Itech metstli noviembre xiuitl 2011, sekimej iTlaixpantijkauan Jehová omokuayejyekojkej kichiuaskej se yankuik tlamantli pampa okachi kitematiltiskej iTlajtol toTajtsin Dios. Ik non, ik sur itech altepetl Manhattan (Nueva York), okintlalijkej carritos uan mesas ika amatlajkuilolmej kanin panoaj miakej tlaltikpaktlakamej.

Akinmej tetlapouiaj okipejpenkej kintlaliskej carritos uan mesas ika tlatlamantli amatlajkuilolmej itech naui lugares kanin nochtin uelis kitaskej. Ninmej okintlalijkej kanin kichiaj noso moketsaj carros, kanin mojmostla panoaj miakej tlaltikpaktlakamej.

Akinmej ompa panoaj motokiaj kanin katej carritos uan mesas pampa uelis kinnankiliskej ika Biblia tlen motlajtlaniaj. Uan akinmej amo majxiliaj uelis kiuikaskej se amatlajkuilol pampa satepan kitlajtoltiskej.

Kintlaliaj amatlajkuilolmej ika tlatlamantli tlajtolmej, uan tla ikaj kineki se amatlajkuilol ika itlajtol uan amo onka, uelis kitlajtlanis uan kikuitikisas satepan.

Nin tlamantli tlen kichijtokej tokniuan kuali kiseliaj miakej tlaltikpaktlakamej uan tekiuajkej. Se neskayotl, se policía okijto: “¡Yomonekiaya ijkon xikchiuakan! Namejuan nankipiaj tlen tlaltikpaktlakamej kinekij”.

Se tlakatl tlen ompa onejnentiaya san niman omoketski ijkuak okitak amochtli ¿Tlen melauak tlamachtia Biblia? Ijkon okichi pampa itech metro okinmitak miakej tlaltikpaktlakamej okitlajtoltiayaj non amochtli uan omotlajtlaniaya kanin okikuitoj noso akin okinmakak, pero axkan yokimatiaya.

Itech chikuase semanas, se telpochtli, ijkuak yaui tekititi, nochipa opanoaya kanin okitlalijkej se mesa ika amatlajkuilolmej. Satepan, okinmilui iTlaixpantijkauan Jehová ma kipaleuikan. Yejuan ika miak pakilistli okipaleuijkej. Okimakakej se Biblia uan okiyekiluijkej ken uelis kipaleuis itech inemilis.

Miakej tlaltikpaktlakamej moketsaj kanin kintlaliaj amatlajkuilolmej uan ika miak pakilistli motlapouiaj itech iTlajtol toTajtsin Dios. Pampa okintlalijkej carritos uan mesas ika amatlajkuilolmej kanin panoaj miakej tlaltikpaktlakamej, san itech se metstli okintemakakej 3,797 revistas uan 7,986 amochmej.