Taltikpak tel kuali chijchiujtok kemej tapaleuis maj onka nemilis. Onkak tel miak at, se taman tein kitelpaleuia nochi tein yoltok. Taltikpak nakasikayetok, momalakachoua uan tayoualoua kemej moneki. Nejon tel tapaleuia maj ueyiamej amo mokepakan sekti oso maj uakikan. Taltikpak kipia seki taman tein kemej yeskia kipiki tein tapaleuia maj amo techchichino Tonaltsin. Uan no tapialmej uan nochi koujmej kuali mopaleuiaj. Miakej, keman kiitaj nochi nejin, kiajsikamatij ke onkak keyej kichijchiujkej taltikpak. (Xikonixtajtolti Isaías 45:18.)

Sayoj ke miakej motajtaniaj ox Akin tachijchiuak no kinekia maj onka teikamauiltilis uan tajyouilis tein tikitaj axkan nikan taltikpak. (Xikonixtajtolti Deuteronomio 32:4, 5.)

Dios kichijchiuak taltikpak porin kinekia maj ompa nemiskiaj taltikpakneminij kemej se kalyetouanij akin yolpakiskiaj, mopoujkaitaskiaj uan kitasojtaskiaj Akin tachijchiuak. Nejon kijtosneki ke onkak keyej moajsij taltikpakneminij uan okachi motelneki ke koujmej uan tapialmej. Tejuan ueli tikajsikamatij akoni techchijchiuak uan ueli tikmoujkaitaj inetasojtalis uan imelaujkayo Dios uan ueli tiknextiaj nejon. (Xikonixtajtolti Eclesiastés 12:13 uan Miqueas 6:8.)

Dios Akin tachijchiuak uelis kichiuas nochi tein kiixtalia, yejua ika uelis tikneltokaskej ke kiajchiuas tajyouilis uan teikamauiltilis, uan nikan taltikpak motayektalis uan taltikpakneminij uelis nemiskej kemej kalyetouanij akin yolpakij. (Xikonixtajtolti Salmo 37:11, 29 uan Isaías 55:11.)