Odval se siuatl tlen chanti itech ueyi altepetl Mongolia, ye amo kimati tlen tonal oneski, pero mokuayejyekoa uelis oneski itech xiuitl 1921. Ijkuak okatka takotsin, itatajuan okititlaniayaj ma kimaluiti inyolkauan, ik non, maski omomachti se xiuitl, amo omomachti kitlajtoltis se amatl. Pero axkan kipia se kuajkualtsin amatlajkuilol tlen kipaleuia okachi ma kixmati toTajtsin Dios uan ma kimati tlen kualtsin chialistli kipiaj akinmej kikakij. Sapanoa kiyolpaktiaj tlen momachtijtok.

Nin amatlajkuilol, tlen okichijchijkej iTlaixpantijkauan Jehová itech xiuitl 2011, onka ika ome tlamantli. Ninmej ome amatlajkuilolmej kipiaj kuajkualtsitsintin tlaixkopinalmej, pero se kipia miak letras uan okse amo okachi kipia.

Amatlajkuilol tlen kipia miak letras itoka Xikaki toTajtsin Dios uan tiyoltos nochipa onka ika 583 tlatlamantli tlajtolmej. Uan okse amatlajkuilol itoka Xikaki toTajtsin Dios, onka ika 483 tlatlamantli tlajtolmej. Axkan xikita keski amatlajkuilolmej mochijchiua Declaración Universal de Derechos Humanos tlen okichijchi Naciones Unidas, pampa itech metstli octubre, xiuitl 2013, okitlajtolkuepkej ika 413 tlatlamantli tlajtolmej. Noijki, ninmej ome amatlajkuilolmej sapanoa miak kinchijchiuaj, pampa yomochijchijkej kanaj 80 millones.

Itech ueyi altepetl Brasil, ijkuak se siuatl tlen yikipia miak xiuitl okiseli amatlajkuilol Xikaki toTajtsin Dios, okijto: “Nechyolpaktia nikmatis katej akinmej motekipachoaj intech tlaltikpaktlakamej ken ne. Amo keman onikinseliaya namorevistas pampa amo ueli itlaj niktlajtoltia. Pero nin amatlajkuilol nikneki nikitas”.

Brigitte, se siuatl tlen amo ueli tlajkuiloa nion amo ueli kitlajtoltia se amatl, chanti itech ueyi altepetl Francia, ye okijto: “Mojmostla nikinmita tlaixkopinalmej tlen kipia nin amatlajkuilol”.

Itech ueyi altepetl South Africa, se iTlaixpantijka Jehová, okijto: “Amo nikita kox onka okse amatlajkuilol tlen okachi kuali pampa nikintlapouis tlen kijtoa Biblia akinmej tlajtoaj tlajtoli chino. Kuali nimotlapouia iuan akinmej sapanoa ixtlamatkej, akinmej kuali omomachtijkej, uan akinmej amo uelij kitlajtoltiaj se amatl, nochtin tlaltikpaktlakamej. Ika amatlajkuilol Xikaki toTajtsin Dios uan tiyoltos nochipa nechpaleuia totoka ma nitlamachti tlen tlamachtia Biblia. San ika kanaj tlajko hora, kuali yotimomachtijkej”.

Ome siuamej iTlaixpantijkauan Jehová tlen chantij itech ueyi altepetl Alemania, kimachtiaj se namiktilistli tlen sapanoa omomachti. Sapanoa omotlajtlachialti tlakatl ijkuak okitak amatlajkuilol uan okijto: “¿Tlen amo niman onannechmakakej nin amatlajkuilol? Nin nechpaleuis kuali ma nikajsikamati tlen kijtoa Biblia”.

Se siuatl tlen amo tlakakij uan chantij itech ueyi altepetl Australia, okijto: “Yikipia miak xiuitl onichantiaya iuan sekimej monjas. Kuali onimouikaya iuan akinmej kiyekanaj teopan. Pero amo keman onechmachtijkej itech iTekiuajkayo toTajtsin Dios. Tlaixkopinalmej tlen kinpia nin amatlajkuilol onechpaleui kuali ma nikajsikamati tlen kijtoa Mateo 6:10”.

Itech Kali kanin tekitij iTlaixpantijkauan Jehová itech ueyi altepetl Canadá, okijkuilojkej: “Ijkuak akinmej ochantiayaj itech ueyi altepetl Sierra Leona okitakej amatlajkuilol Xikaki toTajtsin Dios ika tlajtoli krío, okijtojkej sapanoa tekitij iTlaixpantijkauan Jehová pampa kintlapouiskej ika Biblia nochtin tlaltikpaktlakamej. Uan oksekimej okijtojkej: ‘Maski sekimej amo motekipachoaj intech tlaltikpaktlakamej, namejuan kema’”.