kouit, uan okachiok komo inaluayo uejkatan motoka oso uejka mosoua. Kemej neskayot, seki uejueyi cedro tein moajsi Líbano uelis uejkapantias kemej 37 metros, uan kipias uejueyi inaluayo tein semi chikaujkej uan ikoujyo uelis motomauas hasta 12 metros (Cant. de Cant. 5:15). Keman mochiua ueyi kouit, kisentokaok moskaltia sayoj ke amo semi moitaok. Ijkon kemej panouaj xiujmej, ikoujyo okachi motomaua uan inaluayo kisentoka motoka, uan ijkon kouit kuali toktok. No ijkon panoua keman timoskaltiaj kemej itatojtokakauan Cristo. Keman peua timomachtiaj Biblia uelis ijsiujka timoskaltiskej uan timoauiskej; uan xa hasta tikchiuaj tein motajtani uan ueli tipeuaj titekitij kemej precursor oso tikseliaj okseki tekimej itech nechikol. Akin pouij itech nechikol kiitaj ika yolpakilis keniuj timoskaltiaj. Sayoj ke, ijkon kemej panouaj xiujmej, xa amo semi moitaok ke timoskaltiaj. Maski ijkon, moneki tiksentokaskej tikiskaltiskej totakuaujtamatilis uan totaixmatilis hasta maj “timoyolyekmajxititij uan tikyekmatitiue ya in chipaukanemilis de Cristo” (Efes. 4:13). Ijkon amo titamatiskej kemej koujkonemej, ta timochiuaj itatojtokakauan Cristo tein kipiaj kuali taixejekolis, kemej yeskia uejueyi koujmej tein tel chikaujkej.
10. ¿Keyej tokniuan moneki kisentokaskej kiiskaltiskej ininkuali uikalis iuan Dios maski kipiaskejya kuali taixejekolis?
10 Sayoj ke moneki tiksentokaskej timoskaltiskej. Moneki tiksentokaskej tikpiaskej taixmatilis uan tikchikauaskej totakuaujtamatilis, uan ijkon kemej yeskia okachi timonaluayojkuij itech iTajtol Dios tein tamati kemej tal (Prov. 12:3). Miakej tokniuan ijkon kichiuanij. Kemej neskayot, se tokniuj takat akin tekitiniya panoua 30 xiujmej kemej tayekankej, kiita ke kisentoka moskaltia ikuali uikalis iuan Dios. Yejua kijtoua: “Axkan okachi niktasojkamati Biblia. Niksentoka nikajsi okseki taman keniuj uelis se kitekitiltis tein tanauatia Biblia uan tein tayolmajxitia. No okachi nechyolpaktia nitanojnotsas”.
XIKONCHIKAUA MOKUALI UIKALIS IUAN DIOS
11. ¿Keniuj uelis okachi tikixmatiskej Jiova ijkon kemej panouaj tonalmej?
11 Se moskaltis kemej itatojtokakauj Cristo no kijtosneki se motokis iuan Jiova kemej toTasojikniuj uan toTajtsin. Yejuatsin kineki maj timomachilikan ke techselia, techtasojta uan techyekpia, kemej se konetsin tein moajsi iuan ipopaj oso kemej timomachiliaj keman tiyetokej iuan se totasojikniuj akin amo techkaua. Sayoj ke nejon kuali uikalis amo ijsiujka se kipia. Moneki panos tonalmej uan ijkon uelis kuali tikixmatiskej uan tiktasojtaskej. Yejua ika, xikonxelo tepitsin tonal mojmostaj uan xikonixtajtolti iTajtol uan amaixmej Tanejmachtijkej uan ¡Despertad! uan okseki toamaixuan.
12. ¿Toni moneki tikchiuaskej tein techpaleuis maj tokuali uikalis iuan Dios kisentoka chikauak?
12 Itasojikniuan Dios moskaltia ininkuali uikalis iuan porin kichiuaj netataujtil ika nochi ininyolo uan mosentiliaj iniuan akin kinpaleuiaj (xikonixtajtolti Malaquías 3:16). Jiova “kuali techkakilijtinemi tonetatatautilis” (1 Ped. 3:12). Kemej se tepopaj tetasojtakej, Dios kiyekkaki keman tiktataujtiaj. Yejua ika, moneki tikchiuaskej kemej kijtoua Biblia: “Xiksentokakan de nanmotatatautiliske iuan Dios” (Rom. 12:12). Amo uelis tikpiaskej chikauak tokuali uikalis iuan Dios komo amo tikpiaj inepaleuil. Ouijkayomej itech nejin taltikpak semi uejueyi uan amo uelis tikxikoskej uan tikixnamikiskej toselti. Komo amo tiksentokaj tikchiuaj netataujtil, amo tikpiaskejok chikaualis tein Dios kineki techmakas uan ueli techmaka. ¿Tikonchiua netataujtil iuan Dios kemej se yekmelauj motasojikniuj oso tikonnemilia ke moneki okachi tionmotekitilis itech nejon? (Jer. 16:19.)
13. ¿Keyej motelneki timosentiliskej iniuan tokniuan uan ijkon mochikauas tokuali uikalis iuan Dios?
13 Jiova kintasojta nochin akin “kitemouaj nepaleuil iuan”. Yejua ika, maski kuali tikixmatiskejya Dios, moneki tiksentokaskej tiyaskej nechikolmej porin ompa moajsij akin no kiixmatij (Nah. 1:7). Itech nejin taltikpak kampa tel onkak tein teyolxokolia, motelneki maj timosentilikan iniuan tokniuan akin techyolchikauaj. ¿Keniuj techpaleuia nejon? Itech nechikol tikinajsiskej akin techyolchikauaskej maj tiknextikan netasojtalis uan maj tikchiuakan tein kuali (Heb. 10:24, 25). Moneki moajsis nechikol oso oloch tokniuan tein kisenueyichiuaj Dios, uan ijkon uelis onkas netasojtalis se iuan okse tein ika tajtoj Pablo itech amat tein kintitanilij hebreos. Yejua ika, moneki tiyetoskej itech nechikolmej uan ijkon uelis tiknextiskej nejon netasojtalis. Itech amat kampa tekpantok tein moneki moitas, xikontsojkuilo ke nochipa moneki tiyaskej nechikolmej uan titanankiliskej.
14. ¿Keyej moijtoua ke moneki se kisentokas se moyolnonotsas uan se kikauas tajtakolnemilis?
14 Tein techpaleuij maj timochiuakan itatojtokakauan Cristo, monekik timoyolnonotsaskej uan tikauaskej totajtakolnemilis. Sayoj ke moneki tiksentokaskej timoyolnonotsaskej. Kemej titajtakouanij, tajtakol kemej yeskia techichtakauia, kemej se kouat tein ichtakayetok uan kiitstok akoni kikejtsomas (Rom. 3:9, 10; 6:12-14). Maj kuali titachixtokan uan maj amo timosenkauakan keman tikpiaskej nepololmej. Semi techyolpaktia tikmatiskej ke Jiova amo yolijsiui touan keman timochikauaj tikauaskej tein techouijmaka tikixnamikiskej uan tikpataj tein monekis (Filip. 2:12; 2 Ped. 3:9). Semi techpaleuia komo tikyekitaj keniuj tikuij totonaluan uan tein tikpiaj, uan tikauaj nochi taman tein techuika maj sayoj tikchiuakan totanejnekilis. Se tokniuj siuat kijtoj: “Maski notatuan katkajya itaixpantijkauan Jiova keman nimoskaltij, nikpialiaya Jiova se tanemilil tein semi taman ke tein kipialiaj oksekin. Nikmouiliaya itech nitanemilis, uan niknemiliaya ke amo keman ueliskia nikyolpaktis”. Yejua amo semi chikauak kipiaya ikuali uikalis iuan Dios uan kipiak nepololmej. Yejua no kijtoua: “Amo kijtosnekia ke amo niktasojtaya Jiova, ta tein melauj, amo nikyekixmatia. Sayoj ke satepan ke nikchiuak miak netataujtil ika nochi noyolo, nochi peuak mopata. Nikmachilij ke Jiova kemej yeskia nechmajchanaya kemej se konetsin uan nechpaleuij maj nikixnamiki sejse ouijkayot, uan nochipa kichiuaya ika ueyi netasojtalis uan nechnextiliaya tein monekia nikchiuas”.
15. ¿Toni kiitaj Jesús uan iPopaj?
15 “Ximoketsakan inixteno nochi in tagayot uan xikintapouikan” kuali tanauatilmej. Iángel Dios kiiluij Pedro uan okseki tatitanilmej nejin tajtolmej satepan ke kinkixtij kampa tsaktoyaj (Hech. 5:19-21). Titanojnotsaskej nochi semanas yejua okse taman tein moneki tikitaskej itech amat tein techmatiltia ox ijkon tikchiujtokej. Jesús uan iPopaj kiitaj totakuaujtamatilis uan totanojnotsalis (Apoc. 2:19). Tayekankej tein ika titajtojkej itech seki párrafos achto, kijtoua: “Tanojnotsalis poui itech tonemilis”.
16. ¿Keyej moneki tiknemiliskej keman timotemaktijkej iuan Jiova?
16 Xiontanemili keman tionmotemaktij iuan Dios. Tokuali uikalis iuan Jiova yejua tein okachi motelneki. Yejuatsin kinixmati akin iaxkauan (xikonixtajtolti Isaías 44:5). Xikonita ika netataujtil ox tel kuali uan chikauak mokuali uikalis iuan Jiova. No xiontanemili itech tonal keman tionmoauij uan amo xikonelkaua nejon tonal tein motelneki. Keman tionmoauij tikonnextij sentaixpan ke tionmotemaktijya iuan Jiova. Nejon tein tikonixpejpenak tikonchiuas, yejua tein okachi motelneki.
TAXIKOLIS TECHPALEUIA MAJ TIKSENTOKAKAN IUAN JIOVA
17. ¿Keyej moneki taxikolis uan ijkon uelis tiksentokaskej tiyetoskej iuan Jiova?
17 Itech amat tein Pablo kintitanilij Gálatas, kinextij ke monekia kipiaskej taxikolis (Gál. 6:9). Axkan nochin itatojtokakauan Cristo no moneki kipiaskej. Tejuatsin tikonpias ouijkayomej, sayoj ke Jiova mitsonpaleuis. Xikonsentoka xikontajtani iespíritu. Semi kuali tionmomachilis keman yejuatsin kipatas tekokojkayot ika yolpakilis, uan netekipacholis ika yolseuilis (Mat. 7:7-11). Xikonnemili nejin: komo Jiova kinyekpia totomej, ¿melauj ke okachi mitsonyekpias tejuatsin, akin tikontasojta uan tionmotemaktij iuan? (Mat. 10:29-31.) Maski tikonpias uejueyi ouijkayomej, amo keman xikonajsiti tein tikonkauak nion xionmosenkaua. ¡Tel miak tatiochiualismej tein kualtsitsin tikpiaj porin Jiova techita kemej tiitasojikniuan!
18. Axkan ke ‘tikonixmatiya Dios’, ¿toni moneki tikonchiuas?
18 Yejua ika, komo yankuixtok peuak tikonixmati Dios uan tionmoauijya, ¿toni moneki tikonchiuas axkan? Xikonsentoka xikonixmati Jiova, xikoniskalti mokuali uikalis iuan. ¿Uan komo uejkaujya tionmoauij? No moneki xikonsentoka xikonseli uan xikonpataua taixmatilis tein kitemaka Jiova. Amo keman xikonnemili ke amo monekiok tionmoskaltis. Kemansa xikonita tein timomachtijkej axkan uan ijkon mitsonpaleuis xikonsentoka xikoniskalti mokuali uikalis iuan Jiova, akin toTajtsin tetasojtakej, toTasojikniuj uan toDios (xikonixtajtolti 2 Corintios 13:5, 6).
