TLAJTOLI ‘carreta’ kajki ika griego uan Traducción del Nuevo Mundo kitekitiltia para mamoajsikamati tlatlamantli carretas (Hech. 8:​28, 29, 38). Nesi “tekiua tlen oualaya Etiopía” oualaya itech se ueyi carreta. Amo oualaya itech se carreta tlen okiuikayaj soldados noso se carreta tlen okitlalochtiayaj. Matikitakan seki tlamantli tleka ijkon tikijtouaj.

Sapanoua oueyititoka “tekiua tlen oualaya Etiopía” uan uejka yoyajka. “Non tlakatl okipaleuiaya se siuatl itoka Candace tlen otlanauatiaya Etiopía. Noijki okimaluiaya itomin non siuatl” (Hech. 8:27). Altepetl Etiopía okatka kanin axkan moixmati Sudán uan ik sur kanin kajki Egipto. Xamo ijkuakon non tekiua okinpapatlak miakej carretas porque uejka yoyajka uan okiuikaya miak tlamantli. Achto siglo okinuikayaj tlatlamantli carretas ijkuak kanaj oyayaj. Okatka se carreta tlen okinpiaya naui ruedas uan okuatsaktoka. Se amochtli tlen itoka Acts—An Exegetical Commentary, kijtoua: “Itech nonmej carretas okachi miak tlamantli okiuikayaj, kuali oyayaj uan uelis uejka yaskiaj”.

Non tekiua itlaj okitlajtoltijtoka ijkuak Felipe okajsito. Biblia kijtoua: “Felipe omotlalo uan okikak non tlakatl chikauak okitlajtoltijtiaya tlen okijkuilo profeta Isaías” (Hech. 8:30). Nonmej carretas yolik okinuikayaj. Ikinon non tekiua ueli itlaj okitlajtoltiaya uan Felipe totoka okajsito porque yolik okiuikayaj carreta.

Non tekiua “okitlatlaujti Felipe matlejko itech icarreta uan inakastlan mamotlali” (Hech. 8:31). Ijkuak carreta okitlalochtiayaj, omoketiaya akin okinpeuaya yolkamej. Pero carreta tlen miakej okinuikaya ueyi okatka uan miakej oakiayaj ikinon Felipe omotlali inakastlan tekiua.

Tlen kijtoua Hechos capítulo 8 uan okseki tlamantli tlen okajsikej sekimej ixtlamatkej, techpaleuia ayakmo matiktlalikan se dibujo kanin mota non tekiua yaui ipan se carreta tlen okiuikayaj soldados noso se carreta tlen okitlalochtiayaj. Axkan tiktlaliaj se dibujo kanin mota ueyi carreta tlen ipan yaui non tekiua.