Armagedón kijtosneki ijkuak toTajtsin Dios moteuis iuan nochtin tekiuajkej tlen katej nikan tlaltikpak. Nochtin tekiuajkej uan akinmej kinpaleuiaj kixnamikij toTajtsin Dios, porque amo kinekij ma kinyekana (Salmo 2:2). Itech Armagedón kinmixpoloskej nochtin tekiuajkej tlen katej nikan tlaltikpak (Daniel 2:44).

 Tlajtoli Armagedón noijki moijkuiloua Har-Magedón uan san se uelta ijkuilitok itech Biblia, kajki itech Apocalipsis. Se profecía kijtoua “wejweyi reyes non otlanawatijtokah ipan nin tlaltíkpaktli” kinnechikoskej “para mamotekilmakakah iwa n Dios nochi weletini”, nin guerra mochiuas “itech se weyi tlali non itech tlájtoli hebreo itoka Armagedón” (Apocalipsis 16:14 TNM,16).

 ¿Akinmej moteuiskej itech Armagedón? Tlapaleuiskej ángeles uan kinyekanas Jesucristo, yejuan kintlaniliskej akinmej kikokoliaj toTajtsin Dios (Apocalipsis 19:11-16, 19-21). Kintlaniliskej akinmej kixnamikij iTekiuajkayo toTajtsin Dios uan akinmej kikokoliaj (Ezequiel 39:7).

 ¿Kanin moteuiskej? Ijkuak moteuiskej itech Armagedón, mochiuas itech nochi tlaltikpak uan amo san itech se altepetl (Jeremías 25:32-​34; Ezequiel 39:17-​20).

 Tlajtoli Armagedón (ika hebreo, Har Meghiddóhn) kijtosneki tepetl tlen kajki Meguidó. Meguidó okatka se altepetl uan okatka ompa Israel. Sekimej ixtlamatkej kijtouaj miakej ompa omoteuijkej uan Biblia noijki ijkon kijtoua (Jueces 5:19, 20; 2 Reyes 9:27; 23:29). Armagedón amo kanaj kajki itech altepetl Meguidó porque ompa amo katej tepemej. Noijki ixtlauak tlen kajki Jezreel kanin kajki altepetl Meguidó, ompa amo akiskej nochtin akinmej moteuiskej iuan toTajtsin Dios. Armagedón kijtosneki nochtin tekiuajkej mosetiliskej uan kixnamikiskej iTekiuajkayo toTajtsin Dios.

 ¿Tlen panos itech Armagedón? Amo tikmatij ken kitekitiltis ichikaualis toTajtsin Dios, pero uelis kichiuas ken yiuejkika, uelis kichiuas ma tesiui, ma tlalolini, ma tlaatemi, ma tlapejpetlani noso kinmixpolos ika kokolistli (Job 38:22, 23; Ezequiel 38:19, 22; Habacuc 3: 10, 11; Zacarías 14:12). Kichiuas ma motlapololtikan akinmej kikokoliaj uan inneuian ma momiktikan, satepan kajsikamatiskej toTajtsin Dios inmiuan moteuia (Ezequiel 38:21, 23; Zacarías 14:13).

 ¿Pojpoliuis tlaltikpak ika Armagedón? Tlaltikpak amo pojpoliuis itech Armagedón porque okichijchijkej para nochipa itech ma tichantikan (Salmo 37:29; 96:10; Eclesiastés 1:4). Ik non, itech Armagedón amo nochi pojpoliuis. Armagedón kichiuas ma momakixtikan “senmiaktikeh tlaltikpaktlakah” akinmej yolmelauakej (Apocalipsis 7:9, 14; Salmo 37:34).

 ¿Pero tleka Biblia kijtoua itech Armagedón, “pojpoliuis tlaltikpak”? Itech seki versículos tlaltikpak kijtosneki planeta kanin tichantij. Pero ualeua noijki kijtosneki akinmej kixnamikij toTajtsin Dios (1 Juan 2:15-17). Ik non, ijkuak kijtoua “pojpoliuis tlaltikpak” itech Armagedón kijtosneki kinpojpoloskej akinmej amo yolkualmej (Mateo 24:3, Biblia de Jerusalén).

 ¿Keman peuas Armagedón? Ijkuak peuas ueyi tlajyouilistli san niman peuas Armagedón, Jesús okijto: “Pero n tonati iwa n ora ijkuak ijkó tlamochiwas amaka kimati, nion ángelteh non kateh ilwikak, nion Ne, yej sanwel Notajtsi kimatok” (Mateo 24:21, 36). Itech Biblia kijtoua Armagedón mochiuas itech itlamian tonalmej uan nin opejki itech 1914 ijkuak Jesús opejki tlanauatia (Mateo 24:37-39).