Onimoskalti Costa Rica itech se altepetl tlen itoka Puerto Limón. Notatajuan okinpixkej chikueyi inkoneuan, achto chikuase oneskej uan satepan ne. Ijkuak onikpiaya chikueyi xiuitl notajtsin oixpoliuik, ik non, nonantsin iselti otechiskalti.

Sapanoua nechpaktia nimauiltis pero okachi nechpaktia béisbol. Ijkuak onikatka nitelpochtli opejki nimauiltia iuan oksekimej ik kanin nichanti. Onikpiaya 20 xiuitl ijkuak se tlakatl okintemojtokaj akinmej kimatij mauiltiskej uan onechyole manimauilti itech iequipo ompa Nicaragua. Amo oniknekiaya nias porque nonantsin omokokouaya uan ne onikmaluiaya, ik non, onikilui amo. Satepan ijkuak okse tlakatl noijki onechyole manimauilti itech equipo nacional ompa Costa Rica, onikilui kema, okinyolejkej akinmej ayamo okinmixmatiayaj. Opejki nimauiltia itech xiuitl 1949 hasta 1952 noijki miak uelta onimauilti Cuba, México uan Nicaragua. Ne onimauiltiaya ken defensor de base, itech 17 partidos sapanoua kualtsin onimauilti. Onechpaktiaya ijkuak nochtin okijtouayaj notoka.

Pero opejki niauilnemi, maski onikpiaya nonovia nochipa onikatka iuan oksekimej siuamej. Onikoniaya miak alcohol, nikilnamiki se tonal onitlauanki uan mostlatika amo onikmatiaya ken oniajsito nokalijtik. Noijki onimauiltiaya ika dominó para niktlanis tomin uan onikinkouaya billetes de lotería.

Ijkuak nonantsin omochi iTlaixpantijka Jehová okinekiaya noijki manimomachti pero amo ijkon opanok. Ne okachi onikpatioitaya nimauiltis, ijkuak onimauiltiaya amo onitlakuaya maski oniapismikiaya. Sapanoua onikpatioitaya béisbol, ik non, nochipa oniknekiaya nimauiltis.

Pero ijkuak onikpiaya 29 xiuitl, onimokojko ijkuak oniknekiaya niktsakuilis se pelota ijkuak otimauiltijtokaj. Maski onipajtik, ayakmo onimauilti. Pero ken onechpaktiaya béisbol, onikinmachtiaya oksekimej mamauiltikan.

Itech xiuitl 1957, onia se ueyi nechikol tlen okipixkej iTlaixpantijkauan Jehová itech se estadio kanin onimauiltiaya. Ijkuak ompa onikatka onechtlajtlachialti nochtin kuali omouikayaj, amo ijkon omotaya ijkuak ompa onimauiltiaya. Tlen onikitak itech ueyi nechikol onechpaleui manimomachti Biblia iuan iTlaixpantijkauan Jehová uan opejki inmiuan nimonechikoua.

Onechpakti tlen onimomachtiaya itech Biblia, onechtlajtlachialti ijkuak onikmatki Jesús yokijtojka itlamian tonalmej san idiscípulos tetlapouiskiaj itech iTekiuajkayo toTajtsin Dios (Mateo 24:14, TNM). Noijki onimomachti akinmej tetlapouiaj amo kintlaxtlauiaj porque Jesús okijto: “Ijkuak onankiselijkej amo onankitlaxtlajkej, noijki ijkon xiktemakakan” (Mateo 10:8, TNM).

Ijkuak okachi onimomachtiaya Biblia, onikitaya tlen yejuan otlamachtiayaj ijkon okichiuayaj. Onechpakti ken omochijchikauayaj kintlapouiskej nochtin itech iTekiuajkayo toTajtsin Dios. Onikitak yejuan melauak motlasojtlaj ijkon ken Jesús okinmachti idiscípulos, ik non, ijkuak oniktlajtolti Marcos 10:21 kanin Jesús techyoleua matikchiuakan ken Ye, onikijto nimochiuas iTlaixpantijka Jehová.

Onikmachili oui nikkauas seki tlamantli. Miak xiuitl, sejse semana onikkouaya número tlen onechpaktiaya itech billetes de lotería pero itech Biblia onimomachti Jehová kikokolia akin kiueyichiua “teotsin tlen kitemaka Suerte” uan noijki akin tlaixneki (Isaías 65:11; Colosenses 3:5). Ik non, onikijto ayakmo nimauiltis. Domingo ijkuak ayakmo onikko billetes de lotería, ¡número tlen onechpaktiaya okipiaya premio! Miakej onechpinauijkej porque non semana amo onimauilti uan onechiluiayaj oksepa manimauilti. Pero ayakmo keman ijkon onikchi.

Onimoapolakti itech xiuitl 1958 pero ijkuakon itlaj opanok uan omonekiaya nikteititis yonikpatlak nonemilis (Efesios 4:24). Youak ijkuak onimokopaya kanin onimokalotiaya, akin okatka nonovia ompa onechchixtoka uan onechilui: “Xiuiki Sammy matimoyolpaktikan”. San niman oniknankili: “¡Amo!”. Onikilui axkan nikchiua tlen toTajtsin Dios kipaktia (1 Corintios 6:18). Ye omotlajtlachialti uan okijto: “¡¿Tlen?!”. Okinekiaya oksepa iuan maniyeto, onechilui amo moneki tiktlakamatiskej tlen Biblia kijtoua itech auilnemilistli. Ne onikalak nocuarto uan kuali onitlatsaki. Niyolpaki onimochi niiTlaixpantijka Jehová, axkan ayakmo nikchiua tlen achto onikchiuaya.

Tla nikijtos ken yonechteochi Jehová, monekis nikijkuilos se amochtli. Axkan nikinpia noyolikniuan, kuali nikpia nonemilis uan sapanoua niyolpaki.

Ok nechpaktia nimauiltis béisbol, maski ayakmo ken achto, ken ijkuak oniktlania tomin uan miakej onechixmatiaya porque nochi non amo uejkaua. Axkan nikmati okachi ipati timouikaskej iuan Jehová uan tokniuan. Biblia kijtoua: “Nochi tlan onka itech nin tlaltíkpaktli ya tlanti, iwa nochi tlan pitsotik, pero akin kichiwah tlan Dios kineki nochipa yolitos” (1 Juan 2:17). Axkan okachi nechpaktia nikchiuas tlen Jehová kineki uan niyetos itech ialtepe. Non tlen okachi nikpatioita.