TOTAJTSIN DIOS amo okinekiaya ma titlajyouikan. Ye okinekiaya nochtin ma kitlakaitakan san ye kinamiki tlanauatis, okinekiaya ma kichiuakan tlen ye kijtoa uan ma kipiakan inyelis ken ye. Okinekiaya nochtin ma yetokan ika yolseuilistli, ma yolpakikan iuan inkalchanejkauan, kichiuaskiaj miak tlamantli uan tlaltikpak kikopaskiaj xochitlali.

• “Kintlajtlamia guerras itech nochi tlaltikpak” (Salmo 46:9).

• “Yoajsiko n tonati ijkuak pewas [...] tikimpojpolos akimeh kijtlakoah n tlaltíkpaktli” (Apocalipsis 11:18).

• “Amikaj kijtos: ‘Nimokokoa’” (Isaías 33:24).

• “Tekitl tlen kichiuaskej notekipanojkauan sapanoa kinyolpaktis” (Isaías 65:22).

¿Ken mochiuaskej ninmej profecías? ToTajtsin Dios yokitlali Jesús ma yeto tekiua itech iTekiuajkayo uan ualtlanauatis ipan tlaltikpak. Biblia kijtoa nin iTekiuajkayo toTajtsin Dios (Daniel 2:44). Noijki kijtoa Jesús “kitlalis mayeto Rey” uan itlanauatil “ayik pojpoliwis” (Lucas 1:32, 33).

Ijkuak Jesús okatka nikan tlaltikpak, okinchi miakej milagros tlen okiteititijkej uelis tlanauatis uan nochtin kuali yetoskej.

• Okinpajti akinmej omokokoayaj uan ijkon okiteititi kipojpolos nochi kokolistli (Mateo 9:35).

• Okitlakaualti ejekakiauitl uan ijkon okiteititi nochi tlen panoa uelis kitlakaualtis (Marcos 4:36-39).

• Miakej okintlamakak uan ijkon okiteititi techmakas nochi tlen techpolos (Marcos 6:41-44).

• Se tonal, ijkuak oyajki kanin omonamiktijkej, atl okikopki vino uan ijkon okiteititi techmakas tlen ika tiyolpakiskej (Juan 2:7-11).

¿Tlen moneki tikchiuas tla tikneki ma mitsteochiua toTajtsin Dios ijkon ken akinmej kitlasojtlaj? Moneki itlaj tikchiuas. Biblia kijtoa moneki tias itech se “ojtli non tewika kan nochipa se yolitos” uan amo miakej ik ompa yauij (Mateo 7:14).

¿Tlen kijtosneki “ojtli non tewika kan nochipa se yolitos”? Kijtosneki ma tikchiuakan nochi tlen technauatia toTajtsin Dios. Ye techiluia: “Ne Jehová nimoDios, ne Akin nimitsmachtia para kuali xiyeto, Akin kichiua xinejnemi itech ojtli kanin moneki tias” (Isaías 48:17). Okachi kuali tiyetos tla tikchiuas tlen ompa kijtoa.

 Jesús okijto: “Ne Ni ojtli nontewika inawak Dios, Ne nomechnonotsa ika milák tlájtoli, iwa Ne Akin kichiwa xiyolitokah” (Juan 14:6). Okachi timouikaskej iuan toTajtsin Dios uan tiyolpakiskej tla tikchiuaskej tlen Jesús otlamachti uan okichi.

¿Ken tikajsis non “ojtli”? Onka miakej religiones. Ik non, Jesús okijto: “Amo nochteh akimeh nechiliah: ‘¡Noteko, Noteko!’, kalakiskeh kan Dios tlanawatia. Sanwel akimeh kichiwah tlan kimonekiltia Notajtsi non kajki ilwikak” (Mateo 7:21). Noijki okijto: “Nomejwah weletis nonkinmixmatiskeh ika tlan kichiwah” (Mateo 7:16). Tlen kijtoa Biblia mitspaleuis xikixmati tlen religión melauak kiueyichiua toTajtsin Dios (Juan 17:17).

¿Tlen tikchiuas tla tikneki tias itech non “ojtli”? Moneki tikixmatis akin kichiua ma tiyoltokan. ¿Akin ye? ¿Tlen itoka? ¿Ken iyelis? ¿Tlen kichijtok? ¿Tlen kineki ma tikchiuakan? *

Jehová amo san okinekiaya ma titekipanokan, san ma titlakuakan, san ma timoyolpaktikan uan ma tikinpiakan tokalchanejkauan. Ye kineki ma tikixmatikan uan iuan ma timouikakan. Tikteititiaj tiktlasojtlaj ijkuak tiktlakamatij. Jesús okijto: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3).

Moneki tikpatlaskej seki tlamantli tla tiknekij tikyolpaktiskej toTajtsin Dios. Ualeua oui tiaskej itech non ojtli pero yetos sapanoa kuajkualtsin ijkuak peuas ijkon tikchiuas. Tla tikneki tikmatis nochi tlen timotlajtlaniaj itech toTajtsin Dios, itech Internet xikijkuilo www.mr1310.com/ncx uan ompa xiktlajtlani ma mitsmachtikan. ITlaixpantijkauan Jehová ika miak pakilistli mitstlajpalotiuij ijkuak timajxilis.