DON se iTlaixpantijka Jehová tlen chanti Canadá mochijchikaua kintlapouis akinmej chantij itech ojtli. Ye kijtoa tlen okipanok ijkuak okitlapoui se tlakatl: “Peter ochantiaya itech ojtli uan okatka sapanoa sokio. Amo otetlakaitaya, nochipa omokualaniaya iuan oksekimej. Amo okipaktiaya ma kichiuilikan tlen kuali”. Pero kanaj catorce xiuitl, Don omochijchika kichiuilis tlen kuali.

Peter okitlajtlani Don: “¿Tleka notech timotekipachoa? Amo ikaj ijkon kichiua. ¿Tleka te kema?”. Don okiyekilui ika eyi tlaxelolmej para ajsiskia itech iyolo. Achto, okitlajtlani kox okimatiaya tlen itoka toTajtsin Dios uan okilui ma kitlajtolti Salmo 83:18. Satepan okilui tleka itech omotekipachoaya uan okilui ma kitlajtolti Romanos 10:13, 14, TNM kanin kijtoa “nochi akin kijtos itoka Jehová momakixtis”. Saiktlami Don okitlajtoltili Mateo 9:36 kanin kijtoa: “Ijkuak Jesús okimitak n tlakah, okimiknoma ken sa tlawel osotlawatokah iwa oyetokah inselti kemi ichkameh non amo kipiah tlajpixki”. Satepan Don okilui Peter noijki ma kitlajtolti. Uan ijkuak otlanki okitlajtolti yochokatoka uan okilui: “¿Nipoui itech ninmej ichkamej?”.

Peter opejki kipatla inemilis. Omalti, kuali okixinki ibarba uan okonaki tlakemitl tlen Don okitliokoli. Ijkuakon okachi opejki maltia uan kuali omoyektlaliaya.

Peter okijkuiloaya nochi tlen okichiuaya sejse tonal. Achto okijkuilo ken okatka inemilis uan ken omoyolkokoaya pero satepan ayakmo ijkon okijkuilo. Okijto: “Axkan onikmatki itoka toTajtsin Dios. Axkan ijkuak nimotlatlaujtia, nimotlapouia iuan Jehová. Melauak kualtsin tikmatiskej itoka. Don kijtoa uelis iuan nimouikas Jehová, nochipa nechkakis, maski san tlen hora niknotsas uan uelis nikiluis tlen ne niknekis”.

 Saiktlami okintlajkuilili ikniuan. Kanin okijtoaya:

“Axkan amo kuali nimomachilia. Yinikpia miak xiuitl. Pero tla itech nin tonal nimikis, nikmati oksepa nikitas noyolikni [Don] itech Xochitlali. Tla nankitlajtoltijtokej nin, kijtosneki ayakmo niyoltok. Uan tla nankitaskej se tlakatl tlen amo nankixmatij ijkuak nannechtokatiuij, iuan ximotlapouikan uan namechtlatlaujtia xiktlajtoltikan nin amochtli azul [otlajto itech amochtli tlen okimakakej tlen itoka La verdad que lleva a vida eterna]. * Kijtoa oksepa nikitas noyolikni itech Xochitlali. Uan melauak nikneltoka ika nochi noyolo. Namechtlasojtla namokni Peter”.

Satepan ijkuak okitokatoj Peter, ikni tlen itoka Ummi kiyekijtoa: “Yikipia ome xiuitl onechnotski nokni Peter. Amo keman onikitaya oyolpakiaya uan oixuetskaya”. Ummi okilui Don: “Niktlajtoltis amochtli porque tla nokni, oajsik itech iyolo, melauak kipia ipati”. Ummi noijki okiseli ma kitlajpaloti se iTlaixpantijka Jehová para momachtis ika amochtli ¿Tlen melauak tlamachtia Biblia?

Tejuan noijki amo san ma tikinmitakan ken motaj tlaltikpaktlakamej, okachi kuali, ma tikintlasojtlakan uan amo san niman ma timosotlauakan (1 Tim. 2:3, 4). Tla ijkon tikchiuaskej, uelis ajsis itech inyolo tlen tlamachtia Biblia maski amo okachi techpaktis ken motaj, pero yejuan yolkualmej uan uelis kipatlaskej innemilis. Pero melauak tikmatij toTajtsin Dios “kita tlen onka itech inyolo” uan kichiuas ma kipatioitakan tlen melauak akinmej kinekij kixmatiskej (1 Sam. 16:7; Juan 6:44).