Antonio: Tejuatsin Luis. ¡Nechmaka pakilis oksepa nimitsontajpalos!

Luis: Nejua no nechmaka pakilis.

Antonio: Nimitsonualkuilia amaixmej Tanejmachtijkej uan ¡Despertad! tein yankuixtok kiskej. Nikyekmati ke tikonuelitas tataman tamachtilis tein kiualkui.

Luis: Tasojkamatik. Kuali ke tionualaj, porin nikneki nimitsontajtanis teisa.

Antonio: Kemaj, xinechonilui.

Luis: Seki tonalmej achto, iuan nitajtojtoya se akin iuan nitekiti uan nikiluij ke amaixmej tein nankimoyauaj kipia tel kuali tamachtilis. Sayoj ke yejua nechiluij ke monekia maj amo nikixtajtolti porin itaixpantijkauan Jiova amo kineltokaj Jesús. Nikiluij ke nimitsontajtaniskia keman oksepa tionualaskia. ¿Yekmelauj amo nankineltokaj Jesús?

Antonio: Kuali ke tinechontajtania nejua. Ta komo tiknekij tikmatiskej tein kineltoka aksa, ¿melauj ke okachi kuali maj se kitajtani yejua?

Luis: Kemaj, semi melauak nejon.

Antonio: Tiitaixpantijkauan Jiova kemaj tikneltokaj Jesús. Uan amo sayoj nejon; tikneltokaj ke amo uelis timakisaskej komo amo titakuaujtamatij iuan.

Luis: Yejua nejon niknemiliaya. Sayoj ke kemej akin iuan nitekiti nechiluij ke amo nankineltokaj, niknekik nikmatis ox melauak. Uan kemej amo keman ika timonojnotsanij nejin tamachtilis...

Antonio: Nikajsikamati. Nikuelitaskia nimitsonnextilis seki tajkuilolmej itech Biblia tein kimelaua keyej motelneki tikneltokaskej Jesús. Nejin tajkuilolmej tiktelkuij keman titetapouiaj iTajtol Dios.

Luis: Kuali yetok.

Antonio: Maj tipeuakan ika itajtoluan Jesús tein kiluij semej imomachtijkauan. Moajsi itech Juan 14:6: “Nejuatsin ya keme niyeskia niojtsin para ika nanajsiske ne kampa Notajtsin Dios. Uan Nejuatsin ni Yolmelauaktsin uan namechnojnotsas sayo ika ten melau. Uan sayo Nejuatsin nitemakas nemilis. Ika ya nojon amo aken uelis kajsis Notajtsin Dios komo amo Nejuatsin nikyekantiyas”. Nejin tajkuilol kinextia ke moajsi sayoj se taman kemej uelis timotokiskej iuan toTajtsin, ¿katiyejua?

Luis: Ika inepaleuil Jesús.

Antonio: Kemaj. Uan yejua nejon tikneltokaj tiitaixpantijkauan Jiova. Axkan nikneki nimitsontajtanis se taman. Ika tein tionmomachtiani itech Biblia, ¿akoni itokaykopa moneki timotataujtiskej iuan Dios?

Luis: Itokaykopa Jesús, ¿amo?

Antonio: Kemaj. Yejua ika, nochipa keman nimotataujtia iuan Dios, nikchiua itokaykopa Jesús. Uan nochin itaixpantijkauan Jiova ijkon kichiuaj.

Luis: Amo nikmatia nejon.

Antonio: Axkan maj tikitakan tein kijtoua Juan 3:16. Ika amo miak tajtolmej, nejin tajkuilol ika tajtoua inemilis uan itanojnotsalis Jesús nikan taltikpak. ¡Nejin tajkuilol motelneki! Hasta kijtouaj ke  nejin se tsikitsin tajkuilol tein kisenmelaua inemilis Jesús. ¿Tikonneki tikonixtajtoltis?

Luis: Kemaj. “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa.”

Antonio: Tasojkamatik. ¿Tikonixtajtoltijkaya nejin tajkuilol?

Luis: Kemaj, nikakini itech taneltokalis kampa nipoui.

Antonio: Nejin tajkuilol motelixmati. Maj tikyekitakan toni kijtosneki. Jesús kijtoj ke uelis tikpiaskej nemilis nochipa porin Dios techtasojta, sayoj ke ¿toni moneki tikpiaskej?

Luis: Takuaujtamatilis.

Antonio: Kemaj, uan nikan kijtoua ke moneki titakuaujtamatiskej iuan iKonetsin, Jesucristo. Uan nejon tanemilil, tein techiluia ke komo titakuaujtamatij iuan Jesús uelis tikpiaskej nemilis nochipa, moijtoua itech página 2 tein kiualkui amaix Tanejmachtijkej tein nimitsonmakak. Ompa kijtoua ke nejin amaix tein momoyaua, tapaleuia itech seki taman. Semej, tapaleuia maj titakuaujtamatikan iuan Tekiuaj akin moajsi itech iTekiuajyo Dios, Jesucristo, “akin kitemakak inemilis tein tapaleuia maj tiuelikan tikselikan nemilis nochipaya”.

Luis: Melauj, nejin amaix kinextia ke nankineltokaj Jesús.

Antonio: Kemaj.

Luis: Komo ijkon, ¿keyej miakej kijtouaj ke amo nankineltokaj Jesús?

Antonio: Niknemilia ke xa miak taman kinuika maj kijtokan nejon. Xa sekin sayoj kineltokaj tein kiniluianij. Oso xa kinmachtiani se akin taixyekana itech taneltokalis kampa pouij.

Luis: Niknemilia ke xa no uelis yeski porin nanmotokaytiaj itaixpantijkauan Jiova uan amo itaixpantijkauan Jesús.

Antonio: Xa no uelis yeski nejon.

Luis: ¿Uan keyej tel ika nantajtouaj Jiova?

Antonio: Porin itokay Dios yejua Jiova, uan tikneltokaj ke motelneki tikuiskej. Jesús ijkon kichiuak. Nikneki nimitsonnextilis tein se tonal kiluij iTajtsin keman motataujtiaya iuan. Moajsi nikan itech Juan 17:26. ¿Uelis tikonixtajtoltis?

Luis: Kemaj. “Nejuatsin nikinnextilijtinemik nomomachtijkauan ika in chikaualis de motokaytsin de akoni Tejuatsin. Uan nikinmachtijtinemis ok de akoni Tejuatsin, para ma ne tetasojtalis tenika tinechonyoltasojta, ma no ninyolijtik yejuan ma mochiua.”

Antonio: Tasojkamatik. Kemej tikonita, Jesús kiteixmatiltij itokay Dios. ¿Keyej kichiuak?

Luis: Amo nikmati.

Antonio: Maj tikitakan se tajkuilol tein kimelaua, Hechos 2:21 itech Traducción del Nuevo Mundo kijtoua: “Nochin akin kinotsaj ika itokay Jiova makisaskej”. Kemej tikitaj, komo tiknekij tikpiaskej nemakixtilis moneki tiknotsaskej oso tikuiskej itokay Dios. Uan tiknemiliaj ke Jesús kimatia nejon.

Luis: Kemaj.

Antonio: Yejua ika kiitaya ke motelnekia maj itatojtokakauan kiixmatiskiaj uan maj kikuiskiaj itokay iTajtsin: porin ijkon uelis tikpiaskej nemakixtilis. Uan yejua ika tiitaixpantijkauan Jiova tel ika titajtouaj itokay. Tikitaj ke motelneki maj taltikpakneminij kiixmatikan uan maj kikuikan nejon tokayit.

Luis: Sayoj ke taltikpakneminij kimatij akoni Dios maski amo kiixmatij itokay oso amo kikuij.

Antonio: Xa kemaj, sayoj ke Dios techmatiltia itokay porin ijkon uelis okachi amo techouijmakas timotokiskej iuan.

Luis: ¿Toni tikonijtosneki?

Antonio: Xikonnemili nejin: ¿melauj ke timiakej tikmatij ke moajsik se takat akin kitajkoxeloj  ueyiat Chichiltik uan kiselij Majtakti Tanauatilmej? No tikmatij ke moajsik se takat akin kichijchiuak se arca kampa momakixtijkej ichankauan uan tapialmej. ¿Toni panoskia komo amo tikmatiskiaj keniuj motokaytijkej? ¿Melauj ke amo techijtakoskia? Nion techijtakoskia komo amo tikmatiskiaj keniuj motokaytia akin ualeuak iluikak uan momikiliko ika totajtakoluan, ¿melauj?

Luis: Semi melauak.

Antonio: Sayoj ke Dios kichiuak se taman tein motelneki; kichiuak maj tikmatinij ke motokaytiayaj Moisés, Noé uan Jesús. Keman tikmatij keniuj motokaytijkej, kichiua maj okachi tikinitakan ke yekmelauj nenkej, maski amo tikinitakej.

Luis: Amo keman ijkon niknemilijtoya, sayoj ke taixejekol nejon.

Antonio: Yejua ika, tiitaixpantijkauan Jiova tiktelkuij itokay: porin tiknekij maj taltikpakneminij takuaujtamatikan iuan, maj kiitakan ke yekmelauj nemi, kemej se akin uelis kuali iuan mouikaskej. Sayoj ke no tikmatij ke motelneki inepaleuil Jesús uan ijkon uelis timakisaskej. Nikuelitaskia nimitsonnextilis okse tajkuilol tein kinextia ke melauak nejin tanemilil.

Luis: Kuali yetok.

Antonio: Tikixtajtoltijkej achto Juan 14:6, kampa Jesús kijtoj ke yejua ‘keme yeskia ojtsin [...,] Yolmelauaktsin uan [...] kitemaka nemilis’. Axkan maj tikitakan Juan 14:1. ¿Tikonneki tikonixtajtoltis itamiampa?

Luis: Kemaj. Kijtoua: “Komo melau nantakuautamatij iuan Totajtsin Dios, no ijkon moneki xikyektakuautamatikan nouantsin”.

Antonio: Tasojkamatik. ¿Kinextia nejin tajkuilol ke moneki tikixpejpenaskej akoni iuan titakuaujtamatiskej? ¿Kijtosneki ke moneki tikixpejpenaskej sayoj titakuaujtamatiskej iuan Jiova oso sayoj iuan Jesús?

Luis: Amo. Jesús kijtoj ke moneki titakuaujtamatiskej iniuan omen.

Antonio: Kemaj, uan nikyekmati ke no tikonnemilia ke moneki amo sayoj tikijtoskej ke titakuaujtamatij, ta moneki tiknextiskej.

Luis: Kemaj.

Antonio: ¿Uan keniuj uelis tiknextiskej nejon? ¿Keniuj tikonita komo ika titajtouaj nejin taman okse tonal? *

Luis: Kuali yetok.