Mateo 6:1-34
-
JESÚS OTLAMACHTI ITECH TEPETL (1-34)
-
Amo matikchiuakan tlen kuali san para matechitakan oksekimej (1-4)
-
¿Ken moneki timotlatlaujtiskej? (5-15)
-
Jesús otechmachti ken timotlatlaujtiskej (9-13)
-
-
Ijkuak amo otlakuayaj (16-18)
-
Matikpatioitakan tlen toTajtsin Dios kipatioita uan amo tlen onka ipan tlaltikpak (19-24)
-
Amo matimotekipachokan (25-34)
-
“Okachi xikpatioitakan nankitekichiuiliskej toTajtsin Dios” (33)
-
-
6 “Amo xikchiuakan tlen kuali san para manamechitakan oksekimej. Tla ijkon nankichiuaj, toTajtsin Dios tlen kajki iluikak amo namechteochiuas.
2 Ijkuak itlaj tiktliokolis akin amitlaj kipia, amo xikijtojtinemi ijkon ken kichiuaj akinmej kipiaj ome inmixko. Yejuan ijkon kichiuaj itech sinagogas* uan itech ojtli san para makinmitakan. Ne namechiluia, yejuan yokiselijkej tlen kinekij kipiaskej.
3 Ijkuak itlaj tiktliokolis akin amitlaj kipia, amo makimati moopochma tlen kichiua moyekma.
4 Ijkon amikaj kimatis tlen otiktliokoli akin amitlaj kipia, uan toTajtsin Dios mitsteochiuas porque ye kita nochi tlen tikchiua”.
5 “Noijki amo ximotlatlaujtikan ken kichiuaj akinmej kipiaj ome inmixko. Yejuan kinpaktia motlatlaujtiskej itech sinagogas* uan itech ojtli kanin miakej panouaj para makinmitakan. Ne namechiluia, yejuan yokiselijkej tlen kinekij kipiaskej.
6 Pero te ijkuak timotlatlaujtis, ximokaltsakua uan xiktlapoui toTajtsin Dios akin amikaj kita. ToTajtsin Dios mitsteochiuas porque ye kita nochi tlen tikchiua.
7 Ijkuak timotlatlaujtis, amo san xikojpauijto* tlen tikijtos ken kichiuaj akinmej amo kitekichiuiliaj toTajtsin Dios. Yejuan kineltokaj toTajtsin Dios kinkaki porque tlajtouaj miak.
8 Amo xikchiuakan ken yejuan kichiuaj. ToTajtsin Dios yikimati tlen namechpoloua maski ayamo nankitlajtlaniliaj”.
9 “Namejuan moneki ijkin nanmotlatlaujtiskej:
‘ToTajtsin Dios tlen tika iluikak, nochtin makitlakaitakan* motoka.
10 Mauiki moTekiuajkayo. Mamochiua tlen tikneki ompa iluikak uan noijki nikan tlaltikpak.
11 Techmaka tlen tikkuaskej* nin tonal.
12 Techtlapojpoluili totlajtlakol ijkon ken tejuan tikintlapojpoluiaj akinmej itlaj techtoktiaj.
13 Amo xiktekauili matechyoltilana tlen amo kuali uan techpaleui amo matiuetsikan imak Satanás’”.
14 “Porque tla namejuan nankintlapojpoluiaj akinmej itlaj namechtoktiaj, toTajtsin Dios tlen kajki iluikak noijki namechtlapojpoluis.
15 Pero tla amo nankintlapojpoluiaj akinmej itlaj namechtoktiaj, toTajtsin Dios noijki amo namechtlapojpoluilis namotlajtlakol”.
16 “Ijkuak amo nantlakuaskej,* amo mamota nanmoyolkokouaj ijkon ken kichiuaj akinmej kipiaj ome inmixko. Yejuan ijkon kichiuaj porque kinekij makinmitakan amo tlakuaj.* Ne namechiluia, yejuan yokiselijkej tlen kinekij kipiaskej.
