Lucas 17:1-37
17 Ijkuakon Jesús okinmilui idiscípulos: “Yetoskej akinmej kichiuaskej oksekimej matlajtlakolchiuakan. Pero mialma akin kichiuas oksekimej ayakmo matlaneltokakan.
2 Okachi kuali makikechpililikan se ueyi tetl* uan makitlamotlakan ijtik mar. Ijkon amo kichiuas ayakmo matlaneltoka akin yolyamanki.
3 Namoneuian ximotlachilikan. Tla mokni tlajtlakolchiuas, xikajua pero xiktlapojpolui tla moyolkopas.
4 Tla se tonal chikome uelta itlaj omitstokti, uan chikome uelta mitsiluis xiktlapojpolui, moneki tiktlapojpoluis”.
5 Ijkuakon apóstoles okiluijkej Jesús: “Techpaleui okachi matitlaneltokakan”.
6 Ye okinmilui: “Tla namotlaneltokilis yetoskia ken se iyolo mostaza, uelis nankiluiskiaj nin kouitl* mamouiuitla uan mamotokati ijtik mar uan ye ijkon kichiuaskia”.
7 “Tla se namotlakeual otlaxouato noso otlajpiato, ¿nankiluiskej san niman mamotlali uan matlakua ijkuak mokopati?
8 ¿Amo nankiluiskej manamechtlakualchiuili, makipatla itlaken, manamechtlatekili uan ye tlakuas ijkuak tlamis nantlakuaskej?
9 Amo nankitlasojkamatiliskej namotlakeual porque okichi tlen onankinauatijkej.
10 Noijki namejuan ijkuak nankichiuaskej tlen namechnauatiskej, xikijtokan: ‘Tejuan san titlakeualmej uan amitlaj topati. San otikchijkej tlen omonekiaya tikchiuaskej’”.
11 Ijkuak Jesús oyajki Jerusalén, opanok ik Samaria uan Galilea.
12 Ijkuak yiajsiskia itech se altepetsintli, okinamikitoj majtlaktli tlakamej tlen opalaniaya innakayo* pero san uejka omoketskej.
13 Yejuan chikauak okiluijkej: “¡Jesús! ¡Tlamachti! ¡Techiknomati!”.
14 Jesús okinmitak nonmej tlakamej uan okinmilui: “Xikinmitatij teopixkej”. Yejuan opajtikej ijkuak oyajkej.
15 Se tlakatl ijkuak okitak opajtik, omokopki uan chikauak okiueyichijtiaj toTajtsin Dios.
16 Omotlankuaketski ikxitlan Jesús uan okitlasojkamatili. Non tlakatl oneski* Samaria.
17 Ijkuakon Jesús okijto: “¿Amo majtlaktli tlakamej opajtikej? ¿Kanin katej ok chiknaui tlakamej?
18 ¿San nin tlakatl omokopki okiueyichiuako toTajtsin Dios maski amo oneski* itech nin altepetl?”.
19 Jesús okilui tlakatl: “Ximoketsa uan xio, yotipajtik porque titlaneltoka”.
20 Fariseos okitlajtlanijkej Jesús keman uits iTekiuajkayo toTajtsin Dios. Ye okinnankili: “Amo nochtin kitaskej ijkuak uits iTekiuajkayo toTajtsin Dios.
21 Amo kijtoskej: ‘¡Nikan kajki!’ noso kijtoskej: ‘¡Ne kajki!’. Porque iTekiuajkayo toTajtsin Dios kajki namotlajko”.
22 Ijkuakon okinmilui idiscípulos: “Ajsis tonal nankinekiskej namouan mayeto iKone Tlakatl pero amo nankitaskej.
23 Miakej namechiluiskej: ‘¡Ne kajki!’ noso namechiluiskej: ‘¡Nikan kajki!’. Pero amo xiuiaj nion amo xikintokakan.
24 Itonal iKone Tlakatl yetos ken ijkuak tlapejpetlani uan tlauia kanin kisa tonaltsin hasta kanin motlatia tonaltsin.
25 Pero achto kitlajyouiltiskej uan kixtopeuaskej akinmej axkan yoltokej.
26 Ijkuak monextis iKone Tlakatl, panos ijkon ken ijkuak okatka Noé.
27 Miakej otlakuayaj, otlakoniayaj, tlakamej uan siuamej omonamiktiayaj hasta ijkuak Noé okalak ijtik arca. Satepan otlatenki uan nochtin oixpolikej.
28 Noijki panos ken ijkuak okatka Lot. Miakej otlakuayaj, otlakoniayaj, otlakouayaj, otlanemakayaj, otlatokayaj uan omokaltiayaj.
29 Pero ijkuak Lot okiski Sodoma, desde iluikak ouetski tlitl uan azufre ken kiauitl uan nochtin oixpolikej.
30 Noijki ijkon panos ijkuak monextis iKone Tlakatl”.
31 “Non tonal akin yetos ikpak* ikal, amo matemo makikixtiti tlen kipia ichan. Noijki akin yetos itlala amo mamokopa makikuiti* tlen okikajte.
32 Xikilnamikikan tlen okipanok isiua Lot.
33 Ixpoliuis akin kinekis kimakixtis iyolilis, pero momakixtis akin ixpoliuis.
34 Ne namechiluia, non youak ome san sekan kochiskej. Se kiuikaskej uan okse kikajteuaskej.
35 Ome siuamej san sekan tlapayantoskej. Se kiuikaskej uan okse kikajteuaskej”.
36 *
37 Ijkuak discípulos ijkon okikakej, okitlajtlanijkej: “ToTeko, ¿kanin ijkon panos?”. Ye okinnankili: “Kanin yetos akin yoixpoliuik,* ompa noijki mololoskej águilas”.
Notas
^ Nin se tetl tlen ika okikuechouayaj trigo uan burros okimalakachouayaj non tetl.
^ Non kouitl okiluiayaj mora.
^ Noso “okipiayaj lepra”.
^ Noso “otlakatki”.
^ Noso “otlakatki”.
^ Noso “ikuapak”.
^ Noso “makanati”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
^ Ika griego kijtosneki icuerpo se tlakatl noso se yolkatl.
