¿Kemansa mitsonchikoitanij? ¿Amo mitsonmakakej se taman tein tiontajtanik oso se nepaleuil, oso amo mitsonyekitanij porin taman tionixtamati, tionmaseual oso porin tikonpanoua tatasojtilis? Komo ijkon, tiknekij timitsoniluiskej tein kuali: maski taltikpakneminij semi techikoitaj, Dios amo ijkon kichiua. Tatitanil Pedro kijtoj tein kiyekneltokaya: “Dios amo [kinchichikotasojta] in tagayot”. (Xikonixtajtolti Hechos 10:34, 35.)

Pedro kijtoj nejin tajtolmej ichan se takat akin motokaytiaya Cornelio. Nejon se kimoujkaita porin Pedro katka judío uan Cornelio amo. Nejon tonalmej judíos amo kinyekitayaj akin amo katkaj judíos uan amo mouikayaj iniuan. Komo ijkon, ¿keyej ompa yetoya Pedro? Porin Jiova kinauatij. Dios yekin kiitaltijka se taman kampa kiiluijkej: “Tejua amo xikpoua ke pitsotik [...] ten Dios kichipauak ya”. Pedro amo kimatia ke se tonal achto Dios no kiitaltijka Cornelio se taman kampa se ángel kinauatiaya maj kinotsatij (Hechos 10:1-15). Tatitanil kiajsikamatik ke Dios kichiujka maj mosentilianij.

Pedro kijtoj: “Axkan melauj nikajsikamati ke Totajtsin Dios amo [kinchichikotasojta] in tagayot” (Hechos 10:34). Tajtol griego tein mokepa kemej “techikotasojta” kijtosneki “se akin kiselia iixko aksa” (Nueva Concordancia Strong Exhaustiva). Se akin momachtia tein kipia Biblia, kimelaua ijkon nejin tajtol: “Kijtosneki keman tamelaujkej kiixita taltikpaknenkej uan ika nejon kijtoua toni tatsakuiltilis kiselis. Sayoj kiita ox kiyolpaktij oso amo, uan amo kiita tein yekmelauj panok”. Dios amo ijkon kichiua keman kitemaka inepaleuil. Amo kiita keniuj ixtamati, oso kani ialtepeuj, ox ueyi chiujkej oso amo, nion kiita okseki taman tein moita tapani.

Ta Jiova kiita iyolo taltikpaknenkej (1 Samuel 16:7; Proverbios 21:2). Pedro kijtoj: “Yejuatsin kiniknelia tagayot tech nochi in senmanauak komo yejuan kimouistiliaj [oso kimoujkatokaj] [...] uan chipaukanentinemij” (Hechos 10:35). Se kimoujkatokas Dios kijtosneki se kipoujkaitas uan se takuaujtamatis iuan, uan amo se kichiuas tein amo kiyolpaktia. Se chipaujkanemis kijtosneki ke ika miak pakilis tikchiuaj tein melauak iixpan. Kiyolpaktiaj Jiova akin kichiuaj tein melauak porin ika nochi ininyolo kiitaj ke semi ueyichiujkej (Deuteronomio 10:12, 13).

Komo mitsonchikoitanij, tikyekmatij ke itajtoluan Pedro mitsonyolchikauas: Jiova kichiua maj iuan motokikan tataman taltikpakneminij uan ijkon uelis kitekitiliskej (Juan 6:44; Hechos 17:26, 27). Dios kinkaki uan kinnankilia keman kitataujtiaj nochin akin kiueyichiuaj, uan amo kiita keniuj ixtamati, kani kayot uan ox ueyichiujkej oso amo (1 Reyes 8:41-43). Ueli tikyekmatij ke ijkuak Dios techualita ne iluikak, sayoj kiita taltikpakneminij. ¿Amo mitsonolinia nejon okachi xikonixmati Jiova akin amo techikotasojta?