17 Pero ijkuak amo titlakuas,* xikmokuatlalili aceite ajuiak uan ximijxami.
18 Ijkon toTajtsin Dios tlen amikaj kita, kimatis amo titlakua* uan amo oksekimej kimatiskej. ToTajtsin Dios mitsteochiuas porque ye kita nochi tlen tikchiua”.
19 “Amo xikololokan miak tlamantli nikan tlaltikpak porque nochi non tlamantli poxkaui, ijtlakaui uan kichtekij.
20 Namejuan xiktemokan tlen toTajtsin Dios kipatioita porque nochi non tlamantli amo poxkaui, amo ijtlakaui nion amikaj kichteki.
21 Porque nochtin kitemouaj tlen kipatioitaj”.
22 “Toixtololouan kitlauiliaj tocuerpo. Tla tiyektlachixtos, nochi mocuerpo petlantos.
23 Pero tla titlaixneki, nochi mocuerpo yetos kanin tlayoua. Tla tlauili tlen tikpia ayakmo tlauia, ¡mocuerpo yetos kanin tlayoua!”.
24 “Amikaj uelis kinpias ome itekouan porque se kikokolis uan okse kitlasojtlas. Noso se kitlauelitas uan okse nochipa kipaleuis. Amo uelis nankitekichiuiliskej toTajtsin Dios tla nankinekij nankipiaskej miak tomin”.
25 “Ne namechiluia, amo manamechtekipacho namoyolilis, tlen nankikuaskej, tlen nankoniskej noso tlen tlakemitl nankimotlaliliskej. ¿Amo okachi ipati toyolilis uan amo totlakual? ¿Amo okachi ipati tocuerpo uan amo totlaken?
26 Kuali xikinmitakan totomej. Yejuan amo tlatokaj, amo kololouaj intlakual nion amo kitlatiaj, pero toTajtsin Dios tlen kajki iluikak kintlamaka. ¿Amo okachi namopati namejuan?
27 ¿Uelis okachi nanyoltoskej tla san nanmotekipachojtoskej?
28 Noijki ¿tleka namechtekipachoua tlen tlakemitl nankimotlaliliskej? Xikitakan ken moskaltiaj xochimej itech tlala, amo chikauak tekipanouaj nion amo kichiuaj hilo.
29 Pero ne namechiluia, nion Salomón ijkon omotlakenti maski oueyititoka.
30 Tla toTajtsin Dios kitlakentia xiuitl tlen axkan selistok uan mostla kitlamotlaskej ijtik tlitl, ¿amo noijki namechmakas namotlaken namejuan tlen amo okachi nantlaneltokaj?
31 Ikinon amo keman ximotekipachokan uan amo xikijtokan: ‘¿Tlen tikkuaskej?, ¿tlen tikoniskej? noso ¿tlen tlakemitl tikmotlaliliskej?’.
32 Porque akinmej chantij tlaltikpak* mochijchikauaj kipiaskej nochi nin tlamantli. Pero toTajtsin Dios tlen kajki iluikak kimatok namechpoloua nochi nin tlamantli”.
33 “Okachi xikpatioitakan nankitekichiuiliskej toTajtsin Dios akin ualtlanauatis ipan tlaltikpak uan xikchiuakan tlen kuali. Ijkon noijki nankiseliskej nochi tlen namechpoloua.
34 Ikinon amo keman manamechtekipacho tlen panos mostla, porque mostla okseki tlamantli namechtekipachos. Sejse tonal onka tlen techtekipachoua”.
Notas
^ Xikita diccionario.
^ Xikita diccionario.
^ Noso “xikopto”.
^ Noso “makiyekteneuakan”.
^ Ika griego moijtoua “pan”.
^ Noso “nanmosauaskej”.
^ Noso “mosauaj”.
^ Noso “timosauas”.
^ Noso “timosaua”.
^ Akinmej amo kitekichiuiliaj toTajtsin Dios.
