IJKUAK Jesús okinmachti imachtijkauan ma tetlapouikan kuali tlajtolmej, ye kuali okimatiaya amo nochtin kinkakiskiaj (Luc. 10:3, 5, 6). Ijkuak titetlapouiaj miakej amo kinekij techkakiskej uan ualeua techuijuikaltiaj. Ik non, ualeua oui tikinmiknomatiskej.

Akin teiknomati kita tlen kintekipachoa oksekimej uan kinpaleuia. Tla ayakmo titeiknomatij, ayakmo tiyolpakiskej ijkuak titetlapouiskej uan ayakmo ajsis itech inyolo akinmej tikintlapouiaj. Pero tla timochijchikauaskej titeiknomatiskej, tiyolpakiskej ijkuak titetlapouiskej. Yetos ken ijkuak titlatlatiaj para ma tlaxotlato (1 Tes. 5:19, Itlajtol totajtzin Dios).

¿Ken uelis titeiknomatiskej maski ualeua oui? Tikitaskej ken titeiknomatiskej ken Jehová, Jesús uan ken oteiknomatki tlatitlanil Pablo.

Jehová yimiak xiuitl kixikojtok oksekimej ma kijtokan tlen amo melauak itech ye. Pero ye “kinmiknomati akimeh amo motlasojkamatih innawak iwa akimeh tlajtlakolchiwah” (Luc. 6:35). Kiteititia teiknomati ijkuak mochia porque kineki nochtin “mamomakixtikah” (1 Tim. 2:3, 4). Maski amo kipaktia tlen amo kuali, ye kinpatioita tlaltikpaktlakamej, ik non, kineki nochtin ma momakixtikan (2 Ped. 3:9).

Jehová kimati Satanás kinmixtsaktok akinmej amo tlaneltokaj (2 Cor. 4:3, 4). Miakej ijkuak ok tsikitsitsintin okatkaj okinmachtijkej tlen amo melauak itech toTajtsin Dios. Ik non, tlen mokuayejyekoaj uan tlen kimachiliaj amo kinkauilia ma tlaneltokakan itech iTlajtol toTajtsin Dios. Pero Jehová kineki kinpaleuis. ¿Ken tikmatij?

Ma tikitakan tlen okinpanok akinmej ochantiayaj Nínive. Maski amo kuali okipiayaj inyelis, Jehová okilui Jonás: “¿Amo moneki ma nikiknomati altepetl Nínive kanin chantij ciento veinte mil tlakamej tlen amo kimatij katli inyekma uan inmiopochma?” (Jon. 4:11). Jehová okitak akinmej ochantiayaj Nínive amo okixmatiayaj. Ik non, okinmiknomatki uan okititlanki Jonás ma kinmiluiti tlen okinekiaya kichiuas.

Ijkon ken Jehová noijki tikinpatioitaj tlaltikpaktlakamej. Tikteititiskej titeiknomatij ken Jehová tla tikinpaleuiaj akinmej techkakij maski ualeua mota amo kichiuaskej tlen kijtoa Biblia.

Ijkuak amo techkakij, ma timotlajtlanikan tleka ijkon kichiuaj uan amo san niman ma tikualanikan. Xamo amo kinekij techkakiskej porque kinmitaj sekimej tlen kijtoaj kichiuaj ken Cristo kichijtinemij tlen amo kuali. Oksekimej xamo kinmiluiaj amo kuali tlen tikneltokaj. Xamo oksekimej momojtiaj tlen kijtoskej inkalchanejkauan noso kinpinauiskej tla techkakiskej.

Sekimej amo kinekij techkakiskej porque itlaj amo kuali okinpanok uan moyolkokoaj. Se misionera itoka Kim, okijto: “Kanin titetlapouiaj okintlajyouilti se guerra uan okipolojkej nochi tlen okipiayaj uan ayakmo kineltokaj satepan kualtsin yetoskej. Moyolkokoaj uan mokuayejyekoaj itlaj kinchiuiliskej. Ualeua amo kinekij techkakiskej uan se tonal ijkuak onitetlapouijtoka, okinekiayaj nechuitekiskej”.

¿Tlen kichiua Kim para kinmiknomatis akinmej kintlapouia? Okijto: “Ijkuak nechchiuiliaj tlen amo kuali, nikilnamiki tlen kijtoa Proverbios 19:11: ‘Akin ixtlamatki amo san niman kualani’. Nikilnamiktok tlen kinpanoa uan non nechpaleuia ma nikinmiknomati. Uan amo nochtin ijkon kichiuaj porque ompa noijki miakej tikinmachtiaj”.

Noijki uelis timotlajtlaniskej tlen tikchiuaskiaj tla tejuan techtlapouiskiaj. Tla techiluiskiaj tlen amo melauak itech iTlaixpantijkauan Jehová xamo noijki tikualaniskej uan noijki tiknekiskej ma techiknomatikan. Jesús okijto ma tikinchiuilikan oksekimej tlen techpaktia ma techchiuilikan. Ik non, moneki ma tikajsikamatikan tlen kimachiliaj oksekimej uan amo ma timosotlauakan (Mat. 7:12).

Pablo oteiknomatki maski okitlajyouiltijkej. ¿Tleka? Porque okilnamiktoka ken okipiaya iyelis. Okijto: “Achto fiero onitlajtoaya de Cristo iwa onikintotojtokaya iwa onikinwijwikaltiaya akimeh okineltokayah. Dios onechiknoma maya ne ayamó onikneltokaya, iwa mach onikmatia tlan onikchiwaya” (1 Tim. 1:13). Okijto Jehová uan Jesús okiknomatkej. Okajsikamatiaya tleka oksekimej amo okinekiayaj ma kintlapoui porque ye noijki ijkon okichiuaya.

Ualeua Pablo okinmajsiaya akinmej okineltokayaj  miak tlamantli amo melauak. ¿Tlen okichiuaya Pablo? Hechos 17:16 kijtoa ijkuak okatka Atenas “saikpanoa omoyolkoko porke okitak itech non altepetl sentetl omokejketokah diostsitsinteh non san kinmachijchiwah”. Pero okitekitilti non tlamantli para ika tetlapouis (Hech. 17:22, 23). Pablo kuali okipejpenaya tlen ika tetlapouiskia uan ijkon miakej momakixtiskiaj (1 Cor. 9:20-23).

Uelis tikchiuaskej ken Pablo ijkuak ikaj mokuejsoa noso amo kineltoka tlen tiktlapouia. Ma tiktekitiltikan tlen tikmatij para tikinpaleuiskej oksekimej ma kimatikan tlen toTajtsin Dios kichiuas (Is. 52:7). Se tokni itoka Dorothy okijto: “Kanin titetlapouiaj miakej okinmachtijkej toTajtsin Dios tetlajyouiltia. Ijkuak ijkon kijtoaj nikintlasojkamatilia porque tlaneltokaj itech toTajtsin Dios uan nikinmititia itech Biblia Jehová techtlasojtla uan nikinmiluia tlen kichiuas satepan”.

Noijki moneki timokuayejyekoskej ken tikinyolchikauaskej tokniuan tlen inmiuan titetlapouiaj. Jessica okijto: “Tla akin iuan nitetlapouia amo kikakij, amo timotlapouijtokej itech non tlamantli. Timotlapouiaj sapanoa tlapaleuia titetlapouiskej maski oksekimej amo kinekij techkakiskej”.

Jehová kimati tlen ouijkayotl tikixnamikij ijkuak titetlapouiaj uan sapanoa yolpaki ijkuak titeiknomatij ken ye (Luc. 6:36). ToTajtsin Dios amo nochipa teiknomatis. Tikmatij ye yokitlali se tonal para kitlajtlamis tlen amo kuali. Uan ok moneki ma titetlapouikan (2 Tim. 4:2). Ik non, ma tiyolpakikan ijkuak titetlapouiaj uan nochtin ma tikinmiknomatikan.