ISRAELITAS sapanoua okipatioitayaj tlatsotsonaskej. Biblia miak uelta kijtoua sekimej otlatsotsonayaj noso otlakuikayaj. Seki amochmej tlen kinpia Biblia ijkuilitokej ken tlakuikalmej. Ijkon ijkuilitokej Salmos, Cantar de los Cantares uan Lamentaciones. Se amochtli tlen itoka Music in Biblical Life (La música en la vida bíblica) kijtoua: “Biblia kiteititia israelitas otlatsotsonayaj ijkuak okichiuayaj miak tlamantli”.

Nochipa otlatsotsonayaj. Ijkuak israelitas otlatsotsonayaj okiteititiayaj ken omomachiliayaj (Is. 30:29). Siuamej opakiayaj tlakuikaskej, omijtotiayaj uan okintsotsonayaj panderetas ijkuak okitlaliayaj se tekiua uan oiluichiuayaj. Noijki ijkon okichiuayaj ijkuak soldados okintlaniliayaj oksekimej (Juec. 11:34; 1 Sam. 18:​6, 7; 1 Rey. 1:​39, 40). Noijki otlakuikayaj seki tlakuikalmej tlen okiteititiaya omoyolkokouayaj ijkuak ikaj oixpoliuiaya (2 Crón. 35:25). Amochtli Cyclopedia de McClintock uan Strong kijtoua: “Hebreos sapanoua okinpaktiaya tlatsotsonaskej”.

Otlatsotsonayaj kanin otlanauatiaya tekiua. Tekiuajkej israelitas sapanoua okinpaktiaya kikakiskej ijkuak otlatsotsonayaj. Tekiua Saúl okilui David makitlatsotsonili (1 Sam. 16:​18, 23). Ijkuak David opejki tlanauatia okichijchi seki tlamantli tlen ika otlatsotsonayaj, okinmijkuilo kuajkualtsitsintin tlakuikalmej uan okintlali sekimej tlakamej matlatsotsonakan itech templo (2 Crón. 7:6; Amós 6:5). Tekiua Salomón noijki okintlali tlakamej uan siuamej matlakuikakan kanin otlanauatiaya (Ecl. 2:8).

Otlatsotsonayaj ijkuak okiueyichiuayaj Jehová. Okatkaj 4,000 tlakamej tlen kuali otlatsotsonayaj ompa itech templo tlen okatka Jerusalén. Yejuan otlatsotsonayaj ika címbalos, ika seki tlamantli tlen okipiaya hilos, arpas uan okinpitsayaj trompetas (1 Crón. 23:5; 2 Crón. 5:12). Pero amo san yejuan otlatsotsonayaj ijkuak okiueyichiuayaj Jehová. Miakej israelitas noijki otlakuikayaj tlakuikalmej tlen okintokayotijkej Canciones de las Subidas. Yejuan otlakuikayaj tlakuikalmej ijkuak oyayaj iluichiuatiuij Jerusalén (Sal. 120-134). Seki amochmej tlen okinmijkuilojkej judíos kijtouaj israelitas otlakuikayaj se tlakuikali tlen itoka Hallel a ijkuak okichiuayaj Pascua.

Tejuan akinmej tipouij itech ialtepe toTajtsin Dios noijki tikpatioitaj tiktlakuikiliskej Jehová (Sant. 5:13). Titlakuikaj ijkuak tikueyichiuaj Jehová (Efes. 5:19). Non techpaleuia matimouikakan inuan tokniuan uan noijki techpaleuia matitlaxikokan ijkuak itlaj tikixnamikij (Hech. 16:25; Col. 3:16). Ijkuak titlakuikaj tikteititiaj tikneltokaj Jehová uan sapanoua tiktlasojtlaj.