Keman Biblia ika tajtoua Job, kijtoua ke “amo kipiaya tein ika kiteluiliskej uan katka yolmelauak” (Job 1:1). Uan ke Lot katka “yolchipaukatagat” (2 Pedro 2:8). Uan no kijtoua ke David kichiuaya “sayoj tein melauak” iixpan Dios (1 Reyes 14:8). Maj tikitakan tein kinpanok nejin takamej akin ininka tajtoua Biblia. Tikitaskej ke yejuan no mopolojkej uan tein kichiujkej uelis techpaleuis uan no techmachtis ke maski titajtakouanij uelis tikyolpaktiskej Dios.

Job kipanok miak taman itech inemilis tein semi kitajyouiltij, nejon kichiuak maj kinemiliani ke yejua amo kinamikia tein kipanok. Yejua senkis mopolojtoya keman kinemilij ke Dios amo kiitaya ox kitakamatia oso amo (Job 9:20-22). Uan no, Job kijtouaya ke katka se takat yolkuali. Uan hasta keman oksekin kikakiaj kiitayaj ke yejua kinemiliaya ke katka okachi yolkuali ke Dios (Job 32:1, 2; 35:1, 2).

Lot amo niman tatakamatik keman Dios kinauatij maj kichiua se taman. Akin nemiaj Sodoma  uan Gomorra tel auilnemiaj, uan Lot nion tepitsin kinekia kiitasok keniuj monejnemiltiayaj. Yejua “semi yoltajyouiaya” keman kiitaya nejon pitsotik tachiualis (2 Pedro 2:8). Dios kiluij ke kinixpoloskia nochin akin ompa nemiaj uan komo kinekia kinmakixtis ichankauan monekia kinkixtis. Taixejekol maj niman tatakamatini, sayoj ke amo kinekia kikauas ichan. Yejua ika, ángeles tein Dios kintitanik maj kimakixtitij Lot uan ichankauan, monekik kinmakitskiskej uan kinkixtiskej (Génesis 19:15, 16).

David kikauak maj itanejnekilis kiixyekana uan nejon kiuikak maj auilnemi iuan se siuat namikej. Uan amo sayoj nejon, ta no tanauatij maj kimiktikan itakauj nejon siuat uan ijkon amo kimatiskia tein kichiuak (2 Samuel, capítulo 11). Biblia kijtoua ke “tein David kichiujka amo kuali katka iixpan Jiova” (2 Samuel 11:27).

Nejin eyi takamej mopolojkej uan seki taman tein kichiujkej katkaj uejueyi tajtakolmej. Sayoj ke, kemej tikitaskej, semi kiyolnejnekiaj kitakamatiskej Dios. Kinextijkej ke kinyolkokoj tein kichiujkej uan kiixtalijkej kipataskej tein monekia itech ininnemilis uan nejon kiyolpaktij Dios. Yejua ika, maski mopolojkej, Biblia kijtoua ke yejuan kipiayaj ueyi takuaujtamatilis.

Kemej titajtakouanij, tinochin tikpiaj nepololmej (Romanos 3:23). Sayoj ke, keman timopoloskej moneki timoyolnonotsaskej oso tiknextiskej ke techyolkokoua tein tikchiujkej uan timochikauaskej tikmelauaskej tein tikchiujkej iixpan Dios.

¿Keniuj Job, Lot uan David kitemojkej kimelauaskej ininnepololuan iuan Dios? Job, akin katka yolkuali, kiyolkokoj tein kijtoj uan kipatak  itanemilil satepan ke Dios kipaleuij (Job 42:6). Lot, ijkon kemej Dios, amo kuali kiitaya auilnemilis tein kichiuayaj ompa Sodoma uan Gomorra. Yejua mopoloj porin peuak kinemilia ox kuali yetoya maj kikauani ichan kemej Dios kiluijka. Sayoj ke satepan tatakamatik. Kikaujteuak nochi tein kipiaya ompa uan amo kiyolkokoj. Uan maski David kitapanauilij iTanauatil Dios, kinextij ke katka yolkuali: kiajsikamatik ke tein kichiujka amo kuali yetoya uan kitataujtij Dios maj kitapojpoluiani (Salmo 51).

Dios kimati ke tejuan titajtakouanij. Yejua ika, nepololmej tein kipiakej nejon takamej amo kipatak kemej yejuatsin kinitaya. Dios amo techtajtania tein amo uelis tikchiuaskej porin “kuali techixmati keniuj tichijchiujtokej, uan kielnamiki ke tichijchiujtokej ika talnex” (Salmo 103:14). Komo ijkon, ¿toni kichia maj tikchiuakan?

Tanankilil tikajsij itech tajtolmej tein David kiluij ikonetsin: “Uan tejua, Salomón, nokonetsin, xikixmati iDios mopopaj uan xiktekitili ika moyolo ajsitok” (1 Crónicas 28:9). ¿Uan toni kijtosneki se kitekitilis Dios ika se yolo ajsitok oso ika nochi se iyolo? Kijtosneki se kitasojtas uan se kiyolnejnekis se kiixmatis uan se kitakamatis itanauatiluan. Amo kijtosneki maj senkis amo se mopolo. Akin kitekitilia Dios ika nochi iyolo kinejneki maj yejuatsin kiyekana uan mokaua maj kimelaua. Porin Job ijkon kichiuaya, Dios kijtoj ke “amo kipiaya tein ika kiteluiliskej uan katka yolmelauak”, Lot kijtouilij ke katka “yolchipaukatagat” uan ke David kichiuaya “sayoj tein melauak”. Maski mopolojkej, kiyolpaktijkej Dios.

Komo kemansa tikpiaj amo kuali tanemililmej, tikijtouaj teisa tein amo tiknekiaj oso tikchiuaj teisa uan satepan tikitaj ke amo kuali yetoya, maj amo timosenkauakan. Maj tikelnamikikan tein kichiujkej nejin eyi itekitikauan Dios. Yejuatsin kimati ke tinochin titajtakouanij yejua ika timopolouaj. Sayoj ke, kichia maj tiktekitilikan ika nochi toyolo, tein kijtosneki, maj tiktasojtakan uan maj timochikauakan tiktakamatiskej. Komo ijkon tikchiuaj, senkis tikyekmatij ke tikyolpaktiskej Dios.