Apocalipsis 1:1-20
1 ToTajtsin Dios itlaj okinextili Jesucristo para kinmititis itlakeualuan tlen san niman panos. Jesucristo okiualtitlanki iángel makiluiki Juan tlen kijtosneki nochi tlen panos. Juan itlakeual toTajtsin Dios.*
2 Ye okitematilti tlajtoli tlen okitemakak toTajtsin Dios uan tlen okitematilti Jesucristo. Ye okitematilti nochi tlen okitak.
3 Paki akin chikauak kitlajtoltia nin profecía. Noijki pakij akinmej kikakij uan kichiuaj tlen ompa ijkuilitok porque yiajsis tonal tlen omoijto.
4 Ne niJuan uan nikintlajkuililia chikome tlanechikolmej tlen katej Asia:
“ToTajtsin Dios tlen axkan kajki, tlen yokatka uan tlen uits” manamechtliokoli tlen kuali uan manamechmaka yolseuilistli. Noijki manamechtlasojtlakan chikome espíritus tlen katej ixpan itrono uan manamechmakakan yolseuilistli.
5 Jesucristo noijki manamechtlasojtla uan manamechmaka yolseuilistli. Ye Testigo Yolmelauak, ye achto okiyolitijkej uan kinnauatia tekiuajkej tlen katej tlaltikpak.
Ye techtlasojtla uan ika ieso otechmakixti imak totlajtlakol.
6 Noijki okichi matiyetokan titekiuajkej uan titeopixkej para tiktekichiuiliskej iDios uan iTajtsin. Ye nochipa makiueyitlalikan uan nochipa makipia chikaualistli. Amén.
7 Ye uits ipan mixtli uan nochtin kitaskej, hasta akinmej okitsopitijkej. Ipan tlaltikpak nochtin familias moelpanuitekiskej uan tlauelchokaskej por ye. Amén.
8 ToTajtsin Dios Jehová kijtoua: “Ne niAlfa uan niOmega.* Akin axkan kajki, yokatka uan uits. Akin kipia nochi chikaualistli”.
9 Ne Juan onikatka itech isla tlen itoka Patmos porque onikijtouaya akin toTajtsin Dios uan oniktematiltiaya akin Jesús. Ne namokni uan namouan nechtlajyouiltiaj, namouan niyetos itech tekiuajkayotl uan namouan nitlaxikos porque tikatej iuan Jesús.
10 Espíritu santo okichi manikita tlen omonekiaya panos itech itonal toTeko. Nokuitlapan onikkak ikaj chikauak otlajto ijkon ken ijkuak kipitsaj se trompeta.
11 Ye onechilui: “Itech se rollo xikijkuilo tlen tikita uan xikintitlanili chikome tlanechikolmej tlen katej Éfeso, Esmirna, Pérgamo, Tiatira, Sardis, Filadelfia uan Laodicea”.
12 Onimokopki para nikitas akin onechtlapouiaya. Ijkuak onimokopki, onikinmitak chikome candelabros de oro.
13 Intlajko candelabros onikitak ikaj tlen omotaya ken se ikone tlakatl. Itlaken oajsiaya hasta ikxitlan uan oelpanilpitoka ika oro.
14 Itsonteko uan itsonkal okatka istak ijkon ken ichkatsojmitl uan ijkon ken nieve. Ixtololouan okatkaj ken tlitl.
15 Ikxiuan opetlaniayaj ken cobre tlen kipatiltiaj ijtik tlitl uan petlani. Itlajtol omokakiaya ken ijkuak ijkoyoka miak atl.
16 Iyekma okinpiaya chikome sitlalimej. Itech ikamak okisaya se espada ueyak tlen ojka tlateki uan oyektentitoka. Ixko opetlaniaya ijkon ken ijkuak chikauak tona.
17 Ijkuak onikitak, ikxitlan oniuetsito ken yetoskia onimiki.
Ye nopan okitlali iyekma uan onechilui: “Amo ximomojti. Ne niAchto uan niSaiktlami
18 uan niyoltok. Ne onixpolika pero axkan nochipa niyoltos. Nikinpixtok llaves para niktlapos ipuerta mikilistli uan ipuerta Mikatekochtli.*
19 Xikijkuilo tlen otikitak, tlen axkan panotok uan tlen satepan panos.
20 Nin tlamantli santo tlen amo omomatiaya itech chikome sitlalimej tlen otikinmitak noyekma uan chikome candelabros de oro: chikome sitlalimej kijtosneki ángeles tlen katej itech chikome tlanechikolmej. Chikome candelabros kijtosneki chikome tlanechikolmej”.
Notas
^ Noso “itlakeual Jesús”.
^ Alfa ika opeuaya abecedario griego uan otlamiaya ika omega.
^ Ika griego moijtoua Hades. Xikita diccionario.
