Josué 6:10-15, 20 techyekiluia ken israelitas okimoaxkatijkej altepetl Jericó. Itech chikuase tonal okiyaualojkej altepetl uan san se uelta okiyaualoayaj se tonal. Uan itech tonal chikome, okiyaualojkej altepetl chikome uelta. Jehová okichi uejueyij tepamitl tlen okipiaya Jericó ma uetsikan, uan ijkon israelitas okimoaxkatijkej altepetl Jericó. ¿Onka seki tlamantli tlen techititia melauak ijkon opanok?

Yiuejkika ijkuak sekimej soldados okinekiayaj kimoaxkatiskej se altepetl, ualeua soldados okiyaualoayaj pampa amo ikaj ma cholo. Tla soldados miak tonal okiyaualoayaj altepetl, tlakuali tlen okipiayaj itech altepetl tlamiskia. Ijkuak soldados okimoaxkatiayaj altepetl, okiuikayaj nochi tlen okinekiayaj uan noijki okiuikayaj tlakuali. Ik non, akinmej momachtiaj amo kajsij tlakuali itech altepemej palestinas tlen noijki okinmoaxkatijkej. Pero amo ijkon panoa kanin okatka altepetl Jericó. Se revista kijtoa ompa yokajsikej miakej tepalkamej uan tlakuali. Nin revista noijki kijtoa amo ijkon mota itech okseki altepemej tlen noijki okinmoaxkatijkej.

Itech Biblia moijtoa israelitas amo okiuikakej tlakuali pampa Jehová okinnauati amo ma kiuikakan (Josué 6:17, 18). Biblia noijki techiluia okimoaxkatijkej altepetl ijkuak otlankej otlapixkakej. Ik non, ijkuak okimoaxkatijkej altepetl okatka miak tlakuali (Josué 3:15-17; 5:10). Ik non, nochi tlen yokajsikej itech altepetl Jericó techmachtia san niman okimoaxkatijkej altepetl, ijkon ken kijtoa Biblia.