Mateo 22:1-46
22 Jesús oksepa okintlapoui ika neskayomej.* Okinmilui:
2 “Tekiuajkayotl tlen kajki iluikak yetoskia ken se tekiua tlen okiluichiuili itelpoch ijkuak omonamikti.
3 Okintitlanki itlakeualuan makinnotsatij akinmej yaskiaj iluitl pero yejuan amo okinekej yaskej.
4 Satepan okintitlanki oksekimej itlakeualuan uan okinnauati: ‘Xikinmiluikan akinmej onikinyole: “Yikajki tlakuali. Yokinmiktijkej toros uan noyolkauan tlen okachi tojtomauakej. Nochi yikajki, xiualakan iluitl”’.
5 Pero yejuan amo okikakej tlen okinmiluijkej. Se oyajki itlala uan okse otlanemakato.
6 Oksekimej okinkitskijkej tlakeualmej, okintlajyouiltijkej uan okinmiktijkej”.
7 “Tekiua sapanoua okualanki uan okintitlanki isoldados makinmiktitij nonmej temiktijkej, uan makitlatikan inmialtepe.
8 Satepan okinmilui itlakeualuan: ‘Nochi yikajki para tiiluichiuaskej pero akinmej onikinyole amo omonekiaya nikinyoleuas.
9 Ikinon xiuiaj itech uejueyij ojtli uan akinmej nankinmitaskej, xikinmiluikan maualakan iluitl’.
10 Itlakeualuan tekiua oyajkej uan okinnotsatoj nochtin akinmej okinmajsikej. Okinnotsatoj akinmej yolkualmej uan akinmej amo yolkualmej. Otenki kali kanin omonamiktijkej”.
11 “Tekiua okinmitato akinmej otlakuajtokaj uan okitak se tlakatl amo omoyektlakenti.
12 Ye okilui: ‘¿Tleka otiuala uan amo otimoyektlakenti?’. Non tlakatl amitlaj okijto.
13 Ijkuakon tekiua okinmilui itlakeualuan: ‘Xikikxilpikan uan xikmailpikan. Noijki xikkixtikan uan xikkauatij kanin tlayoua. Ompa tlauelchokas uan kualanis’”.
14 “Porque miakej kinyoleuaj pero amo miakej kinpejpenaj”.
15 Ijkuakon fariseos oyajkej omotlapouitoj ken kitlapololtiskiaj Jesús.
16 Satepan fariseos okintitlankej sekimej indiscípulos uan sekimej tlen okipaleuiayaj Herodes. Okintitlankej makiluitij Jesús: “Tlamachti, tejuan tikmatij amo keman titlakajkayaua. Te titlamachtia tlen kineki toTajtsin Dios. Noijki amo mitstekipachoua tlen oksekimej kijtouaj uan amo titechikoita.
17 Techilui tlen timokuayejyekoua,* ¿moneki tiktlatlaxtlauiliskej César noso amo?”.
18 Pero Jesús okimatiaya amo kuali omokuayejyekouayaj* ikinon okinmilui: “Namejuan nankipiaj ome namoixko, ¿tleka nantechyejyekouaj?
19 Techititikan tomin tlen ika nantlatlaxtlauaj”. Yejuan okimakakej se denario.*
20 Jesús okintlajtlani: “¿Akin ixko nikan mota uan akin itoka nikan ijkuilitok?”.
21 Yejuan okinankilijkej: “Ye César”. Jesús san niman okinmilui: “Xikmakakan César tlen iaxka César pero xikmakakan Dios tlen iaxka Dios”.
22 Yejuan omotlajtlachialtijkej ijkuak ijkon okinmilui. Ayakmo itlaj okiluijkej uan oyajkej.
23 Non tonal oajsitoj saduceos tlen amo okineltokayaj kinyolitiskej akinmej yoixpolikej. Yejuan okiluijkej:
24 “Tlamachti, Moisés okijto: ‘Tla se tlakatl ixpoliui uan amo kinpia ikoneuan, ikni moneki monamiktis iuan isiua, uan konemej tlen kinpiaskej yetoskej iaxkauan akin oixpoliuik’.
25 Touan okatkaj chikome iknimej. Telpochtli tlen otlayekanaya* omonamikti pero oixpoliuik uan amo okinpixki ikoneuan, ikinon isiua omonamikti iuan ikni.
26 Pero noijki oixpoliuik, satepan okse ikni omonamikti iuan non siuatl pero noijki oixpoliuik. Ijkon chikome iknimej omonamiktijkej iuan non siuatl pero nochtin oixpolitiajkej.
27 Saiktlami noijki oixpoliuik non siuatl.
28 Techilui, ijkuak kinyolitiskej akinmej yoixpolikej, ¿akin kimokauis non siuatl? Porque chikome iknimej iuan omonamiktijkej”.
29 Jesús okinnankili: “Namejuan nanmotlapololtiaj porque amo nankajsikamatij iTlajtol toTajtsin Dios nion ichikaualis.
30 Ijkuak kinyolitiskej akinmej yoixpolikej, tlakamej uan siuamej amo monamiktiskej porque yetoskej ken ángeles.
31 Namejuan yonankitlajtoltijkej kinyolitiskej akinmej yoixpolikej. ¿Amo onankitlajtoltijkej tlen toTajtsin Dios onamechilui? Ye okijto:
32 ‘Ne niiDios Abrahán, niiDios Isaac uan niiDios Jacob’. Ye inDios akinmej yoltokej uan amo inDios akinmej yoixpolikej”.
33 Nochtin omotlajtlachialtijkej ijkuak okikakej ken otlamachtiaya.
34 Ijkuak fariseos okimatkej Jesús okinkamatsak saduceos, san sekan omonechikojkej uan okitatoj Jesús.
35 Se tlakatl tlen kuali okixmatiaya iTlanauatil Moisés, okinekiaya kiyejyekos Jesús uan okitlajtlani:
36 “Tlamachti, ¿katli Tlanauatil okachi ipati tlen okimakakej Moisés?”.
37 Jesús okinankili: “‘Xiktlasojtla Jehová moDios ika nochi moyolo, ika nochi moyolilis* uan ika nochi motlayejyekol’.*
38 Nin achto tlanauatil uan tlen okachi ipati.
39 Onka okse tlanauatil tlen noijki iuan mouika uan kijtoua: ‘Xikintlasojtla oksekimej ijkon ken te timotlasojtla’.
40 Ninmej ome tlanauatilmej kisaj itech iTlanauatil Moisés uan tlen okijkuilojkej profetas”.
41 Satepan Jesús okintlajtlani fariseos tlen ompa okatkaj:
42 “Namejuan tlen nankijtouaj, ¿akin Cristo? ¿Akin ikone?”. Yejuan okinankilijkej: “Ikone David”.
43 Ye okintlajtlani: “Tla ijkon, ¿tleka espíritu santo okichi David makinotsa noTeko? Porque ye okijto:
44 ‘Jehová okilui noTeko: “Ximotlali noyekma hasta manikintlali mokxitlampa akinmej mitskokoliaj”’.
45 Tla David kinotsa noTeko, ¿ken uelis yetos ikone?”.
46 Amikaj ouelik okinankili. Ijkuakon ayakmo ikaj omixeui itlaj kitlajtlanis.
Notas
^ Noso “ejemplos”.
^ Noso “timonejneuilia”.
^ Noso “omonejneuiliayaj”.
^ Xikita diccionario.
^ Noso “okachi ueyi”.
^ Ika griego moijtoua “alma”. Xikita diccionario.
^ Noso “motlanemilil”.
