Filipenses 1:1-30
1 Ne Pablo uan Timoteo tiktekichiuiliaj Cristo Jesús. Tejuan timechtitlaniliaj nin carta namejuan tokniuan yolchipauakej tlen nanchantij Filipos uan nankatej iuan Cristo Jesús. Noijki timechtitlaniliaj namejuan tlayekankej uan siervos ministeriales:
2 ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.
3 Nochipa niktlasojkamatilia toTajtsin Dios ijkuak namechilnamiki.
4 Ne namopatka nimotlatlaujtia uan nipaki ijkuak ijkon nikchiua,
5 porque nankitematiltiaj kuali tlajtoli desde ijkuak onankikakej uan hasta axkan ijkon nankichiuaj.
6 Ne nikmati toTajtsin Dios kitlamis kuali tekitl tlen namotech okipeualti uan ijkon kichijtos hasta ajsis itonal Cristo Jesús.
7 Kuali ijkon nimokuayejyekoua* porque namejuan nankatej noyolipan. ToTajtsin Dios nechtliokolia tlen kuali uan non namechpaleuia porque onantechpaleuijkej ijkuak onitsaktoka. Noijki inmixpan tekiuajkej onantechpaleuijkej para matechkauilikan matitetlapouikan kuali tlajtoli.
8 ToTajtsin Dios kimati ne namechilnamiki uan namechtlasojtla ken Cristo Jesús namechtlasojtla.
9 Nochipa nimotlatlaujtia para okachi xitetlasojtlakan, nochi kuali xikajsikamatikan, kuali ximokuayejyekokan,*
10 kuali xikitakan tlen tlamantli okachi ipati para amo nankipiaskej itlaj amo kuali uan amo nankinmikxitlanuiskej oksekimej hasta ajsis itonal Cristo.
11 Noijki manamechpaleui kuali tekitl tlen Jesucristo technauatia matikchiuakan, para kiueyitlaliskej uan kiueyichiuaskej toTajtsin Dios.
12 Nokniuan, nikneki xikmatikan tlen nechpanotok tlapaleuia mamotematilti kuali tlajtoli,
13 porque nochtin soldados tlen kimaluiaj tekiua uan nochtin oksekimej kimatij nitsaktok porque nikchiua ken Cristo.
14 Axkan miakej tokniuan tlen kitekichiuiliaj toTeko okachi tlaneltokaj porque nitsaktok. Yejuan okachi yolchikauakej uan amo momojtiaj ijkuak kitematiltiaj iTlajtol toTajtsin Dios.
15 Sekimej kitematiltiaj akin Cristo porque tlaixnekij uan motlatlanij, pero oksekimej kichiuaj ika nochi inyolo.
16 Akinmej kichiuaj ika nochi inyolo tetlapouiaj akin Cristo porque tetlasojtlaj uan kimatij onechtlalijkej manitlapaleui mamotetlapoui kuali tlajtoli.
17 Pero akinmej tlaixnekij uan motlatlanij amo tetlapouiaj ika nochi inyolo. Yejuan kinekij nechtlajyouiltiskej maski nitsaktok.
18 ¿Ken tlapaleuia non? Oksekimej kikakij akin Cristo maski akinmej tetlapouiaj kichiuaj ika nochi inyolo noso amo. Non kichiua manipaki uan nochipa nipakis,
19 porque nikmati nopatka nanmotlatlaujtiaj uan non nechpaleuis manimomakixti. Noijki Jesucristo nechpaleuia ika espíritu santo.
20 Non mouika ika tlen nikneki uan tlen nikchia ikinon amitlaj kichiuas manipinaua. Ne kuali nikmati amitlaj nechtsakuilis manitetlapoui. Ijkon nikueyitlalis Cristo ken nochipa nikchiua maski niyoltos noso niixpoliuis.
21 Porque tla niyoltos, nikchiuas ken Cristo pero okachi kuali tla niixpoliuis.
22 Tla moneki niyoltos itech nin cuerpo kijtosneki okachi uelis niktekichiuilis Cristo. Pero amo nikijtos tlen nikpejpenaskia.
23 Kajki nin ome tlamantli pero amo nikmati katli nikpejpenas. Porque nikneki nimomakixtis uan okachi kuali niyetos iuan Cristo.
24 Pero moneki maniyolto itech nin cuerpo porque non namechpaleuis.
25 Ne ijkon nikneltoka ikinon nikmati ok niyoltos uan namouan niyetos para okachi nankitekichiuiliskej toTajtsin Dios uan nanpakiskej porque nantlaneltokaj.
26 Ne namechpaleuis okachi xikneltokakan Cristo Jesús ijkuak oksepa namouan niyetos.
27 Xiyeknemikan ken kichiuaj akinmej kitematiltiaj kuali tlajtoli tlen kijtoua akin Cristo, ijkon tla nias namechitati noso amo namouan niyetos, nikmatis oksekimej kijtoskej kuali tlen nankichiuaj. Noijki nikmatis nanmoyekketokej uan san se tlamantli nanmokuayejyekouaj,* san sekan nankatej, nansepantekipanouaj para nankineltokaskej kuali tlajtoli
28 uan amo nankinmauiliaj* akinmej namechkokoliaj. Non kiteititia yejuan ixpoliuiskej pero namejuan nanmomakixtiskej, ijkon kineki toTajtsin Dios.
29 Namejuan onamechteochijkej para xikneltokakan Cristo pero noijki ipatka xitlajyouikan.
30 Ikinon namejuan nanmochijchikauaj ijkuak nantlajyouiaj ijkon ken onankitakej onimochijchika pero nankimatij ok nimochijchikaua.
Notas
^ Noso “nimonejneuilia”.
^ Noso “ximonejneuilikan”.
^ Noso “nanmonejneuiliaj”.
^ Noso “nankinmimakasij”.
