IJKUAK peua tlayoa José kajki itech xochitlali tlen kipia ikalijtik. Uelis onka soyamej tlen kitemakaj dátiles, okseki kuauitl tlen kitemaka tlakilotl, noijki onka se tanque ika atl kanin onka okseki xiuitl, uan uejka kita ikalijtik faraón. Noijki José kikaki Manasés mauiltijtok iuan Efraín akin sapanoa uetska. Uelis mokuayejyekoa ken isiua uetska ika nochi tlen kichiuaj inkoneuan. Uan ye noijki yolpaki pampa toTajtsin Dios kiteochiua.

Itlayekankone José itoka Manasés tlen kijtosneki kichiua ma kilkaua (Génesis 41:51). Uan uelis ken toTajtsin Dios kimaluia uan kipaleuia non kichiua ayakmo okachi ma moyolkoko ijkuak kinmilnamiki itajtsin, iikniuan uan ikalijtik. Inemilis omopatlak pampa iikniuan amo okinekiayaj. Okitlajyouiltijkej uan noijki okinekiayaj kimiktiskej. Saiktlami okinemakakej ken tlakeuali. Ijkuakon opejki sapanoa tlajyouia. Miak xiuitl okatka ken tlakeuali. Satepan okitsakej uan okilpijkej ika cadenas. Pero nochi non yopanok. Axkan José kipia miak ipati, maski amo ken ueyi tekiua itech altepetl Egipto. *

Uan itech saiktlami xiuitl José okitak ken Jehová yokichi nochi tlen okijto. Yopanokej chikome xiuitl ijkuak itech Egipto sapanoa otlamochi, uan José yokinechiko nochi tlakuali tlen amo okitekitiltijkej. Noijki omonamikti iuan se egipcia tlen itoka Asenat uan axkan yikipia ome ikoneuan. Pero ok mokuayejyekoa itech ikalchanejkauan tlen katej Canaán, okachi kilnamiki Benjamín uan Jacob, itajtsin. Uelis motlajtlania kox kuali katej uan kox iikniuan ok amo yolkualmej uan tetlajyouiltiaj. ¿Uelis kiyektlalis nochi tlen otlapanok uan kichiuas oksepa san sekan ma yetokan ikalchanejkauan?

¿Timomachilia ken José? Uelis mokalchanejkauan tlajyouiaj pampa sapanoa mokokoliaj, mochauatiliaj noso mokajkayauaj. Tla ijkon mitspanoa sapanoa mitspaleuis ineskayo José uan noijki tlen okichi iuan ikalchanejkauan.

José okipiaya miak tekitl, ik non, totoka opanoayaj tonalmej. Uan ijkon ken okijto Jehová ika ikochtemikilis faraón, ijkuak tlamiskia chikome xiuitl peuaskiaj ok chikome xiuitl keman amo itlaj tlamochiuaskia. ¡Amo itlaj otlamochi! Satepan itech nochi altepemej amo okipiayaj tlen kikuaskej. Pero itech nochi altepetl Egipto okatka tlakuali, ijkon ken kijtoa Biblia (Génesis 41:54). Nochi altepetl Egipto kuali okatka pampa José okimatiaya kijtos tlen kijtosneki kochtemikilistli uan noijki kuali otlayektlaliaya nochi.

Uelis egipcios sapanoa okitlasojkamatiliayaj José pampa kuali otlayektlaliaya nochi. Pero José okinekiaya ma kitlasojkamatilikan iTajtsin Dios, Jehová. Tla ika nochi tlen tikmatij tiktekichiuiliaj  toTajtsin Dios, ye uelis kichiuas ma tikchiuakan miak tlamantli tlen tejuan amo timokuayejyekoaj.

Satepan egipcios noijki ayakmo okipiayaj tlakuali. Ijkuak okiluijkej faraón ma kinpaleui, ye san okijto ma yakan iixpan José, pampa ye okimatiaya tlen kichiuaskiaj pampa oksepa kipiaskiaj tlakuali. Ijkuakon José okinnemakilti tlakuali nochtin egipcios (Génesis 41:55, 56).

Pero itech okseki altepemej amo okipiayaj tlakuali, ken itech altepetl Canaán kanin okatkaj ikalchanejkauan José. Itajtsin, Jacob, okimatki itech Egipto okatka tlakuali, ik non, okinmilui ikoneuan ma yakan Egipto uan ma kikoakan tlakuali (Génesis 42:1, 2).

Jacob okinualtitlanki san tlakamej, san Benjamín amo oyajki, pampa ok okilnamikiaya ijkuak okititlanki José ma kinmitati oksekimej ikniuan pero ayakmo oksepa okitak. Oksekimej ikoneuan Jacob okiyektlalijkej nochi pampa ma kineltoka José omikik pampa okikua se yolkatl, yejuan okiuikilijkej itlaken tlen okitlalilijkej miak estli uan okitsomonilijkej (Génesis 37:31-35).

Ikoneuan Jacob sapanoa onejnenkej pampa ajsiskiaj Egipto. Ijkuak otetlajtlanijkej kanin uelis kikoaskiaj tlakuali okinmiluijkej omonekiaya motlapouiskej iuan se tlakatl tlen okipiaya miak ipati, omonekiaya motlapouiskej iuan Zafenat-panéah, yejuan amo okimatiayaj pero nin tlakatl okatka José (Génesis 41:45). ¿Iikniuan José okixmatkej? Amo. Yejuan san okitakej se tlakatl tlen okipiaya miak ipati. Okinekiayaj ma kinpaleui, ik non, okichijkej tlen okichiuayaj miakej, omotlankuaketskej iixpan (Génesis 42:5, 6).

¿Tlen okichi José? ¡San niman okinmixmatki iikniuan! Ijkuak omotlankuaketskej san niman okilnamik nochi kochtemikilistli tlen Jehová okimakak ijkuak okatka telpochtli. Itech Biblia kijtoa José san niman okilnamik kochtemikilistli tlen okipixki, kanin iikniuan omotlankuaketsayaj iixpan ijkon ken axkan okichijtokaj (Génesis 37:2, 5-9; 42:7, 9). ¿Tlen kichiuaskia José? ¿Kinnapaloskia? ¿Noso axkan ye kintlajyouiltiskia?

José okimatiaya amo omonekiaya kinchiuilis tlen okimachiliaya, maski san ken kipiaskiaj innemilis. Moneki tikilnamikiskej Jehová okijto iixuiuan Jacob mochiuaskiaj se ueyi altepetl, ik non, uelis tikijtoskej Jehová okichi ma pano non tlamantli (Génesis 35:11, 12). Tla iikniuan José ok okatkaj amo yolkualmej, otetlajyouiltiayaj uan ochauatiayaj, ¿ken uelis mochiuaskia tlen okijto Jehová? Uan tla ye kintlajyouiltiskia iikniuan uelis iikni Benjamín uan itajtsin tlajyouiskiaj. Ye nion okimatiaya kox oyoltokaj. José omokuayejyeko amo itlaj kinmiluis iikniuan, kinyejyekoskia pampa kitaskia kox  yokipatlakej innemilis. Ijkon uelis kichiuaskia tlen Jehová okinekiaya ma kichiua.

Uelis amo keman techpanos ken José. Pero axkan miakej kalchanejkej moteuiaj uan moxeloaj. Uelis ijkuakon tiknekiskej tikchiuaskej tlen tikmachiliaj uan timokuayejyekoaj. Tla ijkon techpanoa, moneki ma tikchiuakan ken José uan ma timochijchikauakan pampa tikmatiskej tlen kineki Jehová ma tikchiuakan (Proverbios 14:12). Maski miak ipati kuali ma timouikakan iuan tokalchanejkauan, okachi ipati kuali ma timouikakan iuan Jehová uan Jesús (Mateo 10:37).

San niman José okinyejyeko iikniuan pampa kitaskia kox yokipatlakej innemilis. Achto, ika se tlakatl akin okitlajtolkuepaya, chikauak okinmilui san ichtaka otlachiatoj. Yejuan omopaleuijkej uan okitlapouijkej itech inkalchanejkauan uan iiknitsi tlen omoka inkalijtik. ¡José melauak oyolpakik ijkuak okimatki iiknitsi oyoltoka! Nin okichi okseki tlamantli ma kichiua. Okinmilui pampa kinyejyekoskia omonekiaya kiualikaskiaj Benjamín. Seki tonalmej satepan okinkauili ma mokuepakan inkalijtik pampa uelis kiualikaskiaj Benjamín, pero okinmilui omonekiaya mokauas se inmikni pampa oksepa mokuepaskiaj (Génesis 42:9-20).

Iknimej omokuayejyekojkej Safenat-panéah amo okimatiaya tlen omotlapouiayaj, ik non, opejkej kijtoaj: “Melauak titlajyouijtokej ipampa tokni, otikitakej ken otlajyouiaya uan ken otechtlatlaujtiaya ma tikiknomatikan, pero amo otikkakej. Ik non, axkan titlajyouijtokej”. Pero ken José okajsikamatki nochi tlen okijtoayaj, oyajki oksekan uan opejki choka (Génesis 42:21-24). Ye okimatiaya ijkuak ikaj moyolkuepa amo san moyolkokoa pampa nochi tlen okichi. Ik non, okinyejyeko.

Okikitskijkej Simeón, pero oksekimej okinkauili ma yakan Canaán. Noijki kanin okiuikayaj tlakuali okitlali intomin. Ijkuak yejuan oajsitoj inkalijtik okitlapouijkej Jacob nochi tlen okinpanok. Sapanoa okitlatlaujtijkej, pero saiktlami Jacob okika noijki Benjamín ma uia Egipto. Ijkuak oksepa oajsitoj ikalijtik José okiluijkej itech inkoxtaluan okajsikej tomin, uan okiualikiliayaj okachi tomin pampa kikuepiliskej. Maski sapanoa kuali tlen okichijkej, José okinekiaya kitas okseki tlamantli pampa kitas kox melauak yomoyolkuepkej. Ijkuak okinmilui iuan ma tlakuakan sapanoa omochijchika pampa amo ma kitakan tlen okimachiliaya ijkuak okitak Benjamín. Ijkuakon okinkauili ma mokuepakan inkalijtik, pero axkan itech ikoxtal Benjamín otlanauati ma kitlatikan icopa (Génesis 42:26–44:2).

Satepan José otlanauati ma kinkitskikan iikniuan pampa okiuikakej icopa. Ijkuak itech ikoxtal Benjamín okajsikej copa, ye okijto Benjamín ichteki, ik non, nochtin oksepa omokuepkej ikalijtik José. Axkan José uelis kimatiskia ken okatkaj inyelis iikniuan. Judá okijto ye iuan oksekimej iikniuan mokauaskiaj ken itlakeualuan José. Pero José amo okinek, okijto san Benjamín mokauaskia Egipto (Génesis 44:2-17).

Judá okijto: “San ye konetl [Benjamín] mokaua tlen okipixki inantsin uan itajtsin kitlasojtla”. Tlen okijto Judá melauak okiyolajsik José. Ye okachi ueyi itech ikoneuan tlen okipixki Raquel akin omikik ijkuak oneski Benjamín. Ijkon ken Jacob, José sapanoa kilnamiki Raquel. Uelis ik non sapanoa kitlasojtla Benjamín (Génesis 35:18-20; 44:20).

Judá oksepa okitlatlaujti amo ma mokaua Benjamín ken tlakeuali. Ye okinekiaya kipatkayotis. Saiktlami okilui: “¿Ken uelis nias iixpan notajtsin tla amo yas nouan nin telpochtli? ¡Ne amo nikxikos nikitas tlajyouilistli tlen kipias notajtsin!” (Génesis 44:18-34). Axkan okitak Judá okatka yolkuali. Amo san omoyolkuepki, axkan noijki otetlasojtlaya, oteiknomatiaya uan itech oksekimej omotekipachoaya.

 José amo kixikoa nochi tlen kimachilia. Ik non, otlanauati ma kisakan nochtin itekipanojkauan uan opejki choka; sapanoa chikauak ochokak uan okikakej kanin otlanauatiaya ueyi tekiua. Ijkuakon okinmilui iikniuan ye okatka José. Iikniuan amo okimatiayaj tlen kichiuaskej. Pero José okinnapalo uan okinmixpipitso ijkon okinnextili okintlapojpoluiaya (Génesis 45:1-15). Ijkon okiteititi Jehová techiknomati uan techtlapojpoluia (Salmo 86:5). Uan tejuan, ¿noijki ijkon tikchiuaj?

Ijkuak ueyi tekiua okimatki nochi tlen okipanok José, san niman okilui ma kiualikakan itajtsin tlen yokipiaya miak xiuitl uan noijki nochtin ikalchanejkauan. Ik non, José san niman oksepa okitak itajtsin. Ijkuak Jacob okitak ikone ochokak uan okijto axkan yiuelis mikiskia, pampa okitak ikone oyoltoka (Génesis 45:16-28; 46:29, 30).

Jacob oyoltoka ok 17 xiuitl itech altepetl Egipto. Achto mikiskia ye okinteochi 12 ikoneuan uan okijto tlen kinpanoskia sejse yejuan. José okimakakej okachi miak tlali, nochi tlen yetoskia iaxka itlayekankone. Uan noijki ome ikoneuan José pouiskiaj itech 12 nechikolmej tlen kipiaskia altepetl Israel. ¿Uan tlen okipanok Judá? Ken ye okiteititi melauak omoyolkuepki okachi amo ken oksekimej iikniuan, Jacob okijto itech iixuiuan nesiskia Mesías (Génesis, tlakotonal 48 uan 49).

Jacob omikik ijkuak okipiaya 147 xiuitl. Ijkuak Jacob omikik, ikoneuan omomojtiayaj pampa José uelis kintlajyouiltiskia. Pero José okinyolseui. Ken okinmilui, ye okitak nochi tlen okipanok okichi Jehová, ik non, amo omonekiaya motekipachoskej. Okinmilui amo ma momojtikan pampa ye amo okatka ipatka toTajtsin Dios (Génesis 15:13; 45:7, 8; 50:15-21). José okimatiaya san Jehová uelis kijtoskia kox kuali okichijkej noso amo. ¿Omonekiaya José kintlajyouiltis akinmej Jehová okintlapojpolui? (Hebreos 10:30).

Uan tejuatsin, ¿tikintlapojpoluia oksekimej? Maski melauak oui tikintlapojpoluiskej oksekimej uan okachi ijkuak otikmatkej yejuan okinekiayaj techtlajyouiltiskej. Tla tikintlapojpoluiaj akinmej melauak moyolkuepaj, amo san tejuan kuali timomachiliskej noijki akin otechtlajyouilti kuali momachilis. Tla ijkon tikchiuaj tikchijtoskej ken José akin otlaneltokak itech toTajtsin Dios, uan noijki titeiknomatiskej ken toTajtsin Jehová.