2 Pedro 3:1-18
3 Nokniuan, nin okse carta tlen namechijkuililia ijkon ken achto onamechijkuilili. Namechyolchikaua kuali ximokuayejyekokan* para nankilnamiktoskej tlen yinankimatij.
2 Ijkon nankilnamikiskej tlen yiuejkika okijtojkej profetas yolchipauakej uan tlen otlamachti toTeko akin techmakixtia. Non tlamachtil onamechmatiltijkej apóstoles.
3 Okachi ipati xikmatikan itlamian tonalmej yetoskej akinmej tepinauiskej uan kichiuaskej tlen kinyoltilana.
4 Yejuan kijtoskej: “Cristo okijto touan mokopaskia, ¿kanin kajki axkan? Desde ijkuak oixpolikej touejkatatajuan nochi kajki ijkon ken ijkuak toTajtsin Dios opejki tlachijchiua”.
5 Yejuan amo kinekij kilnamikiskej iluikak yiuejkika kajki, uan toTajtsin Dios okijto mamoxelo tlali uan atl uan tlali mamokaua itlajko atl.
6 Non okinmixpolo akinmej ijkuakon oyoltokaj ijkuak otlatenki ipan tlaltikpak.
7 Pero toTajtsin Dios noijki okijto iluikak uan tlaltikpak tlen axkan katej kichixtokej tlitl. Noijki tlatitokej hasta ijkuak ajsis tonal tlaixkomakaskej uan ijkuak kinmixpoloskej akinmej amo yolkualmej.
8 Nokniuan, amo xikilkauakan Jehová kita se tonal ken 1,000 xiuitl uan 1,000 xiuitl kita ken se tonal.
9 Jehová amo yolik kichiua tlen kijtoua ijkon ken sekimej kineltokaj. Okachi kuali ye namechchixtok ximoyolkopakan porque amo kineki ikaj maixpoliui.
10 Pero itonal Jehová ajsiki ijkon ken se ichteki. Non tonal tlatikuinis uan iluikak ualpojpoliuis. Patis nochi tlamantli totonik tlen onka iluikak uan tlaltikpak. Tlatlas tlaltikpak uan nochi tlen ipan onka.
11 Nochi non tlamantli ijkon patis ikinon ¡ximokuayejyekokan* ken moneki nankipiaskej namoyelis! Xiyetokan nanyolchipauakej uan xikteititikan nankiueyichiuaj toTajtsin Dios.
12 Noijki xikchixtokan itonal Jehová uan amo xikilkauakan. Non tonal, iluikak tlatlas uan totonik kipatiltis nochi tlen onka iluikak uan tlaltikpak.
13 Pero tikchiaj se yankuik iluikak uan se yankuik tlaltikpak ijkon ken yokijto toTajtsin Dios. Ompa nochtin kichiuaskej tlen kuali.
14 Nokniuan, namejuan nankichixtokej nin tlamantli ikinon ximochijchikauakan kuali ximouikakan iuan toTajtsin Dios, ximochijchikauakan manamechita nanchipauakej uan amo xikpiakan itlaj tlen amo kuali.
15 Noijki ximokuayejyekokan* toTeko mochia porque techkauilia matimomakixtikan. Ijkon ken noijki onamechijkuilili tokni Pablo tlen tiktlasojtlaj. Ye ijkon okijkuilo porque okiseli ixtlamatilistli.
16 Ye okijto non tlamantli itech nochi icartas. Pero seki tlamantli tlen okijkuilo oui tikajsikamatiskej. Akinmej amitlaj kimatij uan akinmej amo kipiaj chikauak intlaneltokilis, kipapatlaj tlen okijkuilo uan noijki iTlajtol toTajtsin Dios pero san inselti moixpoloskej.
17 Nokniuan, namejuan yinankimatij nin tlamantli, ikinon ximotlachilijtokan para amo manamechxelokan ika tlen amo kuali kichiuaj akinmej kixnamikij tlanauatil uan ayakmo nanyektlaneltokaskej.
18 Okachi kuali, ximochijchikauakan okachi nankixmatiskej toTeko Jesucristo tlen temakixtia uan okachi manamechtliokoli tlen kuali. Ye makiueyitlalikan axkan uan nochipa. Amén.
