Mateo 28:1-20
28 Ijkuak otlanki tonal sábado uan mostlatika otlaneski ijkuak peua semana,* María Magdalena uan okse María otlachiatoj kanin otoktoka Jesús.
2 Chikauak otlalolinki porque iángel Jehová oualtemok iluikak uan oyajki kanin otoktoka Jesús. Okitoki tetl uan ipan omotlali.
3 Ángel opetlaniaya ijkon ken ijkuak tlapejpetlani uan itlaken okatka istak ken nieve.
4 Soldados tlen ompa otlamaluijtokaj, sapanoua omomojtijkej, ouiuiokayaj uan ayakmo omoliniayaj.
5 Ángel okinmilui siuamej: “Amo ximomojtikan. Ne nikmati nankitemouaj Jesús tlen okimiktijkej itech kouitl.
6 Amo nikan kajki porque toTajtsin Dios okiyoliti ijkon ken ye okijto. Xiualakan uan xikitakan kanin okatka.
7 San niman xikinmiluitij idiscípulos: ‘ToTajtsin Dios yokiyoliti uan oyajki Galilea, ompa nankitaskej’. Non tlen onamechiluiko”.
8 Nonmej siuamej omomojtijkej pero noijki opakej. San niman okiskej kanin otoktoka Jesús uan san niman oyajkej okinmiluitoj discípulos tlen opanok.
9 Satepan Jesús okinnamik ojtli uan okintlajpalo. Siuamej ixpan omotlankuaketskej uan okikxinauajtekej.*
10 Jesús okinmilui: “Amo ximomojtikan. Xikinmiluitij nokniuan mayakan Galilea uan ompa nechitaskej”.
11 Ijkuak siuamej oyajkej, sekimej soldados tlen otlamaluijtokaj oyajkej Jerusalén. Yejuan okinmiluitoj teopixkej tlen otlayekanayaj nochi tlen opanok.
12 Teopixkej tlen otlayekanayaj omonechikojkej inuan tlayekankej para motlapouiskej tlen kichiuaskej. Soldados okinmakakej miak tomin de plata
13 uan okinmiluijkej: “Namejuan xikijtokaj: ‘Idiscípulos youak okichtekikoj cuerpo ijkuak tejuan otikochtokaj’.
14 Tla tekiua kimatis, tejuan iuan timotlapouitiuij. Namejuan amo ximotekipachokan”.
15 Soldados okimokauijkej tomin de plata uan okichijkej ijkon ken okinmiluijkej. Uan axkan judíos ok ijkon kijtojtinemij.
16 Once idiscípulos Jesús oyajkej Galilea itech tepetl kanin ye okinmiluijka kitaskiaj.
17 Ixpan omotlankuaketskej ijkuak okitakej. Pero sekimej amo okineltokayaj kox ye Jesús.
18 Jesús innauak omotoki uan okinmilui: “ToTajtsin Dios yonechmaktili nochi tlen onka iluikak uan ipan tlaltikpak.
19 Ikinon xiakan itech nochi altepemej uan xitlamachtikan makichiuakan tlen ne onikchi. Xiteapolaktikan ika itoka noTajtsin, iKone uan espíritu santo.
20 Xikinmachtikan makichiuakan nochi tlen onamechnauati. Uan xikilnamiktokan, nochipa namouan niyetos hasta ijkuak tlamis tlen axkan onka”.
