¿KENIUJ uelis kichiuas takat maj inamik yolseujkanemi? Miakej kijtoskiaj ke maj kipia nochi tein kipoloua. Uan kinemiliaj ke tein tapaleuis yejua maj kitemakakan tomin tein monekis; yejua nejon tein kijtouaj ke okachi moneki kichiuaskej. Komo ijkon, ¿keyej onkakej siuamej ke maski nochi kipiaj kisentokaj kimachiliaj ke teisa kinpoloua? Rosa, akin kayot España, kijtoua toni kichiuaya takat akin iuan monamiktij: “Ininixpan oksekin kuali nechnojnotsaya, sayoj ke keman tiyetoyaj toselti amo ijkon kichiuaya”. Okse siuat kayot Nigeria, akin itokay Joy, no kijtoua: “Komo amo nikseliaya se taman tein kijtouaya nonamik, nechiluiaya: ‘Moneki tikchiuas tein nikijtoua porin nejua nimonamik’”.

¿Keniuj uelis takat akin namikej kichiuas tekit tein kinamiki ikalijtik? ¿Keniuj uelis kichiuas maj inamik kimachili ke amo teyi kipoloua uan ke kitasojta, uan maj yolseujkanemi ikalijtik? (Rut 1:9.)

Maski takat uan siuat nion se okachi ueyichiujkej iixpan Dios, Biblia kijtoua ke sejse tataman tekit kipiaj ininkalijtik. Romanos 7:2, itech Traducción del Nuevo Mundo, kijtoua ke siuat akin namikej moneki kipoujkaitas “itanauatil inamik”. Ijkon kemej se ueyi tanamakaloyan kipia aksa akin kiixyekana, Dios kiixtalij takat akin namikej maj kinixyekana ikalyetouanij. Yejua ika, takat kiixyekana inamik (1 Corintios 11:3).

¿Keniuj moneki kitekitiltis takat akin namikej tanauatil tein Dios kimakak? Efesios 5:25 kijtoua: “Xikintasojtatiyakan namosiuauan”. Uan kisentoka kijtoua: “Jesús kinteltasojtak nochi itaneltokakauan”. Kemaj, maski Jesucristo amo keman monamiktij, tein kichiuak mitsonpaleuis xionmochiua se kuali tetakauj. Maj tikitakan keniuj.

Jesús mochikauak kinyolseuis oksekin. Yejua kiniluij nochin akin tajyouijtoyaj porin kipiayaj kuejmolmej: “Xiualakan nouan [...] uan Nejuatsin namechmakas ne yolseuilis” (Mateo 11:28, 29). Kemej tikitaj, kinpaleuiaya maj yolseujkanemikan, kinpajtiaya akin mokokouayaj uan kinpaleuiaya maj motokikan iuan Dios. ¡Yejua ika kinekiaj iuan yetoskej!

 Keniuj uelis tikonchiuas kemej Jesús. Xikontemo keniuj tikonpaleuis monamik. Miakej siuamej momachiliaj kemej Rosa, akin kijtoj: “Nonamik nechitaya kemej itakeual”. Sayoj ke, se takat akin itokay Kweku amo ijkon kichiua, kijtoua: “Nochipa niktajtania nonamik ox moneki maj nikpaleui. Kemej nikteltasojta, nochipa nikpaleuia ika tekit tein kipia kalijtik maski yejua amo nechiluis”.

Jesús tepoujkaitak uan teajsikamatik. Se siuat akin kiuikayaya doce xiujmej tajyouijtoya ika se ueyi kokolis, keman kikakik ke Jesús tapajtiaya ika ichikaualis Dios. Yejua kinemilij: “Ta sayo niknalmatokas ya nitilmajtsin, ijkuakon nejua nipajtis”. ¡Uan ijkon mochiuak! Yajki kampa yetoya Jesús, keman sayoj tepitsin kimatokak itilmaj niman pajtik. Xa sekin kijtojkej ke siuat amo tapoujkaitaya, Jesús kiajsikamatik ke amo kimatiaok toni ika pajtis. * Yejua ika kiyolseuij ika nejin tajtolmej: “Ximokaua pajtik ya de ne tajyouilis”. Tein  kichiuak Jesús kinextij keniuj monejnemiltiaya: katka se takat akin kinajsikamatia oksekin (Marcos 5:25-34).

Keniuj uelis tikonchiuas kemej Jesús. Keman monamik amo kuali momachilis, xikontemo okachi tikonajsikamatis uan amo xionyolijsiui; xionmochikaua tikonajsikamatis keyej ijkon tanankilia. Ricardo kijtoua: “Nochipa keman nikita ke nonamik amo kuali momachilia, niktemoua amo nikijtos tein okachi uelis kiyolkokos”.

Jesús tajtouaya iniuan imomachtijkauan. Yejua miak tiempo tajtouaya iniuan akin kuali iuan mouikaya. Hasta kiniluij: “Namechajsikamatiltij ya nochi ne tanauatilme ijkon keme nikakilij kuak Notajtsin Dios nechnauatilij ma nikchiua” (Juan 15:15). Maski kemansa kinekia iselti yetos uan ijkon ueliskia tanemilis uan kitataujtis Dios, miakpa kiniluiaya imomachtijkauan tein kimachiliaya. Kemej neskayot, youak achto ke kimiktiskiaj kemej se aksa akin kichiuak tein tel amo kuali kinyekiluij ke senkis motekipachojtoya (Mateo 26:38). Uan yejua nochipa kinnotsaya hasta ijkuak kichiuayaj tein yejua amo kiyolpaktiaya (Mateo 26:40, 41).

Keniuj uelis tikonchiuas kemej Jesús. Xiontajto iuan monamik. Xikonilui tein tikonnemilia uan tein tikonmachilia. Miakej siuamej kijtouaj ke ininnamik amo kinouijmaka tajtoskej keman yetokej iniuan oksekin, sayoj ke kalijtik amo tajtouaj. Ana kimelaua keniuj momachilia keman inamik kiluia tein kinemilia: “Nikmachilia ke nechtasojta uan ke timosenpaleuiaj”.

Xikonsentoka xiontajto iuan monamik maski iuan tionkualantos. Se siuat akin namikej kielnamiki: “Nochipa keman nonamik nouan kualania panouayaj miak tonalmej amo nechnotsaya. Kichiuaya maj nikmachili ke katka notajtakol uan ke amo teyi nichiujkej”. Edwin amo ijkon kichiua, yejua mochikaua kichiuas kemej Jesús, kijtoua: “Keman nikualani amo niman nitanankilia, okachi kuali niktemoua kemanian uelis nikyektalis kuejmol”.

Joy, siuat akin ika titajtojkej ipeujyan nejin tamachtilis, kiitani ke inamik mopatak keman peuak momachtia Biblia iniuan itaixpantijkauan Jiova. Yejua kijtoua: “Miak taman kipatani. Mochikaujtok okachi tetasojtas, ijkon kemej Jesús”. Biblia kinpaleuiani millones siuamej uan takamej itech ininnemilis kemej namikuanij. ¿Tikonuelitaskia no maj mitsonpaleui? Xikonilui se itaixpantijkauj Jiova ke tikonneki tionmomachtis Biblia; amo moneki tikonixtauas.