1. ¿Tleka tiktlasojkamatilia toTajtsin Dios otechtliokoli Biblia?

 ¡SAPANOUA tiktlasojkamatiliaj Jehová otechmakak Biblia! Ompa kijtoua tlen techpaleuis ijkuak titlajyouiskej uan tlen panos satepan. Noijki techiluia ken tikixmatiskej toTajtsin Dios. Ijkuak timokuayejyekouaj ken iyelis, techpaleuis inauak matimotokikan uan iuan matimouikakan (Sal. 25:14).

2. ¿Tlen okichi Jehová para matikixmatikan?

² Jehová kineki oksekimej makixmatikan. Yiuejkika okichi sekimej matemikikan, okinmititi seki tlamantli uan okinmilui sekimej ángeles makinmatiltikan oksekimej ken iyelis (Núm. 12:6; Hech. 10:3, 4). Non amo uelis timomachtiskiaj tla amo kijkuiloskiaj. Ikinon Jehová okinnauati sekimej tlakamej makijkuilokan itech se amochtli tlen ye okinekiaya matikmatikan (Jer. 30:2). Uelis tikneltokaskej tlen ye otlanauati makijkuilokan sapanoua ipati porque “toTajtsin Dios nochipa kichiua tlen kuali” (Sal. 18:30).

3. ¿Tlen okichi Jehová para axkan matikpiakan Biblia? (Isaías 40:8).

³ (Xiktlajtolti Isaías 40:8). ITlajtol toTajtsin Dios yimiak xiuitl kinyekana akinmej kitekichiuiliaj. ¿Tleka ijkon tikijtouaj? Porque Biblia yiuejkika okijkuilojkej pero san niman ijtlakaui tlen itech otlajkuilojkej. Noijki amo momati kox onka se amochtli tlen yiuejkika okijkuilojkej. Pero Jehová okichi mayetokan copias kanin ijkuilitok iTlajtol. Akinmej otlajkuilojkej tlajtlakolejkej pero omochijchikajkej kuali tlajkuiloskej. Itech iTlajtol toTajtsin Dios tlen omoijkuilo ika hebreo, se ixtlamatki okijto: “Amo onka se amochtli tlen kipia nochi ijkon ken  yiuejkika okijkuilojkej”. Akinmej okichijkej noJn tekitl okatkaj tlajtlakolejkej uan otlajkuilojkej itech seki tlamantli tlen ijtlakaui. Pero tlen tiktlajtoltiaj itech Biblia kiteititia toTajtsin Dios otlanauati makijkuilokan.

4. ¿Tlen tikitaskej?

⁴ “Nochi tlan kuali iwa yekmilajka wits de ilwikak” uan techmaka toTajtsin Dios Biblia ye tlen okachi kuali otechtliokolijkej (Sant. 1:17). Akin itlaj kitetliokolia kiteititia miak tlamantli. Kiteititia kox kuali techixmati uan kimati tlen techpoloua. Ijkon panoua ika Biblia porque techmachtia akin Jehová ijkuak tiktlajtoltiaj. Ompa tikitaj kuali techixmati uan kimati tlen techpoloua. Axkan tikitaskej eyi tlamantli tlen kiteititia ken iyelis Jehová. Tikitaskej Jehová ixtlamatki, kichiua tlen kuali uan tetlasojtla. Achto matikitakan Biblia kijtoua toTajtsin Dios ixtlamatki.

5. ¿Tleka tikijtouaj Biblia kiteititia toTajtsin Dios ixtlamatki?

⁵ Jehová kimati moneki techiluis tlen tikchiuaskej. Ikinon otechmakak Biblia porque Jehová ompa okitlali seki tlamantli tlen techpaleuis matiyetokan ixtlamatkej. Sapanoua kinpaleuia oksekimej tlen techiluia matikchiuakan. Biblia uelis kinpatilis innemilis oksekimej. Moisés okinmijkuilo achto amochmej tlen kipia Biblia. Ye okinmilui israelitas: “Nin tlajtoli melauak mochiuas uan namechpaleuis xiyoltokan” (Deut. 32:47). Akinmej kitlakamatiskiaj iTlajtol toTajtsin Dios yolpakiskiaj uan kuali kisaskia tlen kichiuaskiaj (Sal. 1:2, 3). Biblia ok techpaleuia maski yiuejkika okijkuilojkej. Seki tlamachtil tikajsis itech jw.org kanin kijtoua “Biblia okinpatili innemilis”. Ompa kijtoua sekimej okipatlakej miak tlamantli itech innemilis uan axkan kichiuaj tlen kijtoua Biblia (1 Tes. 2:13).

6. ¿Tleka tikijtouaj amo onka okse amochtli ijkon ken Biblia?

⁶ Amo onka okse amochtli ijkon ken Biblia. ¿Tleka ijkon tikijtouaj? Porque Jehová otlanauati makijkuilokan, ye sapanoua chikauak, nochipa yoltok uan sapanoua ixtlamatki. Miakej kintlajtoltiaj amochmej maski akin okijkuilo yoixpoliuik. Pero tlen okijkuilojkej ayakmo tepaleuia. Pero tlen kijtoua Biblia nochipa tepaleuia uan miak ipati. ToTajtsin Dios techpaleuia ika iespíritu santo matikajsikamatikan iTlajtol ijkuak tiktlajtoltiaj uan timokuayejyekouaj tlen kijtoua (Sal. 119:27; Mal. 3:16; Heb. 4:12). ToTajtsin Dios ika nochi iyolo kineki techpaleuis. Non techyolchikaua nochipa matiktlajtoltikan Biblia.

7. ¿Ken okichi Jehová san sekan mayetokan akinmej kitekichiuiliaj?

⁷ Onka okse tlamantli tlen Biblia kiteititia toTajtsin Dios ixtlamatki. Ye kinpaleuia akinmej pouij itech ialtepe san sekan mayetokan. Israelitas amo san sekan ochantiayaj ijkuak okiselijkej tlali tlen okinmiluijkej kinmakaskej. Sekimej omichkitskiayaj, oksekimej okinmaluiayaj yolkamej uan oksekimej otokayaj. Ikinon uelis kinmilkauaskiaj akinmej oksekan inmialtepe porque uejka ochantiayaj. Pero Jehová okichi nochipa san sekan mamonechikokan, makikakikan iTlajtol uan mamomachtikan (Deut. 31:10-13; Neh. 8:2, 8, 18). Matimokuayejyekokan ken omomachiliaya se israelita ijkuak oajsiaya Jerusalén uan okinnamikiaya  miakej israelitas tlen oualayaj itech okse altepetl para kiueyichiuaskej Jehová. Ye ijkon okinpaleui san sekan mayetokan. Noijki itech achto siglo opejkej monechikouaj tokniuan, ompa opouiayaj siuamej uan tlakamej tlen tlatlamantli omoskaltijkej, sekimej okipiayaj tomin uan oksekimej amo. Noijki otlajtouayaj tlatlamantli tlajtolmej. Pero nochtin okipatioitayaj iTlajtol toTajtsin Dios uan san sekan okiueyichiuayaj Jehová. Akinmej yikin omonechikouayaj okajsikamatiayaj iTlajtol toTajtsin Dios porque tokniuan okinyekinmiluiayaj tlen ompa kijtoua uan san sekan okatkaj (Hech. 2:42; 8:30, 31).

8. ¿Ken techpaleuia axkan Jehová ika iTlajtol?

⁸ Axkan noijki Jehová techpaleuia ika iTlajtol para techmachtis akinmej tipouij itech ialtepe uan noijki techpaleuia san sekan matiyetokan. Itech Biblia kisa nochi tlen techpaleuia matikpiakan chikauak totlaneltokilis. Akinmej tikchiuaj ken Cristo nochipa timonechikouaj, tiauij uejueyij nechikolmej uan ompa timomachtiaj tlen kijtoua Biblia. ToTajtsin Dios techpaleuia ika Biblia para san sekan matiktekichiuilikan (Sof. 3:9).

9. ¿Akinmej kajsikamatij iTlajtol toTajtsin Dios? (Lucas 10:21).

⁹ Matikitakan okse tlamantli tlen kiteititia toTajtsin Dios ixtlamatki. Ye okichi  makijkuilokan seki tlamantli itech iTlajtol tlen makajsikamatikan san akinmej yolyamankej (xiktlajtolti Lucas 10:21). Sapanoua miakej kitlajtoltiaj Biblia. Se ixtlamatki okijto: “San Biblia okachi miakej kitlajtoltiaj uan momachtiaj”. Pero san akinmej yolyamankej ueli kajsikamatij uan kichiuaj tlen ompa kijtoua (2 Cor. 3:15, 16).

10. ¿Tlen okse tlamantli kiteititia toTajtsin Dios ixtlamatki?

¹⁰ Matikitakan okse tlamantli tlen Biblia kiteititia Jehová ixtlamatki. Ye amo san techmachtia ika Biblia ijkuak timonechikouaj. Tisejse techmachtia uan techyolchikaua. Ijkuak tiktlajtoltiaj iTlajtol tikajsikamatij Jehová kitekipachoua tlen techpanoua (Is. 30:21). Ijkuak otechpanok itlaj tlen amo kuali, ¿otiktlajtoltijkej se texto tlen sapanoua otechpaleui? Xamo miak uelta ijkon yotechpanok. Biblia omoijkuilo para tinochtin, tlen ompa kijtoua axkan techpaleuia uan techiluia tlen moneki tikchiuaskej maski tlatlamantli titlajyouijtokej. Non kiteititia toTajtsin Dios ixtlamatki uan ye otlanauati makijkuilokan Biblia (2 Tim. 3:16, 17).

11. Ijkuak okijkuilojkej Biblia, ¿ken okiteititi toTajtsin Dios amo techikoita?

¹¹ Jehová noijki kiteititia kichiua tlen kuali (Deut. 32:4). Non noijki kijtosneki Jehová amo techikoita (Hech. 10:34, 35; Rom. 2:11). Ijkon kiteititia tlajtolmej tlen ika okijkuilojkej Biblia. Ika hebreo okinmijkuilojkej 39 amochmej uan nonmej tonalmej nochtin okajsikamatiayaj non tlajtoli. Pero itech achto siglo miakej yotlajtouayaj griego. Ikinon 27 amochmej okinmijkuilojkej ika griego. Jehová amo okipejpenki se tlajtoli ika makijkuilokan iTlajtol uan ijkon kiteititia amo techikoita. Axkan tikatej kanaj 8 mil millones akinmej tichantij nikan tlaltikpak uan tikpiaj tlatlamantli totlajtol. ¿Tlen techpaleuia tinochtin matikixmatikan Jehová?

12. ¿Ken mochijtok Daniel 12:4 itech ninmej tonalmej?

¹² Jehová okilui profeta Daniel saiktlami tonalmej “momiaktilis tlamatilistli tlen melauak”. Non kijtosneki miakej kajsikamatiskej tlen kijtoua Biblia (xiktlajtolti Daniel 12:4). Ijkon panotok porque yokitlajtolkopkej, yokinchijchijkej uan yokinxexelojkej Biblia ika miakej tlajtolmej uan noijki ijkon yokichijkej ika amatlajkuilolmej. Biblia okachi yokitlajtolkopkej uan yokixexelojkej. Miakej kinnemakaj sapanoua patio. Pero ialtepe Jehová yokitlajtolkopkej nochi Biblia noso san tlajko ika kanaj 240 tlajtolmej. Noijki miakej uelis kipiaskej se Biblia uan amitlaj kitlaxtlauaskej. Ijkon miakej kiseliaj “kuali tlajtolmej itech Tekiuajkayotl” axkan ijkuak ayamo tlami nochi tlen amo kuali (Mat. 24:14, TNM). Jehová yolkuali uan kineki miakej makixmatikan ijkuak kitlajtoltiaj Biblia. ¿Tleka ijkon kichiua? Porque sapanoua techtlasojtla.

13. ¿Tleka tikijtouaj Biblia techpaleuia matikajsikamatikan toTajtsin Dios tetlasojtla? (Juan 21:25).

¹³ Biblia techpaleuia matikajsikamatikan toTajtsin Dios tetlasojtla (1 Juan 4:8). Matimokuayejyekokan tlen otlanauati makijkuilokan itech iTlajtol uan  tlen amo. Ye okijto tlen moneki tikchiuaskej tla tiknekij iuan timouikaskej, tiyolpakiskej uan nochipa tiyoltoskej. Jehová techtlasojtla ikinon amo okichi makijkuilokan miak tlamantli tlen amo moneki (xiktlajtolti Juan 21:25).

14. ¿Tlen okse tlamantli kiteititia toTajtsin Dios techtlasojtla?

¹⁴ Jehová techajsikamati ijkuak kineki itlaj techiluis uan ijkon kiteititia techtlasojtla. Amo okitlali miakej tlanauatilmej kanin kijtoua nochi tlen moneki tikchiuaskej itech tonemilis. Jehová techmatiltia tlen okinpanok sekimej itekipanojkauan, techmachtia profecías tlen techtlajtlachialtiaj uan techiluia tlen uelis techpaleuis ijkon techpaleuia para kuali tikpejpenaskej tlen tikchiuaskej. Non techyolinia matiktlasojtlakan toTajtsin Dios uan matiktlakamatikan ika nochi toyolo.

15. (1) ¿Ken kiteititia Biblia Jehová kitekipachoua tlen techpanoua? (2) Ken mota itech fotos, ¿akin itech mokuayejyekoua se tokni, se takotsin uan tokni siuatl tlen yikipia miak xiuitl? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia kiteititia toTajtsin Dios kitekipachoua tlen techpanoua. Tikmatij ijkon kichiua porque itech iTlajtol kijtoua ken omomachiliayaj sekimej itekipanojkauan. Tejuan tikajsikamatij ken omomachilijkej porque okatkaj ken tejuan (Sant. 5:17). Ijkuak tikitaj toTajtsin Dios okinmajsikamatki oksekimej, tikajsikamatij ye ‘tetlasojtla iwa teiknoma’ (Sant. 5:11).

16. ¿Tlen techmachtia itech Jehová tlen okichi iuan sekimej itekipanojkauan? (Isaías 55:7).

¹⁶ Biblia noijki techititia ken techtlasojtla  Jehová. ITlajtol toTajtsin Dios kijtoua amo techkauas maski timotlapololtiskej. Israelitas otlajtlakolchiuayaj ixpan Jehová pero ye okintlapojpoluiaya ijkuak melauak omoyolkopayaj (xiktlajtolti Isaías 55:7). Tokniuan tlen okatkaj itech achto siglo noijki okimatiayaj Jehová okintlasojtlaya. Jehová okipaleui apóstol Pablo makinyoleua tokniuan makitlapojpoluikan uan makiyolchikauakan se tlakatl tlen oauilnenki porque melauak omoyolkopki (1 Cor. 5:1-5; 2 Cor. 2:6, 7). Techtlajtlachialtiaj tikmatiskej Jehová nochipa okinpaleui itekipanojkauan maski otlajtlakolchijkej. Nochipa okintlasojtlak ijkuak okinpaleuiaya, ijkuak okinyektlaliaya uan okinmiluiaya inauak oksepa mamokopakan. Axkan noijki ijkon kijtoua kichiuas tla se tonal ikaj tlajtlakolchiuas uan melauak moyolkopa (Sant. 4:8-10).

17. ¿Tleka Biblia se kualtsin tetliokolil?

¹⁷ Biblia se kualtsin tetliokolil tlen otechmakak Jehová. ¿Tleka miak ipati? Porque axkan yotikitakej toTajtsin Dios yolkuali, ixtlamatki uan techtlasojtla. Biblia noijki techititia Jehová kineki matikixmatikan uan iuan matimouikakan.

18. ¿Ken uelis tikteititiskej tiktlasojkamatiliaj Jehová otechmakak iTlajtol?

¹⁸ ITlajtol toTajtsin Dios moneki tikpatioitaskej. Nin se tetliokolil tlen miak ipati tlen Jehová otechmakak (Sant. 1:17). Ikinon nochipa matiktlasojkamatilikan. Tikteititiaj ijkon tikchiuaj ijkuak timotlatlaujtiaj uan satepan tiktlajtoltiaj Biblia uan timokuayejyekouaj tlen kijtoua. Jehová otlanauati makijkuilokan Biblia uan ye techteochiuas tla timochijchikauaj tiktlajtoltiskej uan ‘tikajsiskej ixtlamatilis toTajtsin Dios’ (Prov. 2:5).