Videos tein tikinitaj itech uejueyi nechikolmej techpaleuiaj maj okachi tikajsikamatikan tein Biblia kijtoua. Ueyi nechikol tein mochiuak itech 2020 “¡Maj nochipa tiyolpakikan!” kipiaya 71 videos, uan 43 videos kipiayaj tanojnotsmej tein kitemakakej Oloch Taojtokaltianij uan akin kinpaleuiaj, sennochia katkaj 114 videos. ¿Tionmotajtaniani tekit tein mochiua uan kanachi moixtaua para mochijchiuaskej nejin videos?

 Kemej 900 tokniuan akin tataman kayomej uan kimatij kichiuaskej seki taman, tapaleuijkej maj mochijchiuakan videos para nejin ueyi nechikol. Itech ome xiuit tein uejkauak nejin tekit, tokniuan tapaleuijkej kemej 100,000 horas. De nejin 100,000, 70,000 horas kikuikej para kichijchiuaskej tamouisol tein uejkaua 76 minutos tein motokaytia Nehemías: Yolpakilis tein Jiova kitemaka techpaleuia maj titaxikokan.

 Tikyekmatij ke monekik miak tomin para, kinyekpiaskej akin tapaleuijkej, para kikouaskej nochi tein mokuiskia, uan para tachijchiuaskej kampa mochiuaskia nejin tekit.

 Jared Gossman, akin tekiti itech Servicios de Audio uan Video, kijtoua: “Tokniuan akin kinpaleuiaj Oloch Taojtokaltianij uan kiixyekanaj tein motamachtia kitemouaj maj itech videos moitakan tokniuan akin seseko kayomej. Nejin kinextia ke tinochin tiiknimej uan ke kuali timouikaj. Nejin tekit uelik mochiuak, porin 24 Oloch tokniuan akin kayomej itech 11 altepemej tapaleuijkej, uan yejua ika monekik miak tomin, monekik kuali kiixtaliskej uan kiitaskej keniuj mochiuaskia nejin tekit”.

 Monekik mokouas miak taman tein ika kichijchiuaskiaj nejin videos. Keman mochijchiuak tamouisol Nehemías: Yolpakilis tein Jiova kitemaka techpaleuia maj titaxikokan, tachijchiujkej kampa mochijchiuaj videos ompa Mount Ebo, kampa ika Patterson (Nueva York). Para amo kiauiloskej tomin tein motemaka, tokniuan kichijchiujkej seki taman tein moitaya kemej tepamit uejkaujkayot, tein kiyoualouaya Jerusalén. Sejse tepamit uejkapan katka kemej 6 metros, uan chijchiujtoya ika kouit tein kipikkej ika seki taman tein nesia kemej tet. Nejin tepamit uelia kioliniayaj uan kitaliayaj kampa kichiuayaj okseki grabaciones, ijkon tapaleuij maj mokui itech okseki taman. Maski ijkon, ipa mokuik kemej 100,000 dólares para kichiuaskej nejin tekit. a

 Tikmatiskej nochi nejin techpaleuia maj okachi tikpatiuitakan ueyi nechikol tein uejkaua eyi tonal tein mochiuak nejin xiuit. Tikyekmatij ke nochi nejin tekit kichiuas maj moueyitali Jehová itech nochi taltikpak. Miak tasojkamatik porin nantapaleuiaj ika namotomin para maj mosentoka motanojnotsa uan nankitemakaj itechdonate.mr1310.com uan kemej ipa nankichiuanij.