ToTajtsin Dios kita nochi uan uelis kitekitiltis ichikaualis kanin kinekis (Proverbios 15:3; Hebreos 4:13). Pero Biblia amo kijtoua toTajtsin Dios san kanin kajki noso kajki itech nochi tlen onka. Biblia kijtoua ye se espíritu uan kipia kanin chanti.

•   ¿Ken toTajtsin Dios? Ye se espíritu (Juan 4:24). Ik non, amikaj uelis kitas (Juan 1:18). Ijkuak Biblia kijtoua toTajtsin Dios ikaj okimonextili, kijtoua kanin okatka. Biblia amo kijtoua ye san kanin kajki (Isaías 6:1, 2; Apocalipsis 4:2, 3, 8).

•   ¿Kanin chanti? ToTajtsin Dios kajki kanin katej oksekimej espíritus ken ye uan chanti ompa iluikak. Ompa amo ken nikan tlaltikpak (1 Reyes 8:30). Biblia kijtoua se tonal ángeles okalakej kanin kajki Jehová. a Ijkon tikajsikamatij toTajtsin Dios kipia kanin chanti (Job 1:6).

Tla toTajtsin Dios amo san kanin kajki, ¿uelis techmaluis?

 Kema. Maski ye se espíritu, kineki techpaleuis tinochtin akinmej tichantij nikan tlaltikpak. Kita ijkuak timochijchikauaj tiktlakamatiskej uan techpaleuia (1 Reyes 8:39; 2 Crónicas 16:9). ¿Ken kiteititia techmaluia uan kineki techpaleuis?

•   Ijkuak tiktlatlaujtiaj: Jehová san niman techkaki ijkuak tiktlatlaujtiaj (2 Crónicas 18:31).

•   Ijkuak timoyolkokouaj: “Jehová kajki inmiuan akinmej moyolkokouaj; ye kinmakixtia akinmej yolpatlachitokej” (Salmo 34:18).

•   Ijkuak amo tikmatij tlen tikchiuaskej: Jehová ika iTlajtol noso Biblia techpaleuia ma tiyetokan tiixtlamatkej uan techiluia tlen moneki tikchiuaskej (Salmo 32:8).

Tlen sekimej kineltokaj

 Sekimej kijtouaj: Salmo 139:8 kiteititia Dios san kanin kajki porque kijtoua: “Tla niaskia iluikak, ompa tiyetoskia uan tla nimotekas ijtik tekochtli, noijki ompa tiyetoskia”.

 Tlen melauak: Nin texto amo kijtosneki toTajtsin Dios kajki san kanin, kijtosneki ye uelis techpaleuis maski san kanin tiyetoskej.