Gálatas 3:1-29
-
Moijtoua akin kitlakamati tlanauatil uan akin tlaneltoka (1-14)
-
“Akin yolkuali yoltos porque tlaneltoka” (11)
-
-
Tlen toTajtsin Dios okilui Abrahán amo kisa itech iTlanauatil Moisés (15-18)
-
Ixui Abrahán ye Cristo (16)
-
-
Moijtoua tleka okitemakakej iTlanauatil Moisés uan ken otlapaleui (19-25)
-
Ikoneuan toTajtsin Dios porque tlaneltokaj (26-29)
-
Akinmej iaxkauan Cristo yejuan ixuiuan Abrahán (29)
-
3 Namejuan akinmej nanchantij Galacia amo namixtlamatkej. ¿Akin onamechkajkaya? Porque tejuan otimechyekiluijkej Jesucristo okimiktijkej itech kouitl.
2 Ne san nikneki namechtlajtlanis: ¿onankiselijkej espíritu santo porque nankitlakamatij* tlanauatil noso porque nankineltokaj tlen onankikakej?
3 ¿Melauak amo namixtlamatkej? Namejuan opejki namechyekana espíritu santo, ¿uan axkan nankinekij nanmoyekanaskej ika tlen mokuayejyekouaj* oksekimej?
4 ¿San nenka onantlajyouijkej? Ne kuali nikmatok amo san nenka onantlajyouijkej.
5 Akin namechmaka espíritu santo uan kinchiua milagros namoixpan, ¿kichiua porque nankitlakamatij* tlanauatil noso porque nankineltokaj tlen onankikakej?
6 Ijkon okipanok Abrahán: “Okineltokak Jehová uan ye okitak okatka se tlakatl yolkuali”.
7 Namejuan yinankimatij akinmej tlaneltokaj yejuan ikoneuan Abrahán.
8 ToTajtsin Dios okijto itech iTlajtol kinmitaskia yolkualmej akinmej amo judíos porque tlaneltokaj, ikinon yiuejkika okimatilti kuali tlajtoli Abrahán uan okilui: “Por te nikinteochiuas nochi altepemej”.
9 Ikinon akinmej tlaneltokaj kinteochiuaskej iuan Abrahán porque ye otlaneltokak.
10 Kinuijuikaltiaj nochtin tlen san kineltokaj tlanauatil porque ijkuilitok: “Makiuijuikaltikan akin amo mochijchikaua kichiuas nochi tlen kijtoua rollo kanin ijkuilitok iTlanauatil Moisés”.
11 Noijki kuali tikmatij toTajtsin Dios amo kita yolkuali akin kitlakamati* tlanauatil porque ijkuilitok: “Akin yolkuali yoltos porque tlaneltoka”.
12 Akin kitlakamati* iTlanauatil Moisés amo moneki tlaneltokas porque ijkuilitok: “Akin kitlakamati* Tlanauatil kipaleuia mayolto”.
13 Cristo otechko uan otechmakixti para amo matechuijuikaltikan ijkon ken kijtoua iTlanauatil Moisés. Ye topatka okiuijuikaltijkej porque ijkuilitok: “Makiuijuikaltikan akin kipilouaj itech se kouitl”.
14 Nin opanok para makinteochiuakan altepemej ika Cristo Jesús ken okiluijkej Abrahán. Ijkon tikseliskej espíritu santo tlen toTajtsin Dios okijto techmakas porque titlaneltokaj.
15 Nokniuan, namechiluis se neskayotl:* ijkuak mochiua se acuerdo* maski san se tlakatl okichi, amikaj uelis kijtos ayakmo mamochiua nion amitlaj uelis kajxitiliskej.
16 ToTajtsin Dios okinmilui Abrahán uan ixui tlen kichiuaskia. ITlajtol toTajtsin Dios amo kijtoua “moxuiuan” ken yetoskiaj miakej. Ompa kijtoua “moxui” uan nin kijtosneki san se tlakatl ye Cristo.
17 Noijki namechiluia nin tlamantli: toTajtsin Dios achto okijto tlen kichiuaskia uan 430 xiuitl satepan okitemakak iTlanauatil Moisés ikinon tlanauatil amo uelis kipojpolos iacuerdo* toTajtsin Dios. Noijki amo uelis kipojpolos tlen yokijto kichiuas.
18 Tla techaxkatiliskej tlen tikseliskej porque tiktlakamatij* tlanauatil, kijtosneki ayakmo kisa itech tlen toTajtsin Dios okijto kichiuas. Pero toTajtsin Dios ika tlasojtlalistli okaxkatili Abrahán tlen kiselis ika tlen okijto kichiuas.
19 Tla ijkon, ¿tleka okitemakakej iTlanauatil Moisés? Okitemakakej para mamoteititi tlen amo kuali hasta ijkuak ouala teixui tlen okiluijkej tlen kichiuas toTajtsin Dios. ToTajtsin Dios okinmakak tlanauatil ángeles uan yejuan okimatiltijkej Moisés. Satepan Moisés okinmatilti tlanauatil oksekimej.
20 Tla ikaj iselti moyekkaua itlaj kichiuas, amo moneki ikaj kipaleuis. Noijki ijkon toTajtsin Dios iselti okijto tlen kichiuas.
21 Tla ijkon, ¿kijtosneki iTlanauatil Moisés kixnamiki tlen toTajtsin Dios kijtoua kichiuas? ¡Amo! Tla kitemakaskiaj se tlanauatil tlen kichiuaskia matiyoltokan, techitaskiaj tiyolkualmej porque tiktlakamatij* tlanauatil.
22 Pero iTlajtol toTajtsin Dios okiteititi nochtin katej imak tlajtlakoli. Ijkon akinmej tlaneltokaj uelis kiseliskej tlen toTajtsin Dios okijto kinmakas akinmej kineltokaj Jesucristo.
23 Pero ijkuak ayamo otikneltokayaj Cristo, otechnauatiaya tlanauatil porque imak otikatkaj. Otikchixtokaj tlen yikiteititiskia toTajtsin Dios.
24 Ikinon iTlanauatil Moisés otechmalui uan otechyektlali matikselikan Cristo. Ijkon uelis techitaskiaj tiyolkualmej porque titlaneltokaj.
25 Pero axkan tikneltokaj Cristo uan ayakmo moneki matechmalui tlanauatil.
26 Nochtin namejuan nanikoneuan toTajtsin Dios porque nankineltokaj Cristo Jesús.
27 Porque nochtin namejuan onamechapolaktijkej para xiyetokan iuan Cristo uan axkan nankichiuaj ken ye.
28 Amitlaj ipati tla nanjudíos, nangriegos, nantlakeualmej noso amo nantlakeualmej. Noijki amitlaj ipati tla nantlakamej noso nansiuamej porque nochtin namejuan san sekan nankatej iuan Cristo Jesús.
29 Tla namiaxkauan Cristo, kijtosneki namixuiuan Abrahán uan nankiseliskej tlen toTajtsin Dios okijto namechaxkatilis.
Notas
^ Noso “nankiuelkakij”.
^ Noso “monejneuiliaj”.
^ Noso “nankiuelkakij”.
^ Noso “kiuelkaki”.
^ Noso “kiuelkaki”.
^ Noso “kiuelkaki”.
^ Noso “ejemplo”.
^ Noso “pacto”. Xikita diccionario.
^ Noso “ipacto”. Xikita diccionario.
^ Noso “tikuelkakij”.
^ Noso “tikuelkakij”.
