Miakej kinchikoitaj akinmej uitsej okse altepetl, akinmej tlajtouaj okse tlajtoli, akinmej kipiaj okse religión, akinmej amo kipiaj tomin noso porque tlakamej noso siuamej. Sekimej kinteneuaj oksekimej porque tlatlamantli xiuitl kipiaj, amo omomachtijkej miak, mokokouaj noso ixchipajkej. Akinmej ijkon kichiuaj mokuayejyekouaj amo techikoitaj.

¿Kox titechikoita tejuatsin? San niman tikitaj ijkuak oksekimej techikoitaj pero amo tikitaj tejuan noijki ijkon tikchiuaj. Uelis tikijtoskej tinochtin titechikoitaj. Se ixtlamatki tlen itoka David Williams okijto ijkuak ikaj amo kipaktia se grupo uan kinamiki akin poui itech non grupo, “kichikoita uan amo kita ijkon kichiua”.

Ma tikitakan tlen okipanok se tlakatl tlen itoka Yovitsa, ye chanti ompa Europa kanin onka se grupo tlen amo ueyi uan miakej amo kinpaktia tlen kichiuaj. Yovitsa okijto: “Onimokuayejyeko nochtin akinmej poui itech non grupo amo yolkualmej. Amo onikitaya kox onechpaktiaya nitechikoitas. Onikijtouaya: ‘Melauak tlen nimokuayejyekoua ken inyelis’”.

Miakej tekiuajkej tlanauatiaj amikaj ma techikoitaj. Pero miakej techikoitaj. Ijkon kichiuaj porque tekiuajkej san kijtouaj tlen oksekimej uelis kichiuaskej uan tlen amo. Pero amo uelis kichiuaskej okse tlamantli ma mokuayejyekokan. Akinmej techikoitaj ijkon kichiuaj porque kisa itech inyolo uan inkuayejyekol. ¿Kijtosneki non nochipa techikoitaskej uan amo keman moyektlaliskej?