Mateo 2:1-23
2 Jesús oneski* altepetl Belén ompa Judea ijkuak otlanauatiaya Herodes. Ijkuakon oajsitoj ompa Jerusalén sekimej tlachixkej tlen oualayaj ik kanin kisa tonaltsin.
2 Yejuan otlajtlaniayaj: “¿Kanin kajki konetl tlen oneski* para kinnauatis judíos? Porque otikitakej isitlal ijkuak otikatkaj kanin kisa tonaltsin uan otiualajkej ixpan otimotlankuaketsakoj”.
3 Tekiua Herodes uan akinmej ochantiayaj Jerusalén omomojtijkej ijkuak ijkon okimatkej.
4 Herodes okinnotski nochtin teopixkej tlen otlayekanayaj uan akinmej otlamachtiayaj tlanauatil. Ye okintlajtlani kanin nesiskia* Cristo.*
5 Yejuan okinankilijkej: “Ye nesis* altepetl Belén ompa Judea, porque ijkon okijkuilo se profeta:
6 ‘Te Belén tlen tika Judá maski mota titsikitsin, okachi tiueyititok uan amo ken oksekimej tekiuajkej tlen katej Judá. Porque motech kisas se tekiua tlen kiyekanas noaltepe Israel’”.
7 Ijkuakon Herodes otlanauati makinmichtakanotsatij tlachixkej, uan okintlajtlani tlen tonal omonexti sitlali.
8 Satepan okintitlanki mayakan Belén uan okinmilui: “Xiktemotij kanin kajki konetl. Ijkuak nankajsiskej, techiluikij uan ne noijki nias ixpan nimotlankuaketsati”.
9 Ijkuak Herodes otlanki okintlapoui, yejuan oyajkej Belén. Uan okinyekanki sitlali tlen okitakej ik kanin kisa tonaltsin. Satepan sitlali omoketsato ipan kali kanin okatka chokotsin.
10 Tlachixkej opakej ijkuak okitakej sitlali.
11 Ijkuak okalakej, okitakej chokotsin uan noijki María. Yejuan omotlankuaketskej ixpan chokotsin uan okitliokolijkej oro, kopali istak uan mirra.
12 Pero toTajtsin Dios okinmilui ijkuak okochtokaj ayakmo makitatij Herodes, ikinon tlachixkej oyajkej itech okse ojtli ijkuak omokopkej inmialtepe.
13 Ijkuak tlachixkej oyajkej, iángel Jehová okimonextili José ijkuak okochtoka uan okilui: “Ximeua, xikuika chokotsin uan imama ompa Egipto. Ompa ximokaua hasta ijkuak ne nimitsiluis keman timokopas porque Herodes kitemos chokotsin para kimiktis”.
14 José youak omejki uan okiuikak chokotsin uan imama ompa Egipto.
15 Ompa omokajkej hasta ijkuak oixpoliuik Herodes. Ijkon omochi tlen Jehová okilui iprofeta: “Onikilui nokone makisa Egipto”.
16 Herodes sapanoua okualanki ijkuak okimatki tlachixkej okikajkayajkej. Ye okimatiaya kanaj keski xiuitl okipiaya chokotsin, ikinon otlanauati makinmiktikan nochtin chokotsitsintin tlen ayamo okipiayaj ome xiuitl ompa Belén uan itech okseki altepemej.
17 Ijkon omochi tlen okijto profeta Jeremías:
18 “Ompa Ramá omokak ikaj ochokaya uan omoyolkokouaya. Raquel okinchokiliaya ikoneuan uan amo okinekiaya ikaj makiyolseui porque yejuan oixpolikej”.
19 Ijkuak oixpoliuik Herodes, iángel Jehová okimonextili José ompa Egipto ijkuak okochtoka.
20 Okilui: “Ximeua, xikuika chokotsin uan imama ompa Israel. Porque yoixpolikej akinmej okinekiayaj kimiktiskej chokotsin”.
21 Ijkuakon José omejki uan okiuikak chokotsin uan imama ompa Israel.
22 Pero omomojti yas Judea porque okimatki ompa otlanauatiaya Arquelao, ikone Herodes. Pero ijkuak José okochtoka, toTajtsin Dios okilui mauia Galilea uan ye ompa oyajki.
23 Ye ochantito altepetl Nazaret. Ijkon omochi tlen okijtojkej profetas: “Kitokayotiskej Nazareno”.*
Notas
^ Noso “otlakatki”.
^ Noso “otlakatki”.
^ Noso “tlakatiskia”.
^ Noso “Mesías”, “Tlapejpenali”.
^ Noso “tlakatis”.
^ Ika hebreo nin tlajtoli xamo kijtosneki “oixuak” noso “oseliak”.
