INEAJOKUILIS Jesús amo sayoj se taman tein mochiuak ne uejkauj uan amo teyi techpaleuia axkan. Tatitanil Pablo kimelauak ijkon: “Cristo [...] pankisak ya yoltok [...] keme in tayekanke de nochi itaneltokakauan [...] ten momikilijke [...]. Porin kuak ne achto tagat Adán [motajtakolmakak], ijkuakon in mikilis peuak kinkitskia in taltikpakuani. Uan no ijkon kuak Cristo pankisak yoltok [...], ijkuakon Dios kitsinpeualtij nitekiu de kinpankixtis yoltokke itaneltokakauan. Uan nochi tejuan [...] timomikiliske porin [...] Adán [...] motajtakolmakak. Pero [...] komo tipoutinemij iuan Cristo, ijkuakon se tonal Totajtsin Dios techpankixtis tiyoltokke” (1 Corintios 15:20-22).

Jesús moajokuik itech tonal 16 metsti nisán xiuit 33. Nejon tonal judíos kitekiaj takilot oso tatet tein achto motakiltiaya uan kitemakayaj iixpan Jiova Dios itech templo tein moajsia Jerusalén. Keman Pablo kijtoj ke Jesús katka “keme in tayekanke”, kiteajsikamatiltij ke oksekin no moajokuiskiaj.

Tatitanil kimelauak tein kiualkui ineajokuilis Jesús ika nejin tajtolmej: “Porin kuak ne achto tagat Adán [motajtakolmakak], ijkuakon in mikilis peuak kinkitskia in taltikpakuani. Uan no ijkon kuak Cristo pankisak yoltok [...], ijkuakon Dios kitsinpeualtij nitekiu de kinpankixtis yoltokke itaneltokakauan”. Kemej Adán techkauilij tajtakol, yejua ika tinochin timomikiliaj. Sayoj ke, ijkuak Jesús taxtauak ika inemilis tein amo kipia tajtakol, kichiuak maj Dios ueli techkixtili tajtakol uan mikilis keman oksepa kitemakas nemilis. Itech Romanos 6:23, Pablo kimelauak ika amo miak tajtolmej nepaleuil tein kiualkui: “Tajtakol keme yeskia se patrón ten tetaxtauia sayo ika mikilis. Pero Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús”.

Jesús no kinextij keniuj techpaleuia imikilis uan ineajokuilis. Keman ika tajtoj tein kipanoskia, kimelauak ke monekia moajokuis uan ijkon nochin akin iuan takuaujtamatiskej “kipiaske ne yek nemilis sen nachipa. Uan in Totajtsin Dios semi kintasojtak in taltikpakuani. Ika ya nojon [...] kualtitanik Iyojtsin Ikonetsin [...] para ma nochi ne ten iuantsin takuautamatiske [...] ma amo ixpoliuikan. Ta, ma kipiakan ne yek nemilis nachipa” (Juan 3:14-16).

Xionmonemili: ¡se nemilis nochipaya keman amo onkasok tekokojkayot uan tajyouilis! (Apocalipsis 21:3, 4.) ¡Tel kualtsin tein amo uejkaua mochiuas! Kemej kijtoj se motelmachtijkej: “Miketekochmej techelnamiktiaj ke nemilis amo uejkaua, uan neajokuilis techyekmatiltia ke mikilis amo uejkaua”. Yekmelauj ineajokuilis Jesús kijtosneki nemilis.