Itech Biblia amo kajki tlajtoli kimayaui, nin kijtosneki ijkuak ikaj ayakmo kineki kipias ikonetsin. Onka seki textos tlen techpaleuia matikajsikamatikan ken kita toTajtsin Dios toyolilis uan iyolilis se konetl tlen ayamo nesi.

 Toyolilis se tetliokolil tlen techmaka toTajtsin Dios (Génesis 9:6; Salmo 36:9). ToTajtsin Dios sapanoua kipatioita toyolilis uan noijki kipatioita iyolilis se konetl tlen kajki ijtik inantsin. Ijkuak ikaj kimiktia se konetl tlen ayamo nesi, tlajtlakolchiua.

 Tlanauatil tlen okinmakak toTajtsin Dios israelitas okijtouaya: “Tla ome tlakamej moteuijtokej uan kikojkoskej se siuatl tlen kipias ikonetsin uan ikoneuan melauak kisaskej, maski amo mikiskej, tlakatl moneki makitlaxtlaua tla itlaj panos ijkon ken kijtos iteko siuatl; uan ye moneki kitemakas ika jueces. Pero tla ikaj mikis, moneki tiktemakas se yolilistli ika se yolilistli” (Éxodo 21:22, 23). a

•  ¿Keman peua toyolilis?

•  ¿Uelis kitlapojpoluis toTajtsin Dios akin okimaya ikonetsin porque ayakmo okinek kipias?

•  ¿Kuali ikaj kimayauis ikonetsin porque uelis ixpoliuis konetsintli noso inantsin?

 ToTajtsin Dios kijtoua iyolilis se konetsintli peua ijkuak moskaltia ijtik inantsin. Itech Biblia, toTajtsin Dios amo kijtoua konetl tlen ayamo nesi uan inantsin san se. Matikitakan tleka tikijtoua toTajtsin Dios kipatioita iyolilis se konetsintli tlen ok kajki ijtik inantsin uan noijki se tlen yikin yoneski.

•   Tekiua David okilui toTajtsin Dios: “Otechitak ijkuak yikin opejki nimoskaltia ijtik nonantsin” (Salmo 139:16). ToTajtsin Dios yokipatioitaya iyolilis David maski ayamo onesiaya.

•   Matikitakan okse. ToTajtsin Dios yokijtojka tlen kichiuaskia profeta Jeremías maski ayamo onesiaya, okijto: “Ne yonimitsixmatiaya ijkuak ayamo onimitschijchiuaya ijtik monantsin. Ne onimitspejpenki ijkuak ayamo otinesiaya. Onimitstlali tiprofeta itech altepemej” (Jeremías 1:5).

•   Lucas, akin okijkuilo Biblia uan noijki otlapajtiaya, okitekitilti san se tlajtoli ika griego para kijtoskia se konetsintli tlen ayamo onesiaya uan tlen yoneski (Lucas 1:41; 2:12, 16).

 Kema, toTajtsin Dios uelis kintlapojpoluis akinmej okimayajkej inkonetsin porque ayakmo okinekej kipiaskej. Tla peua kitaj yolilistli ken kita toTajtsin Dios, kinpaleuis amo sapanoua mamoyolkokokan. Biblia kijtoua: “Jehová teiknomati uan yolkuali [...]. Ijkon ken uejka kajki kanin kisa tonaltsin uan kanin poliuiti, ijkon uejka kitlalia totlajtlakoluan” (Salmo 103:8-12). b Jehová kintlapojpoluis akinmej moyolkopa porque otlajtlakolchijkej, noijki akinmej okimayajkej inkonetsin (Salmo 86:5).

 Biblia kijtoua iyolilis se konetsintli tlen ayamo nesi sapanoua ipati, ik non, amo kuali ikaj makimayaui ikonetsin maski uelis mokokos, ixpoliuis inantsin noso ikonetsin.

 Pero ¿tla ijkuak ikaj yikipias ikonetsin uan panoua itlaj amo kuali, akin moneki kipejpenaskej kimakixtiskej, konetsintli noso inantsin? Amo nochipa ijkon panoua pero non moneki kipejpenaskej ifamiliares tlen inmiuan chanti akin kimakixtiskej.