Hebreos 7:1-28
7 Melquisedec okatka tekiua itech altepetl Salem uan noijki okatka iteopixki toTajtsin Dios tlen Ueyititok. Ye okinamikito Abrahán uan okiteochi ijkuak omokopato okinmiktito tekiuajkej.
2 Abrahán okimakak se majtlaktli parte nochi tlen okipiaya. Itoka Melquisedec kijtosneki “tekiua yolkuali”. Noijki tlanauatia Salem uan nin kijtosneki “tekiua tlen teyolseuia”.
3 Amo momati akin ipapa uan akin imama, amo kanaj ijkuilitok kanin ouala, keman oneski* nion keman oixpoliuik. Pero ye omochi ken iKone toTajtsin Dios ikinon nochipa yetos teopixki.
4 Xikitakan non tlakatl sapanoua oueyititoka, ikinon touejkatata Abrahán okimakak se majtlaktli parte tlen okachi kuali okitlanki ijkuak okimomakato.
5 ITlanauatil Moisés kijtoua ikoneuan Leví tlen okintlalijkej mayetokan teopixkej omonekiaya kitlajtlaniskej diezmo itech altepetl. Nin kijtosneki okintlajtlaniliayaj diezmo inmikniuan maski okatkaj ixuiuan Abrahán.
6 Melquisedec amo opouiaya itech ifamilia Leví. Pero ye okiseli diezmo tlen okimakak Abrahán uan okiteochi akin okiluijkej tlen kichiuas toTajtsin Dios.
7 Nochtin kimatij akin ueyititok kiteochiua akin amo okachi ueyititok.
8 Levitas okiseliayaj diezmo maski oixpolikej nonmej tlakamej. Pero iTlajtol toTajtsin Dios kijtoua yoltok okse tlakatl tlen okiseliaya diezmo.
9 Uelis tikijtoskej Abrahán okitlaxtla diezmo ipatka Leví maski Leví okiseliaya diezmo.
10 Porque Leví ayamo onesiaya* ijkuak Melquisedec okinamikito iuejkatata.
11 Israelitas okinmakakej iTlanauatil Moisés uan ompa okijtouaya teopixkej kisaskiaj itech ifamilia Leví. Tla teopixkej tlen oualayaj itech ifamilia Leví uelis techkixtiliskiaj tlajtlakoli, ¿ok monekiskia se teopixki ken Melquisedec? ¿Amo san monekiskia se teopixki ken Aarón?
12 Moneki mopatlas iTlanauatil Moisés tla mopatlatok tekitl tlen okichiuayaj teopixkej.
13 Porque tlakatl tlen omoijto kichiuaskia nin tlamantli, ualaskia itech okse familia uan nion se tlakatl tlen poui itech non familia otlapaleui itech altar.
14 Tejuan tikmatij toTeko okatka ixui Judá pero Moisés amo okijto yetoskiaj teopixkej tlen opouiayaj itech non familia.
15 Nin tlamantli axkan okachi kuali moajsikamati porque omonexti okse teopixki ken Melquisedec.
16 Ye amo omochi teopixki porque poui itech se familia tlen tlapaleuiaj ken teopixkej ijkon ken kijtoua iTlanauatil Moisés. Ye omochi teopixki porque kipia chikaualistli tlen kichiua amo keman maixpoliui.
17 Nin tlen toTajtsin Dios okimatilti: “Te nochipa tiyetos titeopixki ken Melquisedec”.
18 Ikinon achto tlanauatil opojpoliuik porque amo kipia chikaualistli uan amo techpaleuia.
19 Porque iTlanauatil Moisés amo otechkixtili tlajtlakoli pero toTajtsin Dios okichi matikchiakan itlaj okachi kuali. Non techpaleuia matimotokikan inauak toTajtsin Dios.
20 ToTajtsin Dios okijto keman okitlali Jesús mayeto teopixki.
21 Sekimej tlakamej omochijkej teopixkej pero toTajtsin Dios amo okijto mayetokan teopixkej. Pero se tlakatl omochi teopixki ijkuak toTajtsin Dios okijto: “Jehová yokijto uan amo kipatlas tlen mokuayejyekoua:* ‘Te nochipa tiyetos titeopixki’”.
22 Jesús yokiteititi melauak mochiuas se acuerdo* tlen okachi kuali.
23 Teopixkej amo ouelik nochipa otekipanojkej porque oixpolitiajkej, ikinon okintlalijkej oksekimej teopixkej uan okichijkej inteki.
24 Pero Jesús nochipa yoltok ikinon amo moneki kipatkayotiskej oksekimej teopixkej.
25 Ye noijki kimati ken kinmakixtis akinmej kinpaleuia mamotokikan inauak toTajtsin Dios, porque ye nochipa yoltok uan inpatka motlatlaujtia.
26 Moneki tikpiaskej se teopixki tlen tlayekana ijkon ken ye. Ye amo kikaua toTajtsin Dios, amitlaj itlajtlakol, chipauak, amo kichiua ken tlajtlakolejkej uan kipanouia iluikak.
27 Ye amo ijkon ken oksekimej teopixkej porque amo moneki mojmostla kinmiktis yolkamej para makitlapojpoluilikan itlajtlakol uan makintlapojpoluilikan intlajtlakol oksekimej. Ye san se uelta omotemakak uan amo moneki oksepa motemakas.
28 ITlanauatil Moisés okijtouaya makintlalikan teopixkej tlen otlayekanayaj maski okatkaj tlajtlakolejkej. Pero ijkuak toTajtsin Dios okitemakak non tlanauatil, satepan okitemakak itlajtol kitlaliskia iKone ken teopixki tlen tlayekana, akin yomochi ajsitok uan nochipa ijkon yetos.
Notas
^ Noso “otlakatki”.
^ Noso “otlakatiaya”.
^ Noso “monejneuilia”.
^ Noso “pacto”. Xikita diccionario.
