Onimoskalti itech se altepetsintli tlen kajki Los Ángeles (California, Estados Unidos), ompa sapanoua okitekitiltiayaj drogas uan miakej sapanoua omoteuiayaj. Achto otlakatki se nokni, satepan ne onitlakatki uan notatajuan ok okinpixkej naui nokniuan.

Ijkuak onikatka nichokotsin, nonantsin otechuikaya itech se teopan evangélica. Pero ijkuak onimochi nitelpochtli uan oniaya teopan amitlaj onimomachtiaya. Nochi domingos oniaya teopan para nitlakuikas, pero itech okseki tonalmej san oniktekitiltiaya drogas uan oniauilnemiaya.

Ijkuak itlaj onechiluiayaj san niman onikualaniaya uan oniknekiaya nikinteuis. San tlen tlamantli oniktekitiltiaya para ika nitlateuis uan nitlatlanis. Tlen onimomachtiaya itech teopan amo onechpaleui. Nochipa onikijtouaya: “ToTajtsin Dios kinamiki momakopas uan ne san nikpaleuia”. Itech xiuitl 1960 ijkuak onikpiaya 18 xiuitl onimokajkalaki itech política inmiuan akinmej omotokayotiayaj Panteras Negras, ompa opouiayaj akinmej omochijchikauayaj para nochtin ma kintlakaitakan. Opejki nimouika inmiuan akinmej ijkon okichiuayaj ompa escuela. Ualeua otimonechikouayaj para tikijtoskej tlen otimokuayejyekouayaj, ik non, ayakmo otlamachtiayaj itech escuelas.

Pero amo san nin tlamantli onikchiuaya. Satepan okachi opejki nitekokolia, ik non, okachi onitetlajyouiltiaya. Ualeua iuan noyolikniuan otiayaj cine, otikinmitayaj películas kanin omotaya ken ompa Estados Unidos okinchiuiliayaj tlen amo kuali tlakamej tlen inmialtepe okatka África. Sapanoua otikualankej uan otikinteuijkej telpochmej tlen okatkaj ompa cine uan otikintemojkej inkalijtik akinmej ixchipajkej para noijki tikinteuiskej.

Nokniuan uan ne nochipa otikchiuayaj tlen amo kuali, ik non, tekiuajkej yokimatiayaj amo tiyolkualmej. Se nokni omouikaya iuan akinmej sapanoua otlateuiayaj uan ne noijki inmiuan onimouikaya. Ne san onikchiuaya tlen amo kuali.

Itatajuan se noyolikni okatkaj iTlaixpantijkauan Jehová uan onechyolejkej inmiuan ma nimonechiko. Ijkuak inmiuan onimonechiko onikitak yejuan amo kichiuaj ken oksekimej. Nochtin okipiayaj se Biblia uan okitlajtoltiayaj. ¡Noijki chokotsitsintin okipanoltiayaj seki tlamachtilmej ika Biblia! Onechtlajtlachialti nikmatis toTajtsin Dios itoka Jehová uan nochtin okinotsayaj ika itoka (Salmo 83:18). Amo omochikoitayaj, nochtin kuali omouikayaj.

Amo onechpaktiaya ma nechmachtikan ika Biblia, san onechpaktiaya nimonechikos. Se youak ijkuak otimonechikojkej, noyolikniuan oyajkej kanin otlatsotsonayaj uan okimiktijkej se telpochtli porque okinekiayaj kikixtiliskej ichamarra. Yejuan omoueyinekiayaj porque ijkon okichijkej. Maski okatkaj inmixpan tekiuajkej amitlaj okintekipachouaya. Nochtin yejuan okinmiluijkej nochipa tsaktoskiaj. ¡Oniyolpakik porque non tonal amo inmiuan onikatka! Ik non, onikijto nimomachtis Biblia uan nikchiuas tlen kuali.

Ne sapanoua onitechikoitaya pero onechtlajtlachialti tlen okichiuayaj iTlaixpantijkauan Jehová. Nikilnamiki ijkuak onikitak se iTlaixpantijka Jehová ixchipauak omonekiaya yas okse altepetl, ikoneuan okinkajte iuan se familia tlen amo okatka ixchipajkej. Noijki se familia tlen ixchipauak okikalotijkej se telpochtli tlen amo ixchipauak. Onikneltokak iTlaixpantijkauan Jehová motlasojtlaj ken iknimej, ijkon ken Jesús okijto itech Juan 13:35: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah”. Onikajsikamatki tokniuan melauak motlasojtlaj.

Ijkuak opejki nimomachtia Biblia onikajsikamatki omonekiaya nikpatlas tlen onikchiuaya. Onimochijchika ika nochi noyolo para amo san niman nikualanis (Romanos 12:2). Yolik opejki nikpatla nonemilis uan itech enero xiuitl 1974, onimoapolakti uan onimochi iTlaixpantijka Jehová.

Maski yonimoapolakti ok omonekiaya nimochijchikauas para amo nikualanis. Se tonal, ijkuak otiktlapouijtokaj se familia, onikitak se tlakatl okichtektoka radio tlen okipiaya nocarro. San niman oniktokak tlakatl. Ijkuak yinikkitskiskia ye okitlamotlak radio uan ocholo. Satepan onikinmilui tokniuan tlen opanok, se tokni onechtlajtlani: “¿Tlen tikchiuaskia tla tikkitskiskia?”. Tlen onechilui tokni onechpaleui ma nikajsikamati ok omonekiaya nikpatlas ken onimokuayejyekouaya.

Octubre xiuitl 1974, okachi opejki nitetlapouia. Onitlamachtiaya ika Biblia kanaj cien horas itech se metstli. Satepan onechyolejkej ma nitlapaleuiti itech kali Betel ompa Brooklyn (Nueva York). Itech 1978 onimokopki nokalijtik para nikmaluis nonantsin porque omokokouaya. Ome xiuitl satepan onimonamikti iuan Aarhonda. Nosiua nochipa onechyolchika uan san sekan otikmaluijkej nonantsin hasta ijkuak oixpoliuik. Satepan otechyolejkej ma timomachtitij itech tlamachtil ika Biblia tlen kichiua Watchtower itech Galaad. Ijkuak otlanki otimomachtijkej, otechtitlankej Panamá uan ompa titlapaleuijtokej.

Maski yonimoapolakti, ok moneki nikpatlas ken nimokuayejyekoua uan ayakmo san niman nikualanis. Tla nikita san niman nikualanis okachi kuali san niman nio. Nosiua uan oksekimej nechiluiaj kuali tlen nikchiua, ualeua nimotlajtlachialtia porque ayakmo san niman nikualani. Kuali nikmati san noselti amo uelis ijkon nikchiuaskia. Axkan melauak nikneltoka Biblia kipia chikaualistli para kipatlas tonemilis (Hebreos 4:12).

Biblia onechpaleui amo san niman ma nikualani uan ma niyolpaki. Axkan ayakmo ikaj nikteuia, okachi kuali nikinpaleuia ma kixmatikan toTajtsin Dios. Noijki onikmachti se tlakatl akin iuan onimokualaniaya ijkuak otimomachtiayaj escuela. Ijkuak omoapolakti san sekan otichantiayaj seki xiuitl uan axkan ok kuali timouikaj. Nosiua uan ne yotikinpaleuijkej kanaj ochenta tlakamej uan siuamej ma mochiuakan iTlaixpantijkauan Jehová.

Niktlasojkamatilia Jehová porque onechpaleui ma nikpatla nonemilis, axkan melauak niyolpaki uan kuali nimouika inmiuan tokniuan